(ម៉ែលប៊ន, អូស្ត្រាលី)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញការគាំទ្រ​យ៉ាង​មុតមាំចំពោះបេសកម្មអប់រំរបស់ IDP Education ​នៅ​កម្ពុជាអស់ជាច្រើនឆ្នាំ។ តាមរយៈសកម្មភាព​អប់រំអស់ជាច្រើនឆ្នាំមកនេះ IDP បានរួមចំណែកបង្កើតធនធានមនុស្សជាច្រើនក្លាយមូលធនមនុស្ស​ដ៏ មានសក្តានុពលនៅកម្ពុជា។

ការវាយតម្លៃរបស់សម្តេចធិបតី ហ៊ុន ម៉ាណែត បានធ្វើឡើងក្នុងជំនួបពិភាក្សាការងារជាមួយលោកស្រី Tennealle O’Shannessy នាយកប្រតិបត្តិ IDP Education នៅព្រឹកថ្ងៃទី៣ ខែមីនា ឆ្នាំ២០២៤​នេះ នាទីក្រុងម៉ែលប៊ន ប្រទេសអូស្ត្រាលី។

ក្នុងជំនួបនោះ លោកស្រីនាយកប្រតិបត្តិ បានថ្លែងអំណរគុណសម្តេចធិបតី ហ៊ុន ម៉ាណែត ដែលបានឆ្លៀត​ពេល​ដ៏មមា​ញឹក​អនុញ្ញាត​ឱ្យលោកស្រី និងសហការី បានចូលជួបសម្តែងការគួរសម និងពិភាក្សាការងារ។ លោកស្រី បានអរគុណរាជរដ្ឋាភិបាលកម្ពុជា ដែលតែងតែផ្ដល់ការគាំទ្រលើដំណើរការអាជីវកម្មរបស់ IDP Education នៅកម្ពុជា។ លោកស្រីក៏បានបញ្ជាក់ផងដែរថា IDP Education នឹងបន្តនូវកិច្ចសហការល្អ​បន្ថែមទៀតជាមួយស្ថាប័នពាក់ព័ន្ធរបស់កម្ពុជា។

ក្នុងឱកាសនោះលោកស្រីនាយកប្រតិបត្តិ បានជម្រាបជូនសម្ដេចធិបតីផងដែរ អំពីវឌ្ឍនភាពនៃប្រតិបត្តិការ​អាជីវកមុ្មរបស់ IDP Education ដែលរួមមានសាលាបណ្ដុះបណ្ដាលភាសាអង់គ្លេស ACE នៅកម្ពុជា ដែលជាសាលាឈានមុខមួយ និងមានការទទួលស្គាល់ជាលក្ខណៈអន្តរជាតិ។ IDP Education ក៏បាន​ផ្ដល់សេវាកម្មប្រឹក្សាយោបល់សម្រាប់សិស្ស និស្សិត ក្នុងការដាក់ពាក្យចូលរៀននៅតាមបណ្ដា​សាកល​វិទ្យា​ល័យនានានៅក្រៅប្រទេស ដែលរួមមាន៖ អូស្ត្រាលី ចក្រភពអង់គ្លេស សហរដ្ឋអាមេរិក នូវែលហ្សេឡង់ ជា​ដើម។

បើតាមលោកស្រីនាយកប្រតិបត្តិ បានឱ្យដឹងថា កន្លងមក IDP Education បានផ្ដល់នូវការប្រឹក្សា​យោ​បល់ និងសម្របសម្រួលចំពោះការបន្តការ​សិក្សា​របស់សិស្ស និស្សិត នៅក្រៅប្រទេស ចន្លោះពី ១,៥០០ ទៅ ២,០០០នាក់ ក្នុងមួយឆ្នាំៗ។ ក្រៅពីនេះ IDP Education ក៏បានផ្ដល់នូវសេវាកម្មក្នុងការរៀបចំ​ចង​ក្រងសមាគមអតីតនិស្សិត (Alumni) ព្រមទាំងបានសហការជាមួយបណ្ដាសាកលវិទ្យាល័យមួយចំនួន​ក្នុងការផ្ដល់ជំនួយផ្នែកបច្ចេកទេសលើការគ្រប់គ្រងប្រព័ន្ធទិន្នន័យកម្មវិធីសិក្សាផងដែរ។

លោកស្រីនាយកប្រតិបត្តិ ក៏បានបង្ហាញបំណងពង្រីកការវិនិយោគបន្ថែមនៅកម្ពុជា ដែលក្នុងពេលឆាប់ៗ​ខាងមុខនេះ IDP គ្រោងនឹងបើកសាខាថ្មីមួយទៀតនៅខេត្តសៀមរាប ហើយក្រុមហ៊ុនក៏មានផែនការ​ពង្រីក​សាខាជាបន្តបន្ទាប់នាពេលអនាគតនៅតាមបណ្ដាខេត្ត ក្រុង នៅកម្ពុជា រួមមាន​ខេត្តបាត់ដំបង កំពង់ចាម កំពត ព្រះសីហនុ និងក្រុងប៉ោយប៉ែត។

សម្តេចធិបតី ហ៊ុន ម៉ាណែត បានបង្ហាញក្តីសោមនស្សរីករាយចំពោះកិច្ចពិភាក្សាការងារជាមួយ​លោក​ស្រី​នាយកប្រតិបត្តិ និងបានវាយតម្លៃខ្ពស់ចំពោះវឌ្ឍនភាពប្រតិបត្តិការអាជីវកម្ម របស់ IDP Education និងការរួមចំណែកក្នុងការលើកកម្ពស់គុណភាពអប់រំ និងកសាងធនធានមនុស្សនៅកម្ពុជា។

សម្ដេចធិបតី បានបញ្ជាក់ផងដែរថា ការបណ្ដុះបណ្ដាលធនធានមនុស្ស ជាពិសេសលើជំនាញ​ភាសាអង់​គ្លេស​ មានសារៈសំខាន់ខ្លាំងណាស់ ក្នុងយុគសម័យសកលភាវូបនីយកម្មនៃពិភពលោក ដោយភាសាអង់​គ្លេសជាស្ពាននៃការផ្សារភ្ជាប់ទំនាក់ទំនងទាំងក្នុងបរិបទការងារ ធុរកិច្ច និងសង្គម។

សម្ដេចធិបតី ក៏បានគូសបញ្ជាក់អំពីគោលនយោបាយរបស់រាជរដ្ឋាភិបាលកម្ពុជានីតិកាលទី៧ ដោយ​ផ្តោត​​លើការជំរុញកំណើនសេដ្ឋកិច្ច ផ្អែកលើធនធានមនុស្ស។ រាជរដ្ឋាភិបាលបានយកចិត្តទុកដាក់​ពង្រឹង​ការបណ្ដុះបណ្ដាលធនធានមនុស្ស និងជំនាញវិជ្ជាជីវៈដល់ប្រជាពលរដ្ឋកម្ពុជា ព្រោះជាកត្តាដ៏​សំខាន់​ក្នុង​ការ​អភិវឌ្ឍសង្គម-សេដ្ឋកិច្ច។

បន្ថែមពីលើនេះ សម្ដេចធិបតី ហ៊ុន ម៉ាណែត បានថ្លែងអំណរគុណចំពោះរដ្ឋាភិបាលអូស្រ្តាលី ដែលបាន​ផ្ដល់​អាហារូបករណ៍ដល់និស្សិតកម្ពុជា ជាពិសេសមន្ត្រីរាជការ និងអរគុណចំពោះការសម្របសម្រួលពី IDP Education នាពេលកន្លងមក។

សម្ដេចធិបតី ក៏បានបញ្ជាក់ផងដែរថា ក្រៅពីការទទួលបានអាហារូបករណ៍របស់មន្ត្រីរាជការស៊ីវិលហើយ​នោះ ផ្នែកកងទ័ពក៏មានទំនាក់ទំនងជាមួយ IDP Education និងបានទទួលការផ្ដល់វគ្គបណ្តុះបណ្តាល អាហារូបករណ៍ និងកម្មវិធីសិក្សាផ្លាស់ប្ដូរបទពិសោធន៍ នៅក្នុងវិស័យកងទ័ពផងដែរ។

សម្ដេចធិបតី បានលើកទឹកចិត្តឱ្យ IDP Education បន្តគាំទ្រ និងសហការជាមួយក្រសួង​ពាក់ព័ន្ធ​នៃរាជ​រដ្ឋាភិបាលកម្ពុជា ជាពិសេសក្រសួងអប់រំ យុវជន និងកីឡា ក្នុងការបណ្តុះបណ្តាលធនធានមនុស្ស ដើម្បី​ពិនិត្យ​លទ្ធភាពបណ្ដុះបណ្ដាលលើកម្មវិធីផ្សេងៗបន្ថែមទៀត ដូចជាជំនាញបច្ចេកវិទ្យាឌីជីថល សំដៅបន្ត​ចូលរួមចំណែកក្នុងការកសាងធនធានមនុស្សនៅព្រះរាជាណាចក្រកម្ពុជា។

សូមបញ្ជាក់ថា IDP Education គឺជាអង្គភាពឈានមុខគេលើពិភពលោក ក្នុងការផ្តល់សេវាកម្មអប់រំលក្ខណៈអន្តរជាតិ។ នៅក្នុងបទពិសោធន៍ជិត៥០ឆ្នាំ ក្នុងឧស្សាហកម្មនេះ IDP Education បានជួយសិស្សជិត ៥០០,០០០នាក់ ឱ្យសិក្សានៅប្រទេសអូស្ត្រាលី កាណាដា នូវែលសេឡង់ ចក្រភពអង់គ្លេស និងសហរដ្ឋអាមេរិក។

IDP Education (Cambodia) បានដំណើរការមជ្ឈមណ្ឌលធ្វើតេស្តផ្លូវការ ដែលដំណើរការយូរជាង​គេ​បំផុត​របស់កម្ពុជា សម្រាប់ការធ្វើតេស្ត IELTS ដែលជាការប្រឡងតេស្តសមត្ថភាពភាសាអង់គ្លេស​កម្រិត​ខ្ពស់ ដ៏ពេញនិយមបំផុតសម្រាប់ការសិក្សា ការងារ និងការធ្វើចំណាកស្រុក។

IELTS ត្រូវបានគ្រប់គ្រងរួមគ្នាដោយ British Council, IDP: IELTS Australia និង Cambridge Assessment English អស់រយៈពេលជាង ៣០ឆ្នាំ ដែលមានអ្នកធ្វើតេស្តចំនួន ៤លាននាក់ ជារៀង​រាល់​ឆ្នាំ៕