(សៀមរាប)៖ លោក លឹម សុថាវ អគ្គលេខាធិការគណៈវិស្វករកម្ពុជា នៅថ្ងៃទី០៩ ខែកញ្ញា ឆ្នាំ២០១៦នេះ បានជួបពិភាក្សាការងារ ជាមួយលោក ឃឹម ប៊ុនសុង អភិបាលខេត្តសៀមរាប ដើមី្បរៀបចំបង្កើត ក្រុមប្រឹក្សាគណៈវិស្វករខេត្តសៀមរាប ព្រមទាំងបានអំពាវនាវ ឱ្យក្រុមវិស្វករជាតិ និងអន្តរជាតិ ត្រូវរួសរាន់ទៅចុះបញ្ជីវិស្វករ ទាំងអស់គ្នា ដើម្បីទទួលបានភាពស្របច្បាប់ និងអត្ថប្រយោជន៍ជាច្រើនទៀត។

ក្នុងឱកាសនោះ លោក លឹម សុថាវ បានឲ្យដឹងថា គោលបំណងនៃការបង្កើតក្រុមប្រឹក្សា គណៈវិស្វករកម្ពុជា នៅគ្រប់រាជធានី-ខេត្ត ដើមី្បប្រមូលផ្តុំ និងគ្រប់គ្រងវិស្វករជាតិ និងអន្តរជាតិទាំងអស់ សំដៅជំរុញឱ្យ មានការចុះបញ្ជីត្រឹមត្រូវនៅកម្ពុជា។

លោកបានគូសបញ្ជាក់អំពីផលប្រយោជន៍ នៃការបង្កើតក្រុមប្រឹក្សាគណៈវិស្វករកម្ពុជា ក្នុងខេត្តសៀមរាបនេះ ដើមី្បអនុវត្តកិច្ចអភិវឌ្ឍសង្គម ឲ្យកាន់តែប្រសើរឡើង និងមានភាពស្របច្បាប់ និងដើម្បីរួមចំណែករៀបចំ វិជ្ជាជីវៈវិស្វកម្ម ឲ្យកាន់តែល្អប្រសើរ និងការពារកិត្តិយស សេចក្តីថ្លៃថ្នូរ របស់វិស្វករ ព្រមទាំងរួមចំណែកថែរក្សា លើកស្ទួយអត្តសញ្ញាណជាតិផងដែរ។  

លោកបានបន្តថា នៅពេលវិស្វករគ្រប់មុខជំនាញ បានចុះបញ្ជីហើយ ពួកគេនឹងទទួលបាននូវការបណ្តុះបណ្តាល ពង្រឹងសមត្ថភាព បច្ចេកទេសគ្រប់ជំនាញ និងពង្រីកធនធានមនុស្ស ឲ្យស្របទៅតាម កាលៈទេសៈបច្ចុប្បន្ន និងអនាគត។ ម៉្យាងទៀតក៏ដើម្បីធានានូវការប្រកបវិជ្ជាជីវៈវិស្វកម្ម ឱ្យមានគុណភាព ប្រសិទ្ធភាព សុវត្ថិភាព ស្ថិរភាព និងការទទួលខុសត្រូវខ្ពស់ ព្រមទាំងពង្រឹង និងពង្រីកកិច្ចសហប្រតិបត្តិការ ទំនាក់ទំនងផ្ទៃក្នុងល្អរវាងវិស្វករជាតិ និងអន្តរជាតិ។

កិច្ចប្រជុំក៏បានលើកឡើងពី ការរៀបចំរចនាសម្ព័ន្ធ របស់ក្រុមប្រឹក្សាគណៈវិស្វករកម្ពុជាតាមខេត្ត ព្រមទាំងបានធ្វើការ កំណត់នូវសមាសភាព ក្នុងជួរក្រុមប្រឹក្សាគណៈវិស្វករកម្ពុជាខេត្ត ដោយបានកំណត់ យកមន្ទីរជំនាញ ធ្វើជាប្រធាន និងអនុប្រធាន ក្នុងនោះក៏មានអភិបាលខេត្ត ជាប្រធានកិត្តិយសផងដែរ។

ជាមួយគ្នានេះ លោក ឃឹម ប៊ុនសុង បានឯកភាព ទៅតាមគោលការណ៍ និងសេចក្តីណែនាំរបស់គណៈវិស្វករកម្ពុជា ដោយលោកបានលើកឡើងពី ការរៀបចំក្រុមប្រឹក្សាគណៈវិស្វករកម្ពុជា ក្នុងខេត្តសៀមរាប ក្នុងការចងក្រងរៀបចំ ឲ្យបានត្រឹមត្រូវទៅតាមបទដ្ឋាន។

លោកអភិបាល ក៏បានធ្វើការណែនាំ ដល់ក្រុមការងារថ្នាក់ខេត្ត ត្រូវជម្រុញ និងផ្សព្វផ្សាយដល់ក្រុមវិស្វករជាតិ-អន្តរជាតិ ដែលកំពុងធ្វើអាជីវកម្មនៅក្នុងខេត្ត ឲ្យមកចូលរួមធ្វើការចុះបញ្ជីឲ្យបានត្រឹមត្រូវ និងស្របច្បាប់ ដើមី្បទទួលស្គាល់គុណភាព របស់វិស្វករកម្ពុជា និងមានគោរម្យងារជាវិស្វករអាជីព ក្នុងគោលដៅអភិវឌ្ឍន៍ធនធានមនុស្ស ឲ្យស្របតាមតម្រូវការសង្គម។ ទាំងនេះ ក៏ដើម្បីឱ្យក្រុមវិស្វករទាំងអស់ ទទួលបានការបណ្តុះបណ្តាលវិជ្ជាជីវៈវិស្វកម្ម ក្នុងការបង្កើននូវចំណេះដឹង និងបច្ចេកទេសរបស់ខ្លួន បានមួយកម្រិតទៀតផង។

សូមជម្រាបថា ប្រទេសកម្ពុជាមានលក្ខណៈសម្បត្តិគ្រប់គ្រាន់ ស្របតាមកិច្ចព្រមព្រៀងរបស់សហគមន៍អាស៊ាន ក្នុងការទទួលស្គាល់គ្នាទៅវិញទៅ ក្រោមការត្រួតពិនិត្យ និងវាយតម្លៃរបស់ គណៈកម្មាធិការចុះបញ្ជីវិស្វករអាស៊ាន៕