(ភ្នំពេញ)៖ នាយឧត្តមសេនីយ៍ ជៀង អំ រដ្ឋលេខាធិការក្រសួងការពារជាតិ បានអំពាវនាវដល់នាយទាហាន នាយទាហានរង និងពលទាហាន នៃនាយកដ្ឋានអប់រំ អគ្គនាយកដ្ឋានយោធសេវា ត្រូវក្តាប់ និងទប់ស្កាត់នូវព័ត៌មានមិនពិតនានា តាមរយៈប្រព័ន្ធអេឡិចត្រូនិច ខណៈក្រុមប្រឆាំងមួយក្តាប់តូចបានប្រើប្រាស់ប្រព័ន្ធនេះដើម្បីវាយប្រហារ និងមូលបង្កាច់រាជរដ្ឋាភិបាល រួមទាំងកងទ័ពតាមរយៈព័ត៌មានមិនពិត។
ការណែនាំបែបនេះរបស់នាយឧត្តមសេនីយ៍ ជៀង អំ បានធ្វើឡើងនៅក្នុងពិធីផ្សព្វផ្សាយផែនការអនុវត្តការងារអប់រំចិត្តសាស្រ្តឆ្នាំ២០២៤ នៅថ្ងៃទី៦ ខែមីនា ឆ្នាំ២០២៤នេះ នៅទីស្តីការក្រសួងការពារជាតិ។
នាយឧត្តមសេនីយ៍ ជៀង អំ បានលើកឡើងយ៉ាងដូច្នេះថា៖ «នាយទាហាននាយទាហានរង និងពលទាហានទាំងអស់ ត្រូវធ្វើការទប់ស្កាត់ផ្សព្វផ្សាយព័ត៌មានមិនពិត តាមប្រព័ន្ធអេឡិចត្រូនិចផ្សេងៗដូចជា៖ តាមយូធូប ហ្វេសបុកជាដើម ព្រោះថាពួកប្រឆាំងតែងតែផ្សព្វផ្សាយព័ត៌មានមូលបង្កាច់មកលើរាជរដ្ឋាភិបាល និងកងទ័ពជាទូទៅពួកនេះភាគច្រើននៅបរទេស»។
នាយឧត្តមសេនីយ៍ ជៀង អំ ក៏បានណែនាំឱ្យអគ្គនាយកដ្ឋានយោធសេវា គប្បីអនុវត្តតាមយុទ្ធសាស្រ្តបញ្ចកោណដំណាក់កាលទី១ នីតិកាលទី៧ នៃរដ្ឋសភា ដែលមានបាវចនាចំនួន៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា» ដោយក្នុងនោះភារកិច្ចរបស់កងយោធពលខេមរភូមិន្ទ គឺផ្តោតសំខាន់ទៅលើការថែរក្សាសុខសន្តិភាព និងស្ថិរភាពនយោបាយ ហើយគ្រប់បណ្តាអង្គភាពត្រូវធ្វើការអប់រំ ផ្សព្វផ្សាយអំពីសភាពការណ៍ និងភារកិច្ចរបស់កងយោធពលខេមរភូមិន្ទ ជាពិសេសភារកិច្ចការពារបូរណភាពទឹកដី និងភារកិច្ចការពារព្រះមហាក្សត្រ ការពាររដ្ឋធម្មនុញ្ញ និងការពាររាជរដ្ឋាភិបាលស្របច្បាប់ ដោយប្រឆាំងដាច់ខាតចំពោះសកម្មភាពទាំងឡាយណាដែលសំដៅដល់ការធ្វើបដិវត្តន៍ពណ៌ជាដើម។
មន្ត្រីជាន់ខ្ពស់រូបនេះ បានណែនាំឱ្យបន្តចូលរួមអនុវត្តផែនការកំណែទម្រង់របស់កងយោធពលខេមរភូមិន្ទ ៥ឆ្នាំឱ្យបានត្រឹមត្រូវ និងទទួលបានលទ្ធផលល្អ ដោយក្នុងនោះផែនការអប់រំ ហ្វឹកហ្វឺនក៏ជាផ្នែកមួយនៃកំណែទម្រង់ដែលបានចូលរួមចំណែកពង្រឹងសមត្ថភាពដល់កងទ័ពទូទាំងកង យោធពលខេមរភូមិន្ទ ដើម្បីបំពេញភារកិច្ចរបស់ខ្លួនឱ្យបានសម្រេចជោគជ័យល្អប្រសើរ។
បន្ថែមពីនេះ នាយឧត្តមសេនីយ៍ ជៀង អំ បានក្រើនរំលឹកឱ្យបន្តយកចិត្ត ទុកដាក់អប់រំ និងពង្រឹងការអនុវត្តច្បាប់របស់រដ្ឋ និងបទវិន័យទូទៅសម្រាប់យោធិននៃកងយោធពល ខេមរភូមិន្ទ ដោយយកចិត្តទុកដាក់អប់រំបន្ថែមទៅលើច្បាប់ផ្សេងៗ ជាពិសេសច្បាប់ពាក់ព័ន្ធទៅនឹងអំពើ ហឹង្សា ច្បាប់ព្រហ្មទណ្ឌ និងច្បាប់ស្តីពីការប្រឆាំងគ្រឿងញៀនជាដើម។
បើតាមលោកឧត្តមសេនីយ៍ទោ ចាន់ សារឿន នាយក នាយកដ្ឋានអប់រំ នៃអគ្គនាយកដ្ឋានយោធសេវា បានលើកឡើងថា ដោយអនុវត្តតាមផែនការណែនាំស្ដីពីការចាត់តាំងអនុវត្តការងារអប់រំចិត្តសាស្ត្រ ឆ្នាំ២០២៤ ក៏ដូចជាសេចក្តីសម្រេចរបស់នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាយកដ្ឋានអប់រំ នៃអគ្គនាយកដ្ឋានយោធសេវា បានចាត់តាំងអនុវត្តការងារអប់រំចិត្តសាស្ត្រ ឆ្នាំ២០២៤ និងសភាពការណ៍វិវឌ្ឈន៍ថ្មីៗ ទស្សនវិស័យ អប់រំចិត្តសាស្ត្រ និងភារកិច្ចចំពោះមុខរបស់កងយោធពលខេមរភូមិន្ទ។
លោកឧត្តមសេនីយ៍ទោ ចាន់ សារឿន បានបន្តថា អគ្គនាយកដ្ឋានយោធសេវា ក៏ដូចជាជំនាញនាយករដ្ឋានអប់រំ បានអនុវត្តយ៉ាងខ្ជាប់ខ្ជួន តាមផែនការណែនាំរបស់ក្រសួងការពារជាតិ ក្នុងន័យនេះទោះស្ថិតក្នុងកាលៈទេសៈណាក៏ដោយ ការកសាងកងទ័ពអំពីទស្សនៈ សតិអារម្មណ៍នយោបាយចិត្តសាស្រ្ត ជាពិសេសអំពីគុណតម្លៃនៃសន្តិភាព គឺជាបញ្ហាគន្លឹះក្នុងការកសាង ពង្រឹងកម្លាំងប្រដាប់អាវុធឱ្យបានរឹងមាំ តាមរយៈការ បណ្តុះបណ្តាល អប់រំរៀនសូត្រលើកកម្ពស់មនសិការស្នេហាជាតិ ស្មោះត្រង់ គោរពវិន័យ បទបញ្ជារបស់កងទ័ព អត្តចរិក សីលធម៌ ថ្លៃថ្នូរស្អាតស្អំ ប្រយុទ្ធប្តូរផ្តាច់ និងហ៊ានពលិកម្មដើម្បីបុព្វហេតុជាតិមាតុភូមិជាដើម៕
