(ភ្នំពេញ)៖ លោក នុត ពុធដារ៉ា អភិបាលខណ្ឌដង្កោ និងជាប្រធានកិត្តិយស អនុសាខាកាកបាទក្រហមកម្ពុជា ខណ្ឌដង្កោ  នៅព្រឹកថ្ងៃទី០៨ ខែកញ្ញា ឆ្នាំ២០១៦ បាននាំយកអំណោយ របស់សម្តេចកិត្តិព្រឹទ្ធបណ្ឌិត ទៅចែកជូនប្រជាពលរដ្ឋក្រីក្រ ចាស់ជរា និងជនពិការ ចំនួន ៤២គ្រួសារ ក្នុងសង្កាត់ប្រទះឡាង ខណ្ឌដង្កោ។

 សម្ភារដែលត្រូវប្រគល់ជូនប្រជាពលរដ្ឋក្រីក្រ ចាស់ជរា និងជនពិការ ទាំង ៤២ គ្រួសារ ក្នុងឱកាសនោះ ក្នុងមួយគ្រួសារទទួលបាន អង្ករ៣០គីឡូ មី០១កេស ត្រីខ១០កំប៉ុង ឃីត ០១កញ្ចប់ (មុង១,ភួង១,ក្រមា១,សារុង១) និងថវិកា ៣ម៉ឺនរៀល។ ក្នុងនោះព្រះគ្រូចៅអធិកាវត្តតាំងរនាម ក៏បានឧបត្ថម្ភបន្ថែម នូវគ្រឿងឧបភោគបរិភោគ ០១កញ្ចប់ រួមមាន មី៥កញ្ចប់ ត្រីខ២កំប៉ុង ទឹកស៊ីអ៊ីវ២ដប ទឹកត្រី២ដប និងទឹកក្រូច២កំប៉ុង ផងដែរ។

ក្នុងឱកាសនោះ លោកប្រធានកិត្តិយសអនុសាខា ក៏បានផ្តាំផ្ញើរការសាកសួរសុខទុក្ខ និងការយកចិត្តទុកដាក់ពី សំណាក់សម្តេចតេជោ ហ៊ុន សែន និងសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេចទាំងពីរ តែងគិតគូពីការលំបាក នានារបស់បងប្អូនប្រជាពលរដ្ឋ ទាំងអស់នៅមូលដ្ឋាន ជាពិសេសប្រជាពលរដ្ឋក្រីក្រ ចាស់ជរា ជនពិការ កុមារកំព្រា អ្នកផ្ទុកមេរោគអេដស៍ និងជនងាយរងគ្រោះនានា។

លោកអភិបាល ក៏បានផ្តាំផ្ញើការយកចិត្តទុកដាក់ពី លោក ប៉ា សុជាតិវង្ស អភិបាលរាជធានីភ្នំពេញ និងជាប្រធានសាខាកាកបាទក្រហមកម្ពុជា រាជធានីភ្នំពេញ ដែលតែងបានផ្តាំផ្ញើរ ដល់អាជ្ញាធរមូលដ្ឋាន គ្រប់លំដាប់ថ្នាក់ឲ្យ យកចិត្តទុកដាក់ គិតគូពីប្រជាពលរដ្ឋគ្រប់មជ្ឈដ្ឋាន។

ជាមួយគ្នានេះ លោកអភិបាលក៏បានផ្តាំផ្ញើរ ដល់លោកតាលោកយាយចាស់ជរា និងបងប្អូនជនពិការទាំងអស់ ថែរក្សាសុខភាពឲ្យបានល្អ អនាម័យការរស់នៅ ដើម្បីបន្តមើលការអភិវឌ្ឍ រីកចម្រើនរបស់ប្រទេសជាតិ យើងក្រោមការដឹកនាំប្រកប ដោយគតិបណ្ឌិតរបស់ សម្តេចតេជោ ហ៊ុន សែន៕