(ភ្នំពេញ)៖ លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជ រដ្ឋាភិបាល បានលើកទឡ្ហីករណ៍បង្ហាញថា សម្តេចតេជោ ហ៊ុន សែន ជាមេដឹកនាំដ៏អស្ចារ្យក្នុងការដឹកនាំកសាងជាតិដ៏កម្រិតកំពូល នៅក្នុងសម័យទំនើបរយៈពេល ៥០០ឆ្នាំចុងក្រោយនេះ។
លោក ប៉ែន បូណា ថ្លែងបែបនេះ ក្នុងសន្និសីទសារព័ត៌មានបង្ហាញសមិទ្ធផលការងារ៦ខែ នៃការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នារសៀលថ្ងៃទី១៩ ខែកុម្ភៈ ឆ្នាំ២០២៤ នៅទីស្តីការគណៈរដ្ឋមន្ត្រី។
បើតាមលោក ប៉ែន បូណា ប្រវត្តិសាស្ត្រសម័យទំនើប ចាប់រាប់ពីចុងសតវត្សរ៍ទី១៥ បើគិតពីប្រទេសកម្ពុជាវិញ រួមមាន សម័យក្រោយអង្គរ គឺសម័យចតុម្មុខ លង្វែក ឧត្តុង្គ និងសម័យបន្តបន្ទាប់មក មិនមានសម័យណា មានសន្តិភាពពេញលេញ ហើយយូរអង្វែង ដូចសម្តេចតេជោ ហ៊ុន សែន នោះទេ។ ជាមួយគ្នានេះ ក៏មិនមានសម័យណា ដែលប្រទេសកម្ពុជា មានប្រព័ន្ធគមនាគមន៍ខ្វែងខ្វាត់ មានផ្លូវហាយវេ និងមានផ្លូវល្បឿនលឿនតភ្ជាប់យ៉ាងរលោងស្រិលដូចជាសម័យសម្តេចតេជោ ហ៊ុន សែន ដែរ។
លោក ប៉ែន បូណា បានលើកឡើងបន្តថា សម្តេចតេជោ ហ៊ុន សែន ប្រទេសកម្ពុជាមានអគារខ្ពស់ៗ នៅតាមរាជធានីភ្នំពេញ ឬក៏តាមប្រជុំជន ដែលមើលច្រឡំនឹងបណ្តាប្រទេសអភិវឌ្ឍផ្សេងៗទៀត ទៀតផង។ សម្តេចតេជោ ហ៊ុន សែន ប្រទេសកម្ពុជា សម្បូរបែបដោយម្ហូបអាហារ ប្រជាជនខ្មែរអាចចេញដំណើរដើរកម្សាន្តគ្រប់ទីកន្លែង គ្រប់ខេត្ត គ្រប់ខណ្ឌ និងរហូតធ្វើដំណើរកម្សាន្តនៅក្រៅប្រទេស យ៉ាងច្រើនកុះករ។
លោក ប៉ែន បូណា បានបន្ថែមថា សម្តេចតេជោ ហ៊ុន សែន ធ្វើឱ្យប្រជាពលរដ្ឋមានឧបករណ៍ និងរបស់របរទំនើបៗប្រើប្រាស់ មានសាលារៀនស្អេកស្កេះនៅជិតផ្ទះប្រជាពលរដ្ឋ និងមាននិស្សិតបញ្ចប់ការសិក្សាមួយឆ្នាំៗ រាប់ពាន់ម៉ឺននាក់។ មានន័យថា ការអភិវឌ្ឍ និងការរីកចម្រើនរបស់សង្គមសេដ្ឋកិច្ចជាតិរបស់កម្ពុជា ដល់កម្រិតកំពូល មានតែនៅសម័យតេជោ ហ៊ុន សែន តែមួយគត់ ក្នុងរយៈពេល ៥០០ឆ្នាំចុងក្រោយនេះ។
លោក ប៉ែន បូណា បានបញ្ជាក់យ៉ាងដូច្នេះថា «នេះជាអំណះអំណាងច្បាស់លាស់។ នេះគេអាចផ្ទៀងផ្ទាត់បាន កុំឱ្យថាខ្ញុំចេះតែថា សូមអ្នកទាំងអស់គ្នាផ្ទៀងផ្ទាត់មើល។ អីចឹង អាចនិយាយបានថា ក្រោមការដឹកនាំសម្តេចតេជោ ហ៊ុន សែន កម្ពុជា ឈានដល់កម្រិតមួយខ្ពស់បំផុត កម្រិតកំពូលរយៈពេល៥០០ឆ្នាំចុងក្រោយ។ សូមបញ្ជាក់ជូនថា សម្តេចតេជោ ហ៊ុន សែន ដែលលោកដឹកនាំប្រទេស អភិវឌ្ឍបានប៉ុណ្ណឹង ដែលខ្ញុំហៅថា កម្រិតកំពូលក្នុងប្រវត្តិសាស្ត្រសម័យទំនើប ដឹកនាំចេញពីណា? ចេញពីគំនរផេះផង់ ឈាមទឹកភ្នែក ក្រោយរបបប្រល័យពូជសាសន៍ ប៉ុលពត»។
លោកបន្តថា «ឥលូវ យើងស្រមៃថា បើសិនជាសម្តេចតេជោ ហ៊ុន សែន គាត់ដឹកនាំប្រទេស តពីសម័យសង្គមរាស្ត្រនិយម របស់ព្រះករុណាសម្តេចតា ដែលមានហេដ្ឋារចនាសម្ព័ន្ធសព្វបែបយ៉ាងជាជន្ទល់ស្រាប់ ហើយអត់ឆ្លងកាត់របបសាធារណរដ្ឋខ្មែររបស់លោក លន់ នល់ របបប៉ុលពតទេ យើងស្រមៃមើលមើរ៍ តើការអភិវឌ្ឍប្រទេសកម្ពុជា នឹងដល់កម្រិតណា? លើសពីនេះប៉ុន្មានដង?»។
បើតាមលោក ប៉ែន បូណា នេះជាសំណួរច្បាស់ចែស ដើម្បីបញ្ជាក់ថា រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ ហើយឥលូវនេះកំពុងតែមានរាជរដ្ឋាភិបាលបន្តវេន ដោយសម្តេចធិបតី ហ៊ុន ម៉ាណែត ជាប្រមុខដឹកនាំរាជរដ្ឋាភិបាល ដែលដឹកនាំប្រទេសកម្ពុជាអភិវឌ្ឍខ្ពស់បំផុតកម្រិតកំពូល។ ឥលូវនេះ អ្នកបន្តវេនជំនាន់ទី២ របស់គណបក្សប្រជាជនកម្ពុជា បានចាប់ផ្តើមចេញដំណើរហើយ ៦ខែ។ អ្នកដឹកនាំជំនាន់ថ្មី គឺសម្តេចធិបតី ចេញពីគ្រួសារសម្តេចតេជោ ហើយគណៈរដ្ឋមន្ត្រី សុទ្ធតែចេញពីគណបក្សប្រជាជនកម្ពុជា អីចឹងអាចនិយាយបានថា នេះជាក្រុមអ្នកដឹកនាំថ្មី ខ្លាំងក្លា ពូកែ ជំនាន់ទី២ របស់គណបក្សប្រជាជនកម្ពុជា។
លោកបន្ថែមថា ក្រុមអ្នកដឹកនាំថ្មី នឹងនាំប្រទេសកម្ពុជា លឿនទៅមុខទៀត ដោយសារមានគ្រឹះរួចស្រេច ដោយសាររៀមច្បង កើតឡើងដោយសារការដឹកនាំរបស់សម្តេចតេជោ ហ៊ុន សែន។ នេះជាក្តីសង្ឃឹមរឹងមាំណាស់ របស់ប្រជាពលរដ្ឋខ្មែរ៕
