(ភ្នំពេញ)៖ លោកឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ អញ្ជើញដឹកនាំសិក្ខាកាមយោធាកម្ពុជា ដែលមានសមាសភាពមកពីអង្គភាពយោធភូមិភាគទី៤ និងយោធភូមិភាគទី៥ សរុបចំនួន១០រូប ចូលរួមវគ្គបណ្តុះបណ្តាលជួយសង្គ្រោះគ្រោះមហន្តរាយ នៅមជ្ឈមណ្ឌលសង្គ្រោះគ្រោះមហន្តរាយ ខេត្តឆាក់ឆឺងសៅ ប្រទេសថៃ។
វគ្គបណ្តុះបណ្តាលនេះចាប់ពីថ្ងៃទី១០-១៥ ខែមីនា ឆ្នាំ២០២៤ ដែលជាថ្ងៃបិទវគ្គផងដែរ ដើម្បីក្នុងគោលបំណងផ្តល់នូវបទពិសោធន៍ បច្ចេកទេស លក្ខណៈស្តង់ដា និងបែបវិទ្យាសាស្រ្ត រួមជាមួយការរឹតចំណងសម្ព័ន្ធមេត្រីភាព សាមគ្គីភាព រវាងកងទ័ពភូមិន្ទថៃ និងកម្ពុជា ពង្រឹងសមត្ថភាព ការងារជួយសង្គ្រោះគ្រោះមហន្តរាយ សម្រាប់ប្រជាជន នៃប្រទេសទាំងពីតាមបន្ទាត់ព្រំដែន។
ក្នុងឱកាសនោះ លោកឧត្តមសេនីយ៍ត្រី សឹង្ហ ទុំ បានបញ្ជាក់ថា ដោយបានការអនុញាតិពីនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង មេបញ្ជាការកងទ័ពជើងគោក និងមេបញ្ជាការយោធភូមិភាគទី៥ ឲ្យសិក្ខាកាមកម្ពុជា មកហ្វឹកហាត់បណ្តុះបណ្តាល ការងារជួយសង្គ្រោះគ្រោះមហន្តរាយនេះ គឺបានផ្តល់នូវបទពិសោធន៍ថ្មីៗ បច្ចេកទេស ស្តង់ដា និងបែបវិទ្យាសាស្រ្ត ដើម្បីជាគុណប្រយោជន៍ក្នុងការជួយសង្គ្រោះអាយុជីវិតមនុស្សឲ្យបានលឿនរហ័ស ទាន់ពេលវេលា និងសុវត្ថិភាព៕
