(ភ្នំពេញ)៖ សម្ដេចតេជោ ហ៊ុន សែន ប្រធានព្រឹទ្ធសភា បានរំលឹកពីរឿងអតីតកាលថា កាលពី៥៤ឆ្នាំមុន សម្ដេចក្នុងភាពជាយុវវ័យបានចូលព្រៃតស៊ូតាមការអំពាវនាវរបស់សម្ដេចព្រះនរោត្តម សីហនុ «ព្រះបរមរតនកោដ្ឋ» មកដល់វ័យ៣២ឆ្នាំ សម្ដេចបានក្លាយជានាយករដ្ឋមន្ត្រី ហើយមកដល់វ័យ៧២ឆ្នាំនេះក៏បានក្លាយជាប្រធានព្រឹទ្ធសភា ពោលគឺមានលេខ២នៅខាងចុងដូចគ្នា ដែលជារឿងគាប់ជូនមួយ។

ការរំលឹករឿងអតីតកាលនេះដែរ គឺក្នុងឱកាសព្រឹទ្ធសភាបើកសម័យប្រជុំលើកដំបូង សម្រាប់នីតិកាលទី៥ ក្រោមព្រះរាជាធិបតី​ភាពដ៏ខ្ពង់ខ្ពស់បំផុតរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ​នៃព្រះរាជាណាចក្រកម្ពុជា នាព្រឹកថ្ងៃទី៣ ខែមេសា ឆ្នាំ២០២៤។

នាឱកាសនោះ សម្ដេចតេជោបានផ្ដាំផ្ញើដល់ថ្នាក់ដឹកនាំ សមាជិក សមាជិកាព្រឹទ្ធសភាទាំងឡាយ សូមថែរក្សាសុខភាពឱ្យបានផុតនីតិកាលដែលនឹងចូលមកដល់នៅឆ្នាំ២០៣០ ខណៈសម្ដេចតេជោផ្ទាល់នៅឆ្នាំ២០៣០នោះនឹងឈានចូលដល់វ័យ៧៨ឆ្នាំ។

សម្ដេចតេជោ ហ៊ុន សែន បានបន្តថា «វាជាការគាប់ជូនដែរ ថ្ងៃនេះ៥៤ឆ្នាំមុន ខ្ញុំកំពុងត្រៀមរៀបចំលួចលាក់ខោអាវចូលទៅព្រៃម៉ាក់គី តាមការអំពាវនាវរបស់សម្ដេចព្រះនរោត្តម សីហនុ ព្រះបរមរតនកោដ្ឋ ហើយនៅពេលដែលខ្ញុំចូលកាន់តំណែងជានាយករដ្ឋមន្ត្រីក្នុងវ័យ៣២ឆ្នាំ ថ្ងៃនេះចូលកាន់តំណែងជាប្រធានព្រឹទ្ធសភាក្នុងវ័យ៧២ឆ្នាំ អ៉ីចឹងចន្លោះ៤០ឆ្នាំ គាប់ជូនលេខ២នៅខាងចុងដូចគ្នា»

គួរជម្រាបថា កាលពី៥៤ឆ្នាំមុនដែលសម្ដេចតេជោសម្រេចចិត្តចូលរួមចលនាតស៊ូព្រៃម៉ាក់គីនោះ គឺកើតឡើងក្រោយការធ្វើរដ្ឋប្រហារទម្លាក់សម្ដេចព្រះនរោត្តម សីហនុ ព្រះប្រមុខសង្គមរាស្ត្រនិយម ពីសំណាក់ក្រុមរបបសាធារណរដ្ឋខ្មែរដែលមានពួក CIA អាមេរិកនៅពីក្រោយខ្នង ដើម្បីតស៊ូទាមទារកិត្តិយសថ្វាយព្រះនរោត្តម សីហនុ វិញ។ ប៉ុន្តែក្រោយពីទទួលជ័យជម្នះលើរបបសាធារណរដ្ឋខ្មែរ ខ្មែរក្រហមក៏ប្រែជាកាប់សម្លាប់ប្រជាពលរដ្ឋខ្មែរគ្នាឯងរាប់លាននាក់ ដែលជាហេតុនាំឱ្យសម្ដេចតេជោ ហ៊ុន សែន និងក្រុមសមមិត្តនាពេលនោះ សម្រេចចិត្តរត់ទៅពឹងជំនួយពីប្រទេសវៀតណាម ដើម្បីវិលមកច្បាំងរំដោះប្រជាពលរដ្ឋខ្មែរពីរបបដ៏ខ្មៅងងឹតនោះ។

ជ័យជម្នះលើពួកខ្មែរក្រហម ត្រូវបានប្រកាសជាផ្លូវការនៅថ្ងៃទី៧ ខែមករា ឆ្នាំ១៩៧៩ ហើយសម្ដេចតេជោ ហ៊ុន សែន ក៏បានក្លាយជារដ្ឋមន្ត្រីការបរទេស។ រហូតដល់ឆ្នាំ១៩៨៤ សម្ដេចតេជោក៏បានឡើងកាន់តំណែងជានាយករដ្ឋមន្ត្រី បន្តរហូតដល់ឆ្នាំ២០២៣ ពោលគឺតាំងពីរបបសាធារណរដ្ឋប្រជាមានិតកម្ពុជា របបរដ្ឋកម្ពុជា និងរបបរាជានិយមអាស្រ័យរដ្ឋធម្មនុញ្ញ ឬព្រះរាជាណាចក្រទី២នេះ។

ចាប់ពីឆ្នាំ២០២៤នេះរហូតដល់ឆ្នាំ២០២៩ សម្ដេចតេជោ ហ៊ុន សែន នៅកាន់តំណែងជាប្រធានព្រឹទ្ធសភា៕