(រតនគិរី)៖ ប្រធានសាខាកាំកុងត្រូល ខេត្តរតនគិរី លោក ហេង សាយ បានឲ្យដឹងថា ទោះបីជាទីដាច់ស្រយាលពីទីប្រជុំជន យ៉ាងណាក្តី ក៏មន្រ្តីរបស់លោក បានសហការជាមួយមន្រ្តីមន្ទីរពាណិជ្ជកម្ម និងគណៈកម្មការផ្សារ អាជ្ញាធរដែនដី បានចុះត្រួតពិនិត្យចំណីអាហារផលិតផល កំប៉ុង និងគ្រឿងសមុទ្រ ដែលដាក់លក់នៅក្នុងផ្សារក្នុងខេត្ត។

ជាក់ស្តែង នៅព្រឹកថ្ងៃទី០៨ ខែកញ្ញា ឆ្នាំ២០១៦នេះ មន្រ្តីសាខាកាំកុងត្រូលខេត្ត រតនគិរី បានរួមសហការជាមួយ មន្រ្តីមន្ទីរពាណិជ្ជកម្ម និងគណៈកម្មការផ្សារ អាជ្ញាធរដែនដី បានចុះត្រួតពិនិត្យចំណី​អាហារផលិតផល កំប៉ុង និងគ្រឿងសមុទ្រ ដែលដាក់លក់នៅក្នុងផ្សារបាលុង និងផ្សារកូនមុំ ខេត្តរតនគិរី ហើយបានរកឃើញ ទំនិញខូចគុណភាពជិត២០០គីឡូក្រាម ដកហូតមកទុកដុត​កំទេចចោល។ ជាមួយគ្នានេះ លោកក៏បានធ្វើការណែនាំដល់អ្នក់លក់ និងអ្នកទិញ ត្រូវដឹងពីអត្តសញ្ញាណ ប្រភពអាស័យដ្ឋានរបស់អ្នកដែល យកមកលក់អោយខ្លួន ឬរក្សាទុកនូវវិក្កយ បត្រទូទាត់អោយបានត្រឹមត្រូវជាព័ត៌មាន ដើម្បីបង្ក លក្ខណៈងាយ ស្រួលដល់សមត្ថកិច្ចកាំកុងត្រូល ក្នុងការចុះស្រាវជ្រាវ និងតាមដានបន្ត នឹងមានវិធានការ ទៅតាមផ្លូវច្បាប់ ចំពោះអ្នកលក់ ឬអ្នកចែកចាយផលិតផលទាំងនោះ។

ឆ្លៀតឱកាសនោះដែរ ក្រុមកាងារក៏ បានបិទផ្សាយនូវ រូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ ឲ្យបានយល់ ដឹងអំពីផលវិបាកដែលបណ្តាល​ការបរិភោគអាហារហួស​កាលបរិច្ឆេទប្រើប្រាស់ និងការដាក់លាយបន្ថែមសារធាតុគីមីហាមឃាត់ចូលក្នុងម្ហូបអាហារ។ លោក ហេង សាយ ក៏បានសំណូមពរ ដល់អាជីវករ ទាំងអស់ សូមកុំខឹងមន្រ្តីរបស់លោក ដែលចុះទៅ​ពិនិត្យ និងដកហូតទំនិញខូចគុណភាពទាំងនោះ ព្រោះថាបើមិនដកហូតទេ មិនដឹងថា ប្រជាពលរដ្ឋ ប៉ុន្មាននាក់ ដែលនឹងទទួលទានផលិតផលនេះហើយបណ្តាលអោយខូចសុខភាពនោះឡើយ។
លោកក៏បានអំពាវនាវ ដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណា ដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់៕