(ភ្នំពេញ)៖ លោកស្រី មួរ សុខហួរ បានប្រកាស​ថា បាន​យកញត្តិ​មក​ដាក់ជូន​​​​ស្ថានទូតបានជោគ​ជ័យ ពោល​គឺគ្មាន​សមត្ថកិច្ច​ណាម្នាក់​ចេញ​មក​រារាំង​នោះទេ ប៉ុន្តែគេឃើញ​មានសមត្ថកិច្ចមួយចំនួន​មក​​ជួយសម្រួលថែម​ទៀត​​ ផ្ទុយពីនេះ​ផែនការ​ហែរញត្តិ​របស់លោក កឹម សុខា បានបរាជ័យទាំងស្រុង​។ ការ​ដាក់ញត្តិ​នេះធ្វើឡើង​ដោយ​ប្រើ​មនុស្ស​ត្រឹម​តែ ៣នាក់គត់ ហើយ​៣នាក់នោះ​ សុទ្ធ​​តែជាមនុស្ស​ជំនិត​​កូតា​របស់លោក​​​ សម រង្ស៊ី តាំងពីនៅគណបក្ស​សមរង្ស៊ី​មកម្ល៉េះ ​គឺមាន​លោក​ស្រី មួរ សុខហួរ, លោក ឡុង​ ប៊ុត្តា និងលោក ហូរ វ៉ាន ដោយគ្មាន​មនុស្ស​​​របស់លោក កឹម សុខា ចូលរួមនោះទេ។

​​គណបក្ស​ប្រឆាំង​មិនមែន ទើប​តែដាក់​ញត្តិ​ជាលើកទីមួយនោះទេ ប៉ុន្តែ​ការ​​ការដាក់​ញត្តិ​មុនៗ គឺ​គ្មានការ​ប្រកូកប្រកាស​កេណ្ឌ​​មនុស្សយ៉ាង​តក់​ក្រហល់​​ដូចលើកនេះ​ទេ ប៉ុន្តែ​លើកនេះ​ខុសពីសព្វមួយដង គឺមន្ត្រី​ជំនិត​របស់​លោក កឹម សុខា បាន​បញ្ជា​ឲ្យ​សកម្មជន​របស់ខ្លួន ​ដើរអំពាវនាវ​​ហៅ​មនុស្ស​តាមខ្នងផ្ទះ​​គ្រប់​ខេត្ត​ក្រុងតែម្តង ឲ្យ​នាំ​គ្នា​ឡើង​មក​ភ្នំពេញ​​​។ ភាពចម្លែកនេះ​ត្រូវ​បាន​គេ​មើលឃើញថា កើតឡើងស្របពេលដែលលោក កឹម សុខា នឹងត្រូវ​សាលាដំបូងរាជធានីភ្នំពេញ​ បើកសវនាការ​ជំនុំជម្រះលើ​​ករណី​ប្រព្រឹត្ត​បទល្មើស​ជាក់​ស្តែង ក្នុង​សុំណុំរឿង​បដិសេធ មិនចូលខ្លួន​បំភ្លឺ​ក្នុង​តុលាការ នៅថ្ងៃទី០៩ ខែកញ្ញា​ខាងមុខ។

តាមមន្ត្រី​ជាន់ខ្ពស់​គណបក្ស​សង្គ្រោះជាតិ​កូតា​​ សម រង្ស៊ី បានបង្ហើប​ឲ្យដឹងថា គំនិតប្រមូលមនុស្សនេះផ្តើម​ចេញ​ពី​លោក កឹម សុខា បន្ទាប់​ពី​មាន​ជំនួប​ជាមួយ​មន្ត្រី​ស្ថានទូតសហរដ្ឋអាមេរិក ក្នុង​គោលបំណង​​​សាក​កម្លាំង​ ស្ទង់​មើល​អ្នកគាំទ្រ​ដែល​សេស​សល់​របស់​ខ្លួន ដើម្បីត្រៀម​បាតុកម្ម​ទាមទារ​ដោះលែង​ខ្លួន​នៅថ្ងៃទី៩។

មន្ត្រីរូបនោះបានបញ្ជាក់ថា ទោះជាត្រូវធ្វើ​ឲ្យ​មនុស្ស​របួស ឬបាត់បង់ជីវិតប៉ុន្មាន​ក៏ដោយ​ក៏​លោក​ កឹម សុខា បញ្ជា​ដាច់ខាត​ គឺ​ត្រូវតែលះបង់​ ធ្វើ​យ៉ាងណា​ឲ្យតែលោក កឹម សុខា រួចផុត​​ពី​ការ​ចាប់ខ្លួន​​​។ ម៉្យាងវិញ​ទៀត ការ​ហែញត្តិ​​ ក៏អាច​ពាក់ព័ន្ធ​នឹងស្ថានទូត​អាមេរិកដែរ​!

ចំណុច​ដែល​បង្ហាញ​ថា សហរដ្ឋអាមេរិកពិតជាអាច​នៅពីក្រោយ​ និងពិតជាដឹងមុននូវគម្រោងបង្ករ​ចលាចល​របស់​គណបក្ស​នោះ គឺស្ថានទូត​អាមេរិកដឹងមុនថា នឹងកើតមានបាតុកម្មហិង្សា​, ដោយស្ថានទូត​អាមេរិក​​បានចេញ​សេចក្តីជូន​ដំណឹងដល់ពលរដ្ឋ​អាមេរិក​​ ឲ្យជៀសឆ្ងាយ​ពី​ទៅស្នាក់ការគណបក្ស​សង្គ្រោះជាតិ​ និងសាលាដំបូងរាជធានីភ្នំពេញ ឬជៀសឲ្យឆ្ងាយ​ពី​ហ្វូង​បាតុកម្ម ដោយបញ្ជាក់មូលហេតុយ៉ាងច្បាស់​ថា បាតុកម្មនេះអាចក្លាយជាបាតុកម្មហិង្សា។ ជាងនេះទៅទៀត​​មន្ត្រី​គណបក្ស​សង្គ្រោះជាតិ​ ដែលជាអ្នក​ដើរកេណ្ឌ​មនុស្ស​បាន​បង្ហោះប្តេជ្ញាថា នឹង​ប្រថុយ និងពលិកម្ម​ ដើម្បី​ការពារ​លោក កឹម សុខា ដែលនេះ​បង្ហាញ​ឲ្យច្បាស់​ថា គណបក្ស​ប្រឆាំង​មួយនេះ ពិតជាមានគោលបំណង​​បង្កើត​ព្រឹត្តិការណ៍​​ហិង្សា បង្កចលាចល​ពិត​ប្រាកដមែន។​

អ្នកវិភាគការវិវត្ត​នយោបាយ​បាន​លើកឡើងថា លក្ខខ័ណ្ឌ​នៃការដាក់ញត្តិ​​មិនទាមទារ​ឲ្យហែរមនុស្ស​មក​ច្រើន​ ភ្លូកទឹកភ្លូកដី ទើបគេ​ទទួលនោះទេ មើលគម្រូមានស្រាប់ លោកស្រី មួរ សុខហួរ យកមកតែ៣នាក់ ក៏គេទទួលដែរ។ លោកបានបន្ថែមថា ការ​កេណ្ឌមនុស្ស​មក​លើកនេះមិនទំនងនោះទេ ដោយធ្វើ​ឡើង​ក្រោម​លេស​​ ការពារ​សិទ្ធិមនុស្ស និងការពារលិទ្ធិប្រជាធិបតេយ្យ ប៉ុន្តែគេ​ជឿជាក់ថា ​ប្រសិន​បើការកេណ្ឌ​របស់ពួកគេបានសម្រេច មានអ្នកចូលរួមច្រើនកុះករ​ដូច​ផែនការពួកគេពិតមែន​ នោះបក្ស​ប្រឆាំងមួយនេះ ​​នឹងបង្វែប្រធានបទទៅជាសុំ​ឲ្យ​ដោះលែងលោក កឹម សុខា វិញ ឬឈាន​ដល់​ការ​ធ្វើ​បដិវត្ត​ពណ៌ ដោយ​ផ្តួលរំលំ​រាជរដ្ឋាភិបាល​ស្របច្បាប់​ និងនាំ​ឲ្យ​សង្គម​មាន​ចលាចល​ទៀត​ផង​​។​

ចំពោះអ្នកច្បាប់​វិញ​បានយល់ថា ​វិធីកេណ្ឌ​មនុស្ស​មកបង្ករ​ចលាចល​នេះ ​ប្រហែលជាវិធី និងជា​សង្ឃឹម​ចុងក្រោយ​ហើយ ​ដែល​អាច​ជួយលោក កឹម សុខា ​ឲ្យរួច​ផុត​ពី​សំណាញ់ច្បាប់បាន​ ព្រោះករណីរបស់លោក កឹម សុខា ត្រូវ​បាន​មន្ត្រីសាលាដំបូងលើកឡើងថា ​មិនមានភាពស្មុគស្មាញ និងមាន​ភស្តុតាងគ្រប់គ្រាន់​ដើម្បី​ជម្រះក្តី​នាពេល​ខាងមុខនេះបាន​។ នេះប្រហែលជាជនល្មើស​រូបនេះ​ពិតជាប្រព្រឹត្តិ​បទល្មើស និងដឹងខ្លួន​ច្បាស់ថាប្រាកដ​ជា​ជាប់​ទោស ទើប​ប្រើស្នៀត​ចុងក្រោយ​ កេណ្ឌ​មនុស្ស​ឲ្យមក​បង្ករ​ចលាចល​ក្នុង​ក្រុងភ្នំពេញ ដើម្បី​​ជាការដាក់គំនាប​​ទៅ​លើរាជរដ្ឋាភិបាលជាក់ជាមិនខាន​។​

ទឡ្ហីករណ៍​ខាងលើ និងតាមរយៈ​ការយកញត្តិ​ទៅដាក់​របស់​មន្ត្រី​ ៣នាក់​ខាងកូតា សម រង្ស៊ី គឺបញ្ជាក់បាន​ថា គណបក្ស​ប្រឆាំង​មកដល់ម៉ោងនេះ មានការ​បែកចែកកម្លាំង​ជាពីរ​នៅខាងក្នុង ដោយមាន​កម្លាំង​លោក កឹម សុខា និងកម្លាំង​លោក សម រង្ស៊ី។ លោក កឹម សុខា និងមនុស្សជំនិតរបស់ខ្លួនដែលជាសមាជិកគណបក្ស​សិទ្ធិមនុស្ស​ ចង់កេណ្ឌ​មនុស្ស​ ចង់ប្រើ​កម្លាំង​មនុស្ស​ដើម្បី បង្ករចលាចល​ ​ដោយប្រើប្រាស់ជីវិត​របស់​សកម្មជន​របស់ខ្លួនធ្វើ​ជា​​ឧបករណ៍ដើម្បី​ជាឈ្នាន់​ក្នុង​ការទាមទារ​​ឲ្យដោះលែងលោកកឹម សុខា​។ ​​

សកម្មជនគណបក្ស​សង្គ្រោះជាតិនាពេលនេះ បើ​ហ៊ានប្រថុយ​នាំគ្នា​មក​ប្រឆាំង​ការអនុវត្ត​ច្បាប់​របស់​សមត្ថកិច្ច​ អាចនឹង​ប្រឈម​​​ចំពោះ​មុខច្បាប់​ ឬមានគ្រោះថ្នាក់​ដល់​ជីវិត​ផង​ក៏ថាបាន។​ គេបាន​ដឹងថាមនុស្ស​ប្រហែលជា ១៥នាក់ តែងតែអង្គុយប្រចាំការ​នៅមុខទីស្នាក់ការបក្សសង្គ្រោះជាតិនោះ គឺជាសកម្មជនគណបក្ស​សិទ្ធិមនុស្ស​ មិនមានសកម្មជនគណបក្សសមរង្ស៊ីនោះទេ។

រីឯកម្លាំង​ម្ខាងទៀត​គឺជាមនុស្សជំនិត​របស់​លោក សម រង្ស៊ី ដែលជាសមាជិកគណបក្ស​សមរង្ស៊ី។ ក្រុមនេះ​មិនសូវ​ខ្វាយខ្វល់ និងគាំទ្រ​​ទង្វើ និង​គំនិត​លោក កឹម សុខា នោះទេ។ ក្រុមនេះ​មិនគាំទ្រ​ការកេណ្ឌ​កម្លាំង​ឲ្យ​មក​គាំទ្រលោក កឹម សុខា នោះទេ ព្រោះគេគិត​ដល់ផលប្រយោជន ​មេរបស់ពួកគេដែលកំពុងគេចខ្លួន នៅក្រៅប្រទេសជាធំ។

​ជាក់ស្តែង​តំណាងរាស្ត្រ​ដែលគាំទ្រ​លោក កឹម សុខា ខិតខំប្រឹងប្រែង​ ក្រាញ់ននាល​មិនព្រម​យក​ញត្តិ​ទៅដាក់​ជូនស្ថានទូតនោះទេ ដោយរង់ចាំ​ឲ្យ​មាន​ការចូលរួមពី​សកម្មជន​ខេត្តក្រុង​ដែលខ្លួនបាន​ប្រមូលនោះ រីឯ​តំណាងរាស្ត្រ​ដែលគាំទ្រលោក សម រង្ស៊ី ដែលមានដូចជា លោកស្រី មួរ សុខហួរ លោក ឡុង ប៊ុត្តា និងលោក ហូរ​ វ៉ាន់ បាន​យកញត្តិ​នោះ​ទៅដាក់​យ៉ាងជោគជ័យ ដែលទង្វើនេះ​ប្រៀបដូចជា បំបាក់​ផែនការកេណ្ឌ​មនុស្ស​របស់​លោក កឹម​ សុខា ដែលធ្វ​ឲ្យគម្រោងការរបស់ បុគ្គលរូបនេះបរាជ័យ។ ដូច្នេះ​ក្នុងផែនការហែញត្តិ​នេះ គឺជា​ជោគជ័យ​របស់ មួរ សុខហួរ និង​ជាការ​បរាជ័យ​របស់ កឹម សុខា ឬជាសុភមង្គលរបស់​លោកស្រី មួរ សុខហួរ កូតារបស់ សម រង្ស៊ី ប៉ុន្តែជាអព​មង្គលរបស់​លោក កឹម សុខា ដែលកំពុង​ប្រឈម​នឹងការជាប់គុក៕​

អត្តបទដោយ៖ បាន វិភាគ