(ព្រះសីហនុ)៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់ប្រាក់អង្គភាព Fresh News ថានៅព្រឹកថ្ងៃទី០៨ ខែកញ្ញានេះ អាកាសធាតុនៅខេត្តព្រសីហនុ ផ្ទៃមេឃមានសភាពអួរអាប់ ខ្យល់បក់ជាមធ្យម និងទឹករលកយោលយោគតិចៗ សូមបងប្អូនភ្ញៀវទេសចរនៅតាមតំបន់ឆ្នេរប្រុងប្រយ័ត្ន។

លោកឧត្តមសេនីយ៍បញ្ជាក់ថា «ព្រឹកថ្ងៃទី០៨ ខែ​កញ្ញា ឆ្នាំ២០១៦​នេះ អាកាសធាតុលើផ្ទៃសមុទ្រ​ ផ្ទៃមេឃអាប់អួរ ខ្យល់បក់មធ្យម និងទឹករលកយោលតិចតួចៗ នៅចន្លោះឃ្លង។ នៅតាមឆ្នេរ បែរទៅលំហរសមុទ្រពិសេស ឆ្នេរអូឈើទាលខ្យល់បក់ និងទឹករលកយោលបង្គួរ»។

សូមជម្រាបថា ក្រសួងធនធានទឹក និងឧតុនិយមបានចេញសេចក្តីប្រកាស ព្យាករណ៍អាកាសធាតុនៅកម្ពុជា ចាប់ពីថ្ងៃទី០៦-១២ ខែកញ្ញា ឆ្នាំ២០១៦ ដោយបញ្ជាក់ថា របាយទឹកភ្លៀងនឹងបន្តធ្លាក់រាយប៉ាយ ពីមធ្យមទៅច្រើនក្នុងក្របខ័ណ្ឌទូទាំងប្រទេស ខណៈតំបន់មាត់សមុទ្រវ ភ្លៀងនឹងចាប់ផ្តើមធ្លាក់ជាមួយនឹង បរិមាណកើនឡើង ជាបន្តបន្ទាប់ពិសេស ខេត្តកោះកុង និងខេត្តព្រះសីហនុ។

សូមប្រុងប្រយ័ត្ន៖ តំបន់ឆ្នេរ និងលើផ្ទៃសមុទ្រ មានខ្យល់បក់បោកខ្លាំង រលកសមុទ្រមានកំពស់ខ្ពស់ៗ ចាប់ពីថ្ងៃទី០៩-១២ ខែកញ្ញា ឆ្នាំ២០១៦៕