(ព្រះសីហនុ)៖ លោក ប្រាក់ សំអឿន រដ្ឋលេខាធិការក្រសួងមហាផ្ទៃ តំណាងលោកសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី៦ ខែមីនា ឆ្នាំ២០២៤ បានអញ្ជើញប្រកាសមុខដំណែង អភិបាលរងខេត្ត ដោយលោកស្រី ម៉ាក សំណាង ជំនួសលោកស្រី ហៀក ហ៊ីមុល្លី ដែលត្រូវបានផ្ទេរភារកិច្ចឱ្យទៅបំរើការជាទីប្រឹក្សាក្រសួងមហាផ្ទៃ។
ពិធីនេះ បានធ្វើឡើងនៅមជ្ឈមណ្ឌលមង្គលសេដ្ឋាច័ន្ទ ដោយមានការចូលរួមពីលោក គួច ចំរើន អភិបាលខេត្តព្រះសីហនុ លោក វង្ស ណាផាត ប្រធានក្រុមប្រឹក្សាខេត្ត អភិបាលក្រុង/ស្រុក កងកម្លាំប្រដាប់អាវុធ ព្រមទាំងមន្ត្រីរាជការជាច្រើនរូបទៀត។
ក្នុងឱកាសនោះដែរ លោក ប្រាក់ សំអឿន បានធ្វើការផ្តាំផ្ញើលោកស្រី ម៉ាក សំណាង ដែលទើបទទួលមុខតំណែងជាអភិបាលរង នៃគណៈអភិបាលខេត្តព្រះសីហនុ ជំនួសលោកស្រី ហៀក ហ៊ីមុល្លី ដែលត្រូវបានផ្ទេរភារកិច្ចឱ្យទៅបំរើការជាទីប្រឹក្សាក្រសួងមហាផ្ទៃ ហើយការតែងតាំងមុខតំណែងនេះ ដោយពិនិត្យទៅលើលក្ខណៈសម្បត្តិ សមត្ថភាព បទពិសោធន៍ការងារ។
ក្នុងនាមថ្នាក់ដឹកនាំក្រសួងមហាផ្ទៃ សូមកោតសរសើរ និងវាយតម្លៃខ្ពស់ចំពោះលោកស្រី ហៀក ហ៊ីមុល្លី ដែលបានខិតខំបំពេញការងារក្នុងការចូលរួមដឹកនាំកសាង និងអភិវឌ្ឍខេត្តក្នុងមុខតំណែង ជាអភិបាលរងខេត្ត ធ្វើឱ្យខេត្តមានការអភិវឌ្ឍរីកចម្រើនលើគ្រប់វិស័យនាពេលកន្លងមក។ ក្នុងនាមថ្នាក់ដឹកនាំក្រសួងមហាផ្ទៃ សូមកោតសរសើរ និងវាយតម្លៃខ្ពស់ចំពោះលោកស្រី ហៀក ហ៊ីមុល្លី ដែលបានខិតខំបំពេញការងារក្នុងការចូលរួមដឹកនាំកសាង និងអភិវឌ្ឍខេត្តក្នុងមុខតំណែង ជាអភិបាលរងខេត្ត ធ្វើឲ្យខេត្តមានការអភិវឌ្ឍរីកចម្រើនលើគ្រប់វិស័យនាពេលកន្លងមក។
លោកបានកោតសរសើរ វាយតម្លៃរដ្ឋបាលខេត្តព្រះសីហនុ ក្នុងការថែរក្សានូវសុខសន្តិសុខ សុវត្ថិភាពសង្គមក្នុងក្របខណ្ឌខេត្តបានល្អប្រសើរ ពិសេសការបោះឆ្នោតជ្រើសតាំងសមាជិក ព្រឹទ្ធសភានីតិកាលទី៥ ប្រកបដោយសេរី ត្រឹមត្រូវ និងយុត្តិធម៌ ស្របតាមច្បាប់បោះឆ្នោត សរបញ្ជាក់ពីការដឹកនាំដ៏ឈ្លៀសវៃ និងប៉ិនប្រសពរបស់សម្តេចតេជោ ប្រធានគណបក្សប្រជាជនក្នុងការដឹកនាំប្រទេស មានការអភិវឌ្ឍរីកចម្រើនសម្រាប់ការបោះឆ្នោតអសកល ប៉ុន្តែតម្លៃនៃការបោះឆ្នោតមានអត្ថប្រយោជន៍ធំធេងក្នុងការគ្រប់គ្រងរដ្ឋ ស្របតាមរដ្ឋធម្មនុញ្ញ។ សមិទ្ធផល និងស្នាដៃដែលរដ្ឋបាលខេត្តព្រះសីហនុសម្រេចបាននាពេលកន្លងមក ពិតជាបានចូលរួមចំណែកក្នុងការពង្រឹងសន្តិភាព ស្ថេរភាពសេដ្ឋកិច្ចសង្គម និងការអភិវឌ្ឍរីកចម្រើន។
ឈ្លៀតក្នុងឱកាសនោះដែរ លោក គួច ចំរើន សូមអបអរសាទរលោកស្រី ម៉ាក សំណាង ដែលត្រូវបានថ្នាក់ដឹកនាំផ្តល់សេចក្តីទុកចិត្តតែងតាំងមុខតំណែងជាអភិបាលរង នៃគណៈអភិបាលខេត្តព្រះសីហនុ នាពេលនេះ ដើម្បីចូលរួមចំណែកដឹកនាំរដ្ឋបាលខេត្តព្រះសីហនុ ឲ្យទទួលបានជោគជ័យ និងសម្រេចបានសមិទ្ធផលថ្មីៗបន្ថែមទៀត ស្របតាមគោលការណ៍ច្បាប់ និងលិខិតបទដ្ឋានគតិយុត្ត។
លោកបានប្រាប់ថា ត្រូវយកចិត្តទុកដាក់ ដើម្បីអនុវត្តតាមតួនាទី ភារកិច្ច ដែលថ្នាក់ដឹកនាំប្រគល់ជូនប្រកបដោយមនសិការវិជ្ជាជីវៈ មានការទទួលខុសត្រូវខ្ពស់ ដើម្បីធានានូវអភិបាលកិច្ចល្អ យុត្តិធម៌សង្គម និងការអភិវឌ្ឍ ពង្រឹងការផ្តល់សេវាសាធារណៈជូនប្រជាពលរដ្ឋប្រកបដោយប្រសិទ្ធភាព ភាពស្អាតស្អំ និងឆ្លើយតបបានទាន់ពេលវេលាទៅនឹងតម្រូវការរបស់ប្រជាពលរដ្ឋនៅក្នុងមូលដ្ឋាន ជាពិសេសត្រូវប្រកាន់ភ្ជាប់នូវអភិក្រមរបស់សម្តេចអគ្គមហាសេនាបតីតេជោ ហ៊ុន សែន គឺ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់»៕
