(ភ្នំពេញ)៖ ហាងកាត់សក់បុរស-ស្រ្តី ផាត់មុខ ធ្វើសក់ ម៉ាស្សាមុខ និងកែសម្ផស្សគ្រប់ប្រភេទ មានឈ្មោះថា «Katiya» បានចាប់ផ្ដើមបើកទ្វារទទួលស្វាគមន៍​អតិថិជន ចាប់ពីថ្ងៃនេះតទៅ ជាមួយនឹងទីតាំង​ ដ៏គាប់ប្រសើរបំផុត គឺស្ថិតនៅតាមបណ្ដោយមហាវិថី ព្រះសីហនុ ផ្ទះលេខ១៦D សង្កាត់ទន្លេបាសាក់ ខណ្ឌចំការមន ក្បែរវិមានឯករាជ្យ។ ហាងលក់ផលិតផល និងបម្រើសេវាកម្មសម្ផស្ស «Katiya» បានបើកសម្ពោធជាផ្លូវការ នាយប់ថ្ងៃទី០៩ ខែកញ្ញា ឆ្នាំ២០១៦ នេះ ក្រោមវត្តមានភ្ញៀវកិត្តិយស និងតារាល្បីៗជាច្រើនដួងចូលរួម។

ម្ចាស់ហាងកែសម្ផស្ស «Katiya» អ្នកស្រី កាត្ហីយ៉ា បានឲ្យដឹងថា ដោយយល់ឃើញថា មនុស្សសម័យនេះ​​តែងតែចូលចិត្ត នូវការតុបតែងខ្លួន មិនថាតែយុវវ័យ និងមនុស្ស​ទូទៅនោះទេ គឺចូលចិត្តភាពស្អាត ភាពទាក់ទាញ ទើបអ្នកស្រីសម្រេចបើកហាង កែសម្ផស្ស និងនាំចូលនូវផលិតផល​កែសម្ផស្សល្បីៗ ពីប្រទេសជិតខាងមក បម្រើអតិថិជន នៅពេលនេះ។ អ្វីដែលធ្វើឲ្យអតិថិជនងាយស្រួល និងទទួលបាននូវភាពសប្បាយរីករាយនោះ គឺហាងនេះ មានទីតាំងដ៏ល្អប្រសើរ ងាយស្រួលរក នៅក្បែរវិមានឯករាជ្យ ដោយពីមុនអ្នកស្រីបើកជាហាង លក់សម្លៀកបំពាក់ ប៉ុន្តែត្រូវប្ដូរមកជាហាង សាឡន វិញ ព្រោះយល់ឃើញថា និងមានភាពទាក់ទាញអតិថិជនខ្លាំង។

អ្នកស្រីបន្តថា ជុំវិញសេវាកម្ម​នៅក្នុងហាង «Katiya» គឺមានតម្លៃសមរម្យបំផុត ដែលធ្វើឲ្យអតិថិជន អាចទទួលយកបាន ព្រមជាមួយនឹងផលិតផល នាំចូលមកពីប្រទេស កូរ៉េ ថៃ និងសាំងហ្គាពួរ សុទ្ធសឹងតែមានគុណភាពល្អ មិនធ្វើឲ្យភ្ញៀវខកបំណងឡើយ។ ទោះបីជាហាងកែសម្ផស្ស «Katiya» គឺជាបទពិសោធន៍លើកដំបូង ក្នុងវិស័យកែសម្ផស្សក្ដី ប៉ុន្តែអ្នកស្រីម្ចាស់ហាង មានបង្ហាញពីការរំពឹង​ទៅលើភាពជោគជ័យ យ៉ាងមុតមាំ ព្រោះតែម្ចាស់ហាងរូបនេះ បានមើលឃើញទៅ​ទីផ្សារកែសម្ផស្ស និងការទំនាក់ទំនងការងារ ជាមួយអតិថិជន តាំងពីយូរមកហើយ និងមានភាពទូលំទូលាយបំផុត។

ម្ចាស់ហាងកែសម្ផស្សរូបនេះ បានអះអាងទៀតថា រាល់ផលិតផលទាំងអស់ គឺសុទ្ធសឹងតែនាំចូលផ្ដាច់មុខ ពីប្រទេសជិតខាង ដោយមានដៃគូនាំចូល និងមានទីផ្សារនៅក្រៅប្រទេស ពេញនិយមផងដែរ។ យ៉ាងណាមិញ ចំពោះដើមទុននៅក្នុងការវិនិយោគ បើកជំនួញកែសម្ផស្សនេះ ត្រូវបានម្ចាស់ហាងបង្ហើបឲ្យដឹងថា ចំណាយអស់ប្រមាណ ជាង៣ម៉ឺនដុល្លារ ​ព្រមជាមួយនឹងការពង្រីង សេវាកម្ម​​ផ្សេងជា​ច្រើន​ នៅក្នុងហាងនេះបន្ថែមទៀត៕