(ក្រចេះ)៖ ក្នុងវេទិកាផ្សព្វផ្សាយនៅស្រុកឆ្លូង ខេត្តក្រចេះ នាថ្ងៃទី១៥ ខែមីនា ឆ្នាំ២០២៤ មន្រ្តីក្រសួងកិច្ចការនារី អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងអាជ្ញាធរខេត្ត សុទ្ធតែបានទទួលស្គាល់ថា ការចូលរួមរបស់អ្នកម្តាយ បងស្រី ជាតួអង្គសំខាន់អាចជួយបង្ការទប់ស្កាត់បានការប្រើប្រាស់ និងចែកចាយគ្រឿងញៀននៅសហគមន៍។
លោកស្រី គង់ លឹមហូ អភិបាលស្រុកឆ្លូង បានស្វាគមន៍ និងរាយការណ៍ជូនពីកិច្ចខិតខំនិងបញ្ហាប្រឈមនានាក្នុងការចូលរួមអនុវត្តនូវគោលនយោបាយភូមិ ឃុំ មានសុវត្ថិភាព និងយុទ្ធនាការប្រយុទ្ធប្រឆាំងគ្រឿងញៀន របស់រាជរដ្ឋាភិបាលសំដៅថែរក្សាសន្តិសុខ សណ្តាប់ធ្នាប់ ជូនប្រជាពលរដ្ឋនៅមូលដ្ឋានស្រុកឆ្លូង។
លោកវរសេនីយ៍ឯក ស៊ាង សុភ័ក្រ ស្នងការរងទទួលការងារគ្រឿងញៀន ខេត្តក្រចេះ បានសូមឱ្យគ្រប់អ្នកពាក់ព័ន្ធបន្តរួមគ្នាប្រយុទ្ធប្រឆាំងគ្រឿងញៀន និងបន្តដោះស្រាយបញ្ហាប្រឈម កង្វល់ជូនប្រជាពលរដ្ឋ។
ថ្លែងក្នុងនាមនាយឧត្តមសេនីយ៍ មាស វិរិទ្ធ អគ្គលេខាធិការក្នុងវេទិកាផ្សព្វផ្សាយនោះ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀនបានអំណរគុណ សាទរដល់គ្រប់សមាសភាពនៅមូលដ្ឋានស្រុកឆ្លូង ដែលបានរួមគ្នាអនុវត្តន៍តាមបទបញ្ជា លិខិតបទដ្ឋាននានាសំដៅបន្តថែរក្សាបាននូវសន្តិសុខ សណ្តាប់ធ្នាប់ជូនប្រជាពលរដ្ឋរស់នៅបានសុខសាន្ត និងការអភិវឌ្ឍ។
ក្នុងវេទិកានោះដែរ ឧត្តមសេនីយ៍ឯក លឹម តុងហួត បានស្នើសុំឱ្យអ្នកពាក់ព័ន្ធទាំងអស់ត្រូវតែបន្តចលនាឱ្យបានផុលផុសឱ្យមានការចូលរួមឱ្យកាន់តែសកម្មបន្ថែមទៀតក្នុងបង្កាទប់ស្កាត់បញ្ហាគ្រឿងញៀន ក្នុងសហគមន៍ពិសេសការចូលរួមរាយការណ៍ពីករណីសង្ស័យជាករណីគ្រឿងញៀនពីប្រជាពលរដ្ឋទូទៅក្នុងនោះគោលដៅសហការសំខាន់ គឺក្រុមគ្រួសារមាន៖ ម្តាយ បងស្រីដែលពួកគាត់ជាជនដែលមានឥទ្ធិពល សំដីទូន្មានរបស់គាត់មានប្រសិទ្ធភាពចំពោះសមាជិកក្រុមគ្រួសារឆាប់ទទួលយក។
ឧត្តមសេនីយ៍ឯក លឹម តុងហួត បានបន្តថា ករណីគ្រឿងញៀនមុនរាលដាលចូលសហគមន៍ គឺអាចផ្តើមចេញពីប្រជាពលរដ្ឋម្នាក់ ឬសមាជិកក្រុមគ្រួសារមួយ «ផ្ទះអ្នកផ្ទះខ្ញុំគ្មានគ្រឿងញៀន សហគមន៍នឹងគ្មានគ្រឿងញៀន»៕
