(កំពង់ស្ពឺ)៖ លោក ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងប្រធានក្រុមការងារគណបក្សប្រជាជនកម្ពុជា ចុះជួយខេត្តកំពង់ស្ពឺ អញ្ជើញជាអធិបតីក្នុងពិធីបុណ្យបញ្ចុះខណ្ឌសីមា និងសម្ពោធសមិទ្ធផលនានា នៅវត្តវិហារខ្ពស់ ដែលស្ថិតនៅសង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ ដែលបានប្រព្រឹត្តទៅនាព្រឹកថ្ងៃទី១៦ ខែមីនា ឆ្នាំ២០២៤។
និមន្ត និងអញ្ជើញចូលរួម ក្នុងពិធីនោះ រួមមាន ព្រះមុនីសត្ថាចារ្យកោសល កែវ ចន្ថា ព្រះមេគណខេត្តកំពង់ស្ពឺ ព្រះថេរានុថេរៈ សមាជិក ព្រឹទ្ធសភា រដ្ឋសភា ក្រុមការងាររាជរដ្ឋាភិបាលចុះជួយមូលដ្ឋានខេត្ត ក្រុង ស្រុក នៃខេត្តកំពង់ស្ពឺ ថ្នាក់ដឹកនាំ និងមន្ត្រីរាជការចំណុះរដ្ឋបាលខេត្តកំពង់ស្ពឺ និងប្រជាពលរដ្ឋជាច្រើនរូប។
ថ្លែងទៅកាន់អង្គពិធីនាឱកាសនោះ លោក ហ៊ុន ម៉ានី បានសម្តែងនូវការកោតសរសើរ និងថ្លែងអំណរព្រះគុណ យ៉ាងជ្រាលជ្រៅចំពោះព្រះគ្រូបសន្នចិត្តោ (ប៉ាក់-សាន់-ណាក់-ចិត-តោ) នុត ហ៊ែល ចៅអធិការ វត្តវិហារខ្ពស់ ព្រះថេរានុត្ថេរៈគ្រប់ព្រះអង្គ និងលោកយាយឧបាសិកា តេង អិត ព្រមទាំងគណៈ កម្មការអាចារ្យវត្តទាំងអស់ សប្បុរជន និងពុទ្ធបរិស័ទ គ្រប់ទិសទីដែលបានខិតខំប្រឹងប្រែង ចូលរួមចំណែកក្នុងការកសាងសមិទ្ធផលទាំងនេះឲ្យលេចចេញជារូបរាងឡើង សម្រាប់បម្រើឲ្យវិស័យព្រះពុទ្ធសាសនា និងទុកជាសក្ការៈសម្រាប់ពុទ្ធបរិស័ទគោរពបូជា។
ឧបនាយករដ្ឋមន្ដ្រី ហ៊ុន ម៉ានី បានគូសបញ្ជាក់ថា សមិទ្ធផលទាំងអស់នេះ បានឆ្លុះបញ្ចាំងឲ្យឃើញកាន់តែច្បាស់អំពីជំនឿដ៏មុតមាំរបស់ ពុទ្ធសាសនិក និងការប្តេជ្ញាចិត្តប្រកបដោយសទ្ធាជ្រះថ្លារបស់ថ្នាក់ដឹកនាំ ក្នុងការខិតខំ ប្រឹងប្រែងលើកកម្ពស់វិស័យព្រះពុទ្ធសាសនាដែលជាសាសនារបស់រដ្ឋ។ ដូច្នេះហើយទើបរាជរដ្ឋាភិបាលកម្ពុជា តែងតែបង្កបរិយាកាសល្អ និងយកចិត្តទុកដាក់លើកកម្ពស់វិស័យព្រះពុទ្ធសាសនា ដោយបានចែងកំណត់ក្នុងរដ្ឋធម្មនុញ្ញ ថាព្រះពុទ្ធសាសនាជាសាសនារបស់រដ្ឋ ព្រមទាំងបានចូលរួម និងជំរុញការកសាងហេដ្ឋារចនា សម្ព័ន្ធរូបវ័ន្តនានាជាច្រើនសម្រាប់បម្រើដល់វិស័យព្រះពុទ្ធសាសនាថែមទៀតផង។
សូមជម្រាបជូនថា វត្តវិហារខ្ពស់នេះ គឺជាវត្តដ៏ចំណាស់មួយក្នុងចំណោមវត្តទាំង២១ ក្នុងក្រុងឧដុង្គម៉ែជ័យ ដែល បានកសាងឡើងក្នុងអំឡុងឆ្នាំ១៨២២ បើគិតមកដល់បច្ចុប្បន្ននេះ មានអាយុកាល២០២ឆ្នាំ មកហើយ។ ព្រះវិហារវត្តវិហារខ្ពស់មាន មានទំហំ ៣១.៣៥ម៉ែត្រ គុណ១៥.៣ម៉ែត្រ មានកម្ពស់ ៣២.៥០ម៉ែត្រ។
ជាមួយគ្នានេះ ក៏មានសមិទ្ធផលថ្មីៗជាច្រើនទៀត ដែលត្រូវសម្ពោធឆ្លងនាព្រឹកនេះផងដែរ ក្នុងនោះ រួមមាន ដងទង់១គូ កម្ពស់ ២៧,៥ម៉ែត្រ, ហោត្រៃ ទំហំ ១៥ម៉ែត្រ គុណ៩ម៉ែត្រ កម្ពស់ ១២ម៉ែត្រ, កុដិ ២ខ្នង, ក្លោងទ្វារ ដែលមានទទឹង ៥ម៉ែត្រ កម្ពស់ ៨ម៉ែត្រ និងហេដ្ឋារចនាសម្ព័ន្ធដទៃទៀត ដែលគិត ជាទឹកប្រាក់សរុបអស់ប្រមាណជាង ៥៦០,០០០ដុល្លារអាមេរិក៕
