(ភ្នំពេញ​)៖ នៅ​ព្រឹក​ថ្ងៃ​ទី​១៩​ ខែ​កញ្ញា​ ឆ្នាំ​២០១៦​ ខាងមុខ​នេះ​សាលា​ដំបូង​រាជធានី​ភ្នំពេញ​ ​ នឹង​បើក​សវនាការ​សំណុំរឿង​​ស្ត្រី​បឹងកក់​៤នាក់​ ក្រោម​ការ​ចោទប្រកាន់​ពី ​បទ​ប្រមាថ​និង​ប្រឆាំង​អ្នក​រាជការ​សាធារណៈ​ដោយ​ មាន​ស្ថាន​ទម្ងន់​ទោស។​

​កាលវិភាគ​បិទ​ផ្សាយ​នៅ​អគារ​តុលាការ​ជាន់​ទី​១​ បង្ហាញ​ថា​ ស្ត្រី​បឹងកក់​ទាំង​៤នាក់​ឈ្មោះ​ ទេព​ វន្នី​ បច្ចុប្បន្ន​កំពុង​ជាប់​ពន្ធនាគារ​ និង​ ៣នាក់​ទៀត​ឈ្មោះ​ បូ​ ឆវី​ ឈ្មោះ​ គង់​ ចន្ថា​ និង​ ឈ្មោះ​ ហេង​ មុំ​ ។

ពួកគេ​​ ជាប់​ចោទ​ពី​បទ​  «ប្រមាថ​អ្នក​រាជការ​សាធារណៈ​ដោយ​មាន​ស្ថាន​ទម្ងន់​ទោស​ និង​ បទ​ប្រឆាំង​អ្នក​រាជការ​សាធារណៈ​ដោយ​មាន​ស្ថាន​ទម្ងន់​ទោស​ (​ ដោយ​បុគ្គល​ច្រើន​រូប​ក្នុង​ឋានៈ​ជា​ចារី​ សហចារី​ អ្នក​ផ្តើម​គំនិត​ និង​ អ្នក​សមគំនិត​ )​ »។​ ក្នុង​សំណុំ​រឿង​នេះ​ គឺ​សាលា​រាជធានី​ភ្នំពេញ​ ជា​ដើម​បណ្ដឹង​រដ្ឋប្បវេណី​ ។

សវនាការ​នេះ​ ដឹកនាំ​ដោយ​លោក​ លី​ សុខលេង​ ជា​ចៅក្រម​ជំនុំជម្រះ​ និង​ កញ្ញា​ វ៉ា​ សក្តា​ ជា​តំណាង​អយ្យការ​ ៕