(កណ្តាល)៖ ជនសង្ស័យម្នាក់ ត្រូវម្ចាស់ចំការស្វាយចាប់បាន និងម្នាក់ទៀតរត់គេចខ្លួនបាត់ ក្រោយពេលជិះម៉ូតូមួយគ្រឿងទៅលួចផ្លែស្វាយ ហើយត្រូវម្ចាស់គេតាមទាន់ចាប់ប្រគល់ទៅឲ្យសមត្ថកិច្ច នាម៉ោង២៖៣០នាទីរសៀល ថ្ងៃទី០៥ ខែកញ្ញា ឆ្នាំ២០១៦នេះ ស្ថិតនៅចំណុចភូមិអន្លង់ ឃុំព្រែកតាម៉ាក់ ស្រុកខ្សាច់កណ្តាល ខេត្តកណ្តាល។
មន្ដ្រីនគរបាលមូលដ្ឋានបានឲ្យដឹងថា ម្ចាស់ចំការស្វាយ ឈ្មោះ ឈឿន សារ៉ុម អាយុ៣៦ឆ្នាំ រីឯជនសង្ស័យដែលឃាត់ខ្លួនបានឈ្មោះ មាស ពិសី អាយុ២១ឆ្នាំ និងម្នាក់ទៀត កំពុងរត់គេចខ្លួនឈ្មោះ មាស ម៉ង់ អាយុ៤០ឆ្នាំ។
បើតាមមន្ដ្រីនគរបាល កន្លងមកជនសង្ស័យធ្លាប់នាំគ្នា ទៅលួចផ្លែស្វាយរបស់ជនរងគ្រោះម្តងមកហើយ យកទៅលក់នៅផ្សារ នៅភ្នំពេញលុះដល់ថ្ងៃកើតហេតុ ជនសង្ស័យបាននាំគ្នាមក លួចផ្លែស្វាយជនរងគ្រោះម្តងទៀត ខណៈកំពុងបេះច្រកបាវ ស្រាប់តែម្ចាស់គេមកឃាត់ខ្លួនប្រគល់ឲ្យសមត្ថកិច្ចតែម្ដង។
បច្ចុប្បន្នជនសង្ស័យ ត្រូវបានសមត្ថកិច្ចនាំខ្លួនទៅអធិការដ្ឋាននគរបាលស្រុក ដើម្បីសួរនាំនឹងចាត់ការបន្ដ៕
