(ភ្នំពេញ)៖ លទ្ធផលនៃការរឹតបន្ដឹងច្បាប់ចរាចរណ៍ និងត្រួតពិនិត្យជាតិអាល់កុល នៅយប់ថ្ងៃទី០៥ ខែមីនា ឆ្នាំ២០២៤ ក្រោមការបញ្ជាផ្ទាល់ពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាល រាជធានីភ្នំពេញ កម្លាំងសមត្ថកិច្ចបានឃាត់យានយន្ដល្មើសចំនួន ៦០គ្រឿង ក្នុងនោះរថយន្តចំនួន ១១គ្រឿង និងម៉ូតូ ៤៩គ្រឿង។

ប្រតិបត្តិការនេះធ្វើឡើងដោយអនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងតបតាមអនុសាសន៍ដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា សំដៅទប់ស្កាត់ និងបង្ការករណីគ្រោះថ្នាក់ចរាចរណ៍ ដែលជាសញ្ញាណគួរឲ្យព្រួយបារម្ភ។

ជាលទ្ធផលតាមបណ្តាអធិការដ្ឋាននគរបាលខណ្ឌ បានចុះអនុវត្តរឹត បន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុលដូចខាងក្រោម៖ ឃាត់យានយន្តល្មើស សរុបចំនួន ៦០គ្រឿង (រថយន្ត ចំនួន ១១គ្រឿង និងម៉ូតូចំនួន ៤៩គ្រឿង)៖

*ទី១៖ ល្មើសជាតិស្រវឹង សរុប៤១គ្រឿង

+កម្រិត 0.25 - 0.39 mg/L សរុប២១គ្រឿង អ្នកបើកបរម៉ូតូ ១៧នាក់, អ្នកបើកបររថយន្ត ០៤នាក់។
+កម្រិត 0.40 mg/L ឡើង សរុប២០គ្រឿង, អ្នកបើកបរម៉ូតូ ១៥នាក់, អ្នកបើកបររថយន្ត ០៥នាក់

*ទី២៖ បទល្មើសផ្សេងៗ សរុប១៩គ្រឿង, អត់មួកសុវត្ថិភាព ១៥នាក់, រថយន្តគ្មានប័ណ្ណបើកបរ ០២គ្រឿង។

ថ្លែងប្រាប់បណ្ដាញព័ត៌មាន Fresh News លោកឧត្តមសេនីយ៍ឯក ជួន ណារិន្ទ បានអះអាងថា «កម្លាំងសមត្ថកិច្ចជំនាញរបស់ស្នងការដ្ឋាននគរបាលរាជធានី បានចេញយុទ្ធនាការរឹតបន្តឹងច្បាប់ ត្រួតពិនិត្យជាតិអាល់កុល ក្នុងភូមិសាស្រ្តរាជធានីភ្នំពេញ ជាប្រចាំដោយមិនលើកលែង»៕