(ភ្នំពេញ)៖ អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា លោក ហេង រតនា បានបញ្ជាក់ថា ប្រជាជនកម្ពុជារងទុក្ខ និងឈឺចាប់ចំនួន២ដង ​ពីសហរដ្ឋអាមេរិកករណីទំលាក់​គ្រាប់បែកនៅ​កម្ពុជា។​

លោកអគ្គនាយកបញ្ជាក់ក្នុង Facebook ផ្លូវការរបស់លោកថា ភាពឈឺចាប់លើកទី១ គឺដោយសារអាមេរិក ទំលាក់គ្រាប់បែកជិត៣លានតោន​ គ្រាប់បែកចង្កោមជិត៣០លានគ្រាប់​ គ្រាប់បែកគីមី​ CS ជាដើម។ល។​ ក្រោមលេសថា​ តាមកំទេចពួកយៀកកុង​ យួនឈ្លានពាន​ ប៉ុន្តែស្លាប់តែខែ្មរអស់រាប់សែននាក់​ (ជាង៥០០,០០០នាក់់) ​សម្លាប់ដោយផ្ទាល់ និងកំទេចតែភូមិក ផ្ទះសំបែងខែ្មររាប់ម៉ឺន​កន្លែង។

លោកបញ្ជាក់ទៀតថា ចំពោះការឈឺចាប់លើកទី២ ​គឺ​នៅពេលដែលអាមេរិកដឹងខ្លួន នឹងទទួលស្គាល់ការពិត ក្នុងសង្គ្រាមនៅឥណ្ឌូចិន និងសោកវិនាសកម្មបង្កឡើង និងបន្តបន្សល់ទុកកាកសំណល់ ពីសង្គ្រាមនោះ​ ខាងប្រទេសវៀតណាម​ និងឡាវ បានទទួលជំនួយកើនឡើងរហូត ដល់ជិត១០០លានក្នុងរយៈពេល៣ឆ្នាំ​ ដើម្បីជាការដោះស្រាយបញ្ហាធានា សុខសុវតិ្ថភាពដល់ប្រជាជនរបស់ខ្លួន តែកម្ពុជាទទួលបានតិចតួចប៉ុណ្ណោះ។

លោក ហេង រតនា លោកឡើងថា ​«តើមានមូលហេតុអ្វី ដែលអាមេរិករំលោភសិទិ្ធ ប្រជាជនកម្ពុជាម្តងជា២ម្តងបែបនេះ? កាកសំណល់សង្គ្រាម របស់អាមេរិកទាំងនេះ បន្តសម្លាប់និងធ្វើឱ្យរបួសប្រជាជន ស្លូតត្រង់កម្ពុជាយ៉ាងអយុតិ្តធម៌បំផុត​!​ មិនត្រឹមតែប៉ុណ្ណោះ កំពុងធ្វើឱ្យកូនខែ្មរជំពាក់ជាន់ក​ ដោយសារសង្គ្រាមអាមេរិក-វៀតណាម ឡើងចំនួនជិត៤០០លានដុល្លាទៅហើយ! គេយកដំបងដ៏ធំមកវាយសំពងសំលាប់យើង ​តែមិនស្លាប់​ គេបែរជាមកទារសងថ្លៃដំបង​ មិនគិតប្រឹងជួយព្យបាលរបួសធ្ងន់ធ្ងរនោះទេ! តើយុតិ្តធម៌និងការគោរពសិទិ្ធមនុស្សនៅឯណា​ សំរាប់ប្រជាជនកម្ពុជា ដែលរងទុក្ខសោកនោះ?»។​

លោកអគ្គនាយក CMAC បានបញ្ជាក់ឲ្យដឹងទៀតថា «យើងបានធ្វើការស្រាវជ្រាវ យ៉ាងច្រើនពីមូលហេតុអាមេរិក ប្រព្រឹតិ្តមកលើកម្ពុជាលើករណីនេះ មានការអះអាងយ៉ាងច្រើន ហើយមានមូលហេតុមួយនោះ គឺថា​ កាលមកទំលាក់គ្រាប់បែកអាមេរិកថា ក្រុមខែ្មរមួយជំពូកនោះ ស្នើសុំឱយអាមេរិកជួយទំលាក់​ ហើយនៅពេលអាមេរិក ពិបាកផ្តល់ជំនួយមកកម្ពុជា​ ដោយសារពួកខែ្មរជំពូក​ដដែលហ្នឹងសុំឱ្យអាមេរិកផ្តាច់ជំនួយ!។ រីឯឡាវនិងវៀតណាម​ រស់នៅអាមេរិកពួកគេរួមគ្នា ទាមទារនិងរុកគួនឲ្យព្រឹទិ្ធសភាអាមេរិក ជួយដល់រដ្ឋាភិបាល និងប្រជាជនគេ​ រីឯខែ្មរយើងខ្លះខិតខំទាមទារ និងរុកគួនព្រឹទិ្ធសភាអាមេរិក ឲ្យផ្តាច់ជំនួយទៅវិញ​ នេះបានហៅថា​ ....?»៕