(បាត់ដំបង)៖ កញ្ញា ធី សុវណ្ណថា ដែលបានប្រកាសឈប់គាំទ្រគណបក្សសង្រ្គោះជាតិ និងបានរិះគន់ លោក កឹម សុខា ប្រធានស្តីទីគណបក្សសង្រ្គោះជាតិ​យ៉ាងចាស់ដៃ ក្រោយពីតុលាការផ្តន្ទាទោសរួចមក នៅថ្ងៃទី១០ ខែកញ្ញា ឆ្នាំ២០១៦នេះ ពលរដ្ឋ ១,៣០០នាក់​ នៅស្រុកកំរៀង ខេត្តបាត់ដំបង​ បានប្រកាសប្រាប់ កញ្ញា ធី សុវណ្ណថា ឲ្យដឹងថា ពួកគាត់ពលរដ្ឋទាំងគ្នាប្រមាណ ១,៣០០នាក់​ ចង់ឃើញ​លោក​ កឹម​ សុខា ប្រឈមចំពោះមុខច្បាប់។

កញ្ញា ធី សុវណ្ណថា ធ្លាប់ជាអតីតអ្នកគាំទ្រគណបក្សសង្រ្គោះជាតិ បានឲ្យដឹងថា «វេទិកា (ទី៣៤) ស្រុកកំរៀង​ ខេត្តបាត់ដំបង​ ពលរដ្ឋ ១,៣០០នាក់​ ពលរដ្ឋថា៖ ចង់ឃើញ​លោក​ កឹម​ សុខា​ «កុំខ្លាំងបានតែសម្តី» ក្លាហាន​ហានប្រឈមុខ​ រកខុស​ រកត្រូវ​ ចំពោះមុខច្បាប់»។

ជាការកត់សំគាល់ បន្ទាប់ពីតុលាការកាត់ទោសលោក កឹម សុខា ដាក់ពន្ធនាគាររយៈពេល៥ខែ និងពិន័យប្រាក់៨០ម៉ឺនរៀល, នៅល្ងាចថ្ងៃទី០៩ ខែកញ្ញា ឆ្នាំ២០១៦ កញ្ញា ធី សុវណ្ណថា អតីតអ្នកគាំទ្រ​គណបក្សសង្រ្គោះជាតិ បានបង្ហោះសារដោយបាន រិះគន់ខ្លាំងមេដឹកនាំគណបក្សសង្រ្គោះជាតិយ៉ាងចាស់ដៃ ហើយបានលើកឡើងថា កញ្ញាខ្មាសគេណាស់ដែលធ្លាប់គាំទ្រ​គណបក្សសង្គ្រោះជាតិ ហើយថា កញ្ញាផ្ទាល់មិនគួរជឿមេដឹកនាំគណបក្សសង្រ្គោះជាតិទាំងពីររូប ដែលជាមេដឹកនាំចេះត្រឹមតែ​ សន្យាខ្យល់ លាបពណ៌​ ល្មោភស្រី កំសាក​រត់ចោលរាស្រ្ត​ ញុះញង់បាតុកម្ម​ និងតែងសុំអន្តជាតិផ្តាច់ជំនួយ​បិទទីផ្សារពីកម្ពុជា។

កញ្ញា ធី សុវណ្ណថា នៅក្នុងរយៈពេលចុងក្រោយនេះ បានធ្វើដំណើររៀបចំវេទិកាសាធារណជាច្រើនកន្លែង នឹងនៅតាមបណ្តាខេត្តនានា ដោយទាញបាន​ប្រជាប្រិយភាពជាច្រើន​ ពីបណ្តាបងប្អូនប្រជាពលរដ្ឋ។ គ្រប់ពេលដែលកញ្ញា ធី សុវណ្ណថា បានជួបជួបប្រជាពលរដ្ឋកន្លងមកឃើញថា មានប្រជាពលរដ្ឋភាគច្រើនបានបង្ហាញជំហរ មិនគាំទ្រ និងបោះឆ្នោតឲ្យគណបក្សសង្រ្គោះជាតិទៀតឡើយ ដោយសារតែប្រជាពលរដ្ឋទាំងនោះអស់ជំនឿចិត្ត លើការដឹកនាំរបស់លោក សម រង្ស៊ី និងលោក កឹម សុខា៕