(ព្រៃវែង)៖ ក្នុងនាមក្រសួងមហាផ្ទៃ និងក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី បានចូលរួមរំលែកទុក្ខលំបាកប្រកបដោយក្ដីសោកស្ដាយជាពន់ពេក ជាមួយប្រជាពលរដ្ឋ ដែលរងគ្រោះដោយឧប្បទ្ទវហេតុគ្រោះអគ្គិភ័យ នៅក្នុងស្រុកស្វាយអន្ទរ ខេត្តព្រៃវែង កាលពីវេលាម៉ោង៧៖២០យប់ ថ្ងៃទី១៧ ខែមីនា ឆ្នាំ២០២៤។

ឧបនាយករដ្ឋមន្ដ្រី ស សុខា បានគូសបញ្ជាក់ថា ទីតាំងកើតមានគ្រោះអគ្គិភ័យនោះ ជាផ្ទះប្រជាពលរដ្ឋ ២ល្វែង ដែលមានស្តុកលក់គ្រឿងម៉ាស៊ីន និងប្រេងម៉ាស៊ីន។ ក្នុងគ្រានោះ ផ្ទះត្រូវបានម្ចាស់ចាក់សោពីរជាន់ គឺសោខាងមុខជាប់សំយាបផ្ទះ និងសោចូលទៅក្នុងផ្ទះ។ ដោយឃើញស្ថានភាពស្មុគស្មាញ និងភ្លើងឆេះមានហានិភ័យធ្ងន់ធ្ងរ លោកឧត្តមសេនីយ៍ទោ ឈឿន ប៊ុនឆន ស្នងការ នៃស្នងដ្ឋាននគរបាលខេត្តព្រៃវែង បានបញ្ជាឲ្យអធិការដ្ឋានក្រុង និងស្រុកផ្សេងទៀត បញ្ចេញរថយន្តពន្លត់អគ្គិភ័យ មកគាំទ្របន្ថែម។

ក្នុងអំឡុងពេលដែលសមត្ថកិច្ច កំពុងធ្វើប្រតិបត្តិការនោះ មានបងប្អូនប្រជាពលរដ្ឋ បានចោមរោមយ៉ាងច្រើន ហើយក្នុងនោះក៏មានប្រជាពលរដ្ឋដែលមានផ្ទះក្បែរទីតាំងកើតហេតុ (ទំនងមានការព្រួយបារម្ភ និងភិតភ័យខ្លាំង) បានព្យាយាមជ្រៀតខ្លួនចូលក្នុងចំណោមកម្លាំងសមត្ថកិច្ច ដើម្បីប៉ុនប៉ងអូសទាញកម្លាំង បង្វែរទុយោទឹក ឱ្យបាញ់ទៅលើផ្ទះរបស់ខ្លួន រហូតមានពលរដ្ឋខ្លះ បានដណ្ដើមទុយោទឹក និងប្រើពាក្យសម្ដីមិនសមរម្យទៅលើសមត្ថកិច្ចទៀតផង។ សមត្ថកិច្ចសុខចិត្តទទួលស្ដាប់ពាក្យសម្ដីមិនសមរម្យ និងបានចាប់ពលរដ្ឋដែលចូលមករំខាននោះ ចេញពីទីតាំងប្រតិបត្តិការ។

ក្នុងស្ថានភាពនោះដែរ លោក សួន សុម៉ាលីន អភិបាលខេត្តព្រៃវែង ក៏បានបញ្ជាឲ្យអគ្គិសនីខេត្ត បិទចរន្តអគ្គិសនី ដែលអូសកាត់ពីលើខាងមុខផ្ទះជនរងគ្រោះ ដើម្បីទុកលទ្ធភាពឲ្យកម្លាំង ធ្វើប្រតិបត្តិការកាន់តែងាយស្រួល។ ក៏ប៉ុន្តែដោយសាផ្ទះជនរងគ្រោះមានប្លង់សេនៅដំបូល និងថែមទាំងមានការផ្ទុះខ្លាំង (សមត្ថកិច្ចសន្និដ្ឋានថាជាការផ្ទុះធុងប្រេង) ជាបន្តបន្ទាប់នៅខាងក្នុងផង សមត្ថកិច្ចបានសម្រេចប្រើរថយន្តអគ្គិភ័យបុកទំលុះទ្វារខាងមុខ ដើម្បីឲ្យក្រុមពន្លត់ បានចល័តទុយោទឹក កាន់តែកៀកទីតាំងមានការឆេះខ្លាំង។ បន្ទាប់ពីគ្រឿងចក្រធុនធ្ងន់ បានមកដល់ សមត្ថកិច្ច ក៏បញ្ជាឲ្យបុក និងកាយទម្លុះទ្វារចូលខាងក្នុងផ្ទះ។

ទីបំផុតសមត្ថកិច្ច ក៏មានលទ្ធភាពចល័តទុយោទឹកចូលទៅដល់គោលដៅដែលមានការឆេះខ្លាំង រហូតឈានទៅគ្រប់គ្រងអគ្គិភ័យបានទាំងស្រុង ហើយភ្លើងក៏មិនអាចឆេះរាលដាល បង្កជាមហន្តរាយធ្ងន់ធ្ងរជាងនេះ។ ក្នុងប្រតិបត្តិការនេះ សមត្ថកិច្ច បានប្រើរថយន្តពន្លត់អគ្គិភ័យចំនួន១៣គ្រឿង ក្នុងនោះខេត្តព្រៃវែង ចំនួន១០គ្រឿង និងមានការគាំទ្រពីខេត្តត្បូងឃ្មុំ ចំនួន៣គ្រឿងបន្ថែម ខណៈកម្លាំងពីរនាក់ បានរងបួសដោយសារការបាក់ប្លង់សេ និងម្នាក់ទៀត បានរងគ្រោះដោយសារការពុលផ្សែងឆេះប្រេង និងគ្រឿងជ័រ។

ផ្អែកលើរបាយការណ៍របស់លោកឧត្តមសេនីយ៍ទោស្នងការខេត្តព្រៃវែង ការសម្រេចចិត្តផ្ដោតលើគោលដៅកំពុងឆេះខ្លាំង ដែលធ្វើឲ្យពលរដ្ឋខ្លះមិនសប្បាយចិត្តនាពេលនោះ គឺដោយសារជំនាញបានសន្និដ្ឋានច្បាស់ថា ប្រសិនបើមិនពន្លត់ភ្លើងនៅផ្ទះ ២ល្វែង បានទាន់ពេលទេ ជញ្ជាំងសងខាងនឹងត្រូវប្រេះបាក់បណ្ដាលឲ្យភ្លើងបន្តចេះរាលដាលបន្ថែម ទៅផ្ទះជាប់នោះមិនខានឡើយ។ ម្យ៉ាងផ្ទះក្បែរនោះ ក៏មានគ្រឿងឈើ បរិក្ខារពេទ្យ និងផ្ទះប្ដូរប្រាក់ទៀតផង។

ក្នុងន័យនេះ ឧបនាយករដ្ឋមន្ដ្រី ស សុខា សូមថ្លែងអំណរគុណ និងកោតសរសើរចំពោះរដ្ឋបាលខេត្តព្រៃវែង ស្នងការដ្ឋាននគរបាលខេត្ត អាជ្ញាធរ និងកងកម្លាំងចម្រុះ ជាពិសេសកម្លាំងពន្លត់អគ្គិភ័យ ដែលបានប្រតិបត្តិការសង្គ្រោះ និងពន្លត់ប្រកបដោយវិជ្ជាជីវៈ និងការលះបង់ខ្ពស់។ «ស៊ូស្លាប់បាកុំឲ្យស្លាប់មេ ស៊ូលិចទូកកណ្ដាលទន្លេកុំឲ្យភ្លើងឆេះផ្ទះ» យើងក៏យល់ច្បាស់នូវអារម្មណ៍ភ័យព្រួយខ្លាំងរបស់ប្រជាពលរដ្ឋដូចគ្នាដែរ។

យ៉ាងណាក៏ដោយ សូមប្រជាពលរដ្ឋទុកលទ្ធភាពនេះ ជូនសមត្ថកិច្ចធ្វើការបានពេញដៃពេញជើង ពីព្រោះមានតែសមត្ថកិច្ចជំនាញទេដែលមានបទពិសោធន៍ និងមានការសន្និដ្ឋានបែបបច្ចេកទេស ចំពោះសភាពការណ៍ជាក់ស្ដែង ជាពិសេសគោលដៅអាទិភាពត្រូវបាញ់ទឹកពន្លត់បន្ទាន់ និងគោលដៅបន្ទាប់ត្រូវការពារជាដើម។ ការធ្វើបុរេវិនិច្ឆ័យបែបអវិជ្ជមានផ្សេងៗ រហូតឈានដល់ការប្រើពាក្យសម្ដីមិនសមរម្យលើសមត្ថកិច្ច ឬអាជ្ញាធរ និងការចូលទៅរំខានផ្សេងៗ ក៏មិនគួរកើតមានឡើយ ក្នុងពេលដែលពួកគាត់កំពុងយកជីវិតទៅប្ដូរដើម្បីពួកយើង។

ឆ្លៀតក្នុងឱកាសនេះ លោក ស សុខា សូមអំពាវនាវដល់ជនរួមជាតិទូទាំងប្រទេស សូមមានស្មារតីប្រុងប្រយត្នខ្ពស់ចំពោះគ្រោះអគ្គិភ័យគ្រប់ទីកន្លែង ទាំងនៅក្នុងផ្ទះ ផ្សារ រោងចក្រ សហគ្រាសអាជីវកម្ម ទីតាំងសាធារណៈផ្សេងៗ ស្រែចំការ និងព្រៃជាដើម ជាពិសេសក្នុងស្ថានភាពដែលប្រទេសយើង កំពុងស្ថិតក្នុងរដូវក្ដៅ។ ជាមួយគ្នានេះ សូមកម្លាំងពន្លត់អគ្គិភ័យទាំងថ្នាក់ជាតិ និងថ្នាក់ក្រោមជាតិ បន្តត្រៀមលក្ខណៈប្រតិបត្តិការផ្ដល់សេវាជួយសង្គ្រោះជូនប្រជាពលរដ្ឋ ឲ្យបានទាន់ពេលវេលា ដើម្បីរួមគ្នាសម្រេចគោលដៅរួម គឺ«ធ្វើអ្វីៗដើម្បីផ្ដល់ភាពកក់ក្ដៅជូនប្រជាពលរដ្ឋ»៕