(ភ្នំពេញ)៖​ វិទ្យាល័យទាំង១៥ សូមត្រៀម!​ យុទ្ធនាការ «ការលើកកម្ពស់ស្តង់ដាសាលារៀនគំរូតាមរយៈការអប់រំឌីជីថលសម្រាប់សិស្សានុសិស្សនៅគ្រឹះស្ថានមធ្យមសិក្សាដោយវិធីសាស្រ្តបង្រៀនតាមបែបថ្នាក់រៀនត្រឡប់ និងវិធីសាស្រ្តបង្រៀនតាមទ្រឹស្តីស្ថាបនានិយម» នឹងចាប់ផ្តើមជំហានទី១ ជាមួយវិទ្យាល័យគោលដៅចំនួន១៥ ក្នុងរាជធានីភ្នំពេញចាប់ពីថ្ងៃទី១៤ ខែកុម្ភៈ ឆ្នាំ២០២៤ ដល់ថ្ងៃទី០៦ ខែមីនា ឆ្នាំ២០២៤ខាងមុខនេះ។

វិទ្យាល័យចំនួន១៥នោះ​ រួមមានដូចខាងក្រោម៖ វិទ្យាល័យ ហ៊ុន សែន ជម្ពូវ័ន, វិទ្យាល័យ ជាស៊ីម សាមគ្គី, វិទ្យាល័យ ហ៊ុនសែន បុរី១០០ខ្នង, វិទ្យាល័យ ទួលស្វាយព្រៃ, វិទ្យាល័យ ជាស៊ីម បឹងកេងកង, វិទ្យាល័យ បាក់ទូ, វិទ្យាល័យ ទឹកល្អក់, វិទ្យាល័យ ឥន្ទ្រទេវី, វិទ្យាល័យ ហ៊ុនសែន ប៊ុនរានី ច្បារអំពៅ, វិទ្យាល័យ ជាស៊ីម សន្ធរម៉ុក,​វិទ្យាល័យ ឬស្សីកែវ,​ វិទ្យាល័យ ព្រែកឯង,​វិទ្យាល័យ ហ៊ុនសែន ចាក់អង្រែ​,​ វិទ្យាល័យ ប៊ុនរ៉ានី ហ៊ុនសែន កោះដាច់​ និងវិទ្យាល័យ ជ្រោយចង្វារ។

គួរបញ្ជាក់ផងដែរថា យុទ្ធនាការនេះបានគាំទ្រសូចនាកររងចំនួន១៩ ក្នុងស្តង់ដាចំនួន៣ តាមរយៈ៖

១៖​ ការបណ្តុះបណ្តាលក្រុមគ្រូបច្ចេកទេស សិស្សានុសិស្ស និងក្រុមប្រឹក្សាយុវជនអំពីវិធីបង្រៀន និងរៀនតាមបែបថ្នាក់រៀនត្រឡប់ និងវិធីសាស្រ្តបង្រៀនតាមទ្រឹស្តីអប់រំស្ថាបនានិយម

២៖​ ការលើកកម្ពស់សមត្ថភាពអំណានរបស់សិស្សានុសិស្ស ជាមួយបច្ចេកវិទ្យាបញ្ញាសិប្បនិម្មិត ក្លឹបអំណាន និងការប្រកួតប្រជែងអំណាន

៣៖​ ការបង្កើតក្លឹបពន្លឿនការសិក្សាសម្រាប់សិស្សដែលរៀនយឺតដោយមិត្តបង្រៀនមិត្ត និងការប្រើប្រាស់មាតិកាឌីជីថល

៤៖​ ការពង្រឹងក្លឹបមុខវិជ្ជាវិទ្យាសាស្រ្ត និងបច្ចេកវិទ្យាជាមួយ Maker Space និងការប្រកួតប្រជែងស្នាដៃវត្ថុគំរូ

៥៖​ ការបង្កើតប្រព័ន្ធ Live Teaching / Synchronized Teaching គាំទ្រដល់សិស្សរៀនយឺត និងបេក្ខជនស្វ័យរិន

៦៖​ ការបង្វឹកជាមួយធនធានសិក្សា www.duraseksa.com និងកម្មវិធី Duraseksa - ទូរសិក្សា លើការសិក្សាស៊ីជម្រៅ

៧៖​ ការលើកកម្ពស់ចំណាប់អារម្មណ៍លើមុខវិជ្ជាវិទ្យាសាស្រ្ត និងគណិតវិទ្យាសម្រាប់សិស្សនៅកម្រិតមធ្យមសិក្សា

បន្ទាប់ពីបញ្ចប់ជំហានទី១ ក្រុមការងារនឹងបន្តចុះយុទ្ធនាការសម្រាប់ជំហានទី២ និងទី៣ ជាបន្តបន្ទាប់ទៀតនៅក្នុងរាជធានីភ្នំពេញ និងតាមបណ្តាខេត្តនានាផងដែរ៕