(ភ្នំពេញ)៖ ថ្ងៃនេះ គណបក្សសង្គ្រោះជាតិ និង កឹម សុខា ដែលជាជនមានទោស បានសម្រេចចិត្តបែបល្ងង់ខ្លៅនិងតាម បែបព្រៃ ថ្លែងការណ៍បដិសេធសេចក្តីសម្រេច របស់តុលាការដែលបានសម្រេចផ្តន្ទាទោស កឹម សុខា ឱ្យជាប់ពន្ធនាគារ៥ខែ និងពិន័យជាប្រាក់៨សែនរៀល ពីបទ «បដិសេធក្នុងការចូលខ្លួន» លើរឿងក្តីដែលផ្តើមចេញពីរឿងអាស្រូវលោ្មភកាមរបស់ កឹម សុខា ខ្លួនឯង ។
រឿងនេះមិនពិបាកយល់ទេ។ បើ កឹម សុខា មិនប្រព្រឹត្តិរឿងអាស្រូវផ្លូវភេទ និងបរិហារគេ ក៏គ្មានបណ្តឹងដែរ ។ បើគ្មានបណ្តឹង ក៏តុលាការគ្មានមូលដ្ឋានអង្គហេតុនិងអង្គច្បាប់លើកយកករណីតាមពាក្យប្តឹងយកទៅជំនុំជម្រះដែរ ។ បើ កឹម សុខា ចូលខ្លួនបំភ្លឺតាមផ្លូវច្បាប់ ក៏គ្មានការជំនំុជម្រះក្តីនៅថ្ងៃទី៩ កញ្ញា ឆ្នាំ២០១៦នេះដែរ ។
ក្នុងនាមប្រជាជនកម្ពុជា ដែលធ្លាប់រងគ្រោះក្នុងរបបវាលពិឃាត ប៉ុល ពត យើងខ្ញុំសូមទូន្មានលោក កឹម សុខា ថា ភាពឆ្កួត លីលារបស់អ្នកនយោបាយដូច ប៉ុល ពត ដែលមិនឱ្យតម្លៃតុលាការនេះហើយ ដែលធ្វើឱ្យប្រជាជាតិកម្ពុជាឯរងគ្រោះ ។ កុំព្យាយាមយកព្រលឹង ប៉ុល ពត មកសណ្ថិតក្នុងខ្លួនឱ្យសោះ ។ កំុស្រែកតាម ប៉ុល ពត ៖ ជយោ ! ប្រជាធិបតេយ្យ តែមិនទទួលយកតុលាការ ។ បើរឿងក្តីមួយដែលគេប្តឹង ហើយមិនយកទៅជំនុំជម្រះតាមផ្លូវច្បាប់ សួរថា ÷ តើយកត្បូងចប គល់ឬស្សី មកសម្រេចសេចក្តីតាម ប៉ុល ពត ឬយ៉ាងដូចម្តេច?
មកដល់ម៉ោងនេះ គ្មានអ្នកណាម្នាក់ឈឺចាប់ទេ ។ ជីវភាពសង្គម សេដ្ឋកិច្ច និងអ្វីៗគ្រប់យ៉ាង គឺដំណើរការធម្មតា ។ គ្មានការស្លន់ស្លោរ ស្លរឈាមទេ ។ មានតែអ្នកប្រព្រឹត្តល្មើស ហើយចង់រួចខ្លួន និងមិនហ៊ានទទួលខុសត្រូវទេ ដែលស្រែក ជំទាល ដើម្បីបំភ័ន្ត និងបន្លំភាពភ័យខ្លាចរបស់ខ្លួន ។
កម្ពុជា ជាប្រទេសមានច្បាប់ ។ កម្ពុជា គ្មានទោសប្រហារជីវិតទេ ។ តុលាការជាតិមាន៣ថ្នាក់ ។ បើមិនសុខចិត្ត ប្តឹងឧទ្ទរណ៍ទៅ ។ ហើយបើចចេសមិនព្រមយល់អំពីច្បាប់ នៅឱ្យស្ងៀម រង់ចាំសាលក្រមចូលជាស្ថាពរហើយដល់ថ្ងៃនោះ ក៏ចូលគុកតែម្តងទៅ កុំឱ្យពិបាកបន្តបោកប្រាស់សកម្មជនខ្លះ ឱ្យគាត់មកដេកតាមចិញ្ចើមផ្លូវបែបនេះ ។
ប្រភពផ្ទៃក្នុងបក្សសង្គ្រោះជាតិកូតា សម រង្ស៉ី អ្នកណាៗក៏គេធុញនឹង កឹម សុខា ដែលបានកំពុងបំផ្លាញបក្សមួយនេះ ដោយសារតែរឿងអាសោចខ្លួនឯងនេះដែរ។ កន្លងមកសុទ្ធតែគំរាមគេ បើអ្នកណាមិនមកស្នាក់ការកំដរខ្លួន គឺមិនដាក់ បេក្ខភាព ឈរឈ្មោះបោះឆ្នោតទេ ។ ប្រភពផ្ទៃក្នុងបក្សសង្គ្រោះជាតិខ្លះទៀត ក៏កំពុងជ្រិញនឹងអ្នកនាងកូនស្រីរបស់ កឹម សុខា ផងដែរ ដែលបានកកូរបក្សទាំងមូល ដើម្បីការពាររឿងអាស្រូវរបស់ឪឯង ។
អ្នកប្រជាធិបតេយ្យពិតប្រាកដ គ្មានអ្វីត្រូវខ្លាច រហូតមិនហ៊ានទទួលយកសង្គម «នីតិរដ្ឋ» និង «ច្បាប់» នោះទេ។ កឹម សុខា មិនអាចបន្លំមតិប្រជាជន១៥លាននាក់បានទេ ។
សំខាន់និងជាសីលធម៌ គឺកុំបន្តភូតភរសកម្មជនខ្លួនឯងដោយអសីលធម៌ ហើយយកបក្សប្រឆាំងមួយនេះ ដែលជាកេរ្តិ៍ របស់គេ ធ្វើជាស្លឹកចេក បិទបាំងរឿងអាស្រូវខ្លួនឯង !៕
