(កំពង់ចាម)​៖​ ក្រុមការងារអន្ដរក្រសួងដឹកនាំដោយលោក ផូ ផារិទ្ធ រដ្ឋលេខាធិការ តំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ​ និងមន្ដ្រីបច្ចេកទេសផ្លូវជនបទ និងតំណាងក្រសួងសេដ្ឋកិច្ច និងហិរញ្ញវត្ថុ នាព្រឹក​ថ្ងៃទី​១២​ ខែកុម្ភៈ​ ឆ្នាំ​២០២៤​​នេះ បានចុះត្រួតពិនិត្យ និងវាយតម្លៃបញ្ចប់សុពលភាព​លេីការងារស្ថាបនាផ្លូវ​ក្រាលកៅស៊ូ​ DBST មួយខ្សែប្រវែង ២,៣០០ម៉ែត្រ​ និងប្រព័ន្ធលូសងខាងផ្លូវសរុប៨០០ម៉ែត្រ​ ស្ថិតក្នុងភូមិកំប៉ោល​ ឃុំសណ្តែក​ ទៅភូមិថ្កូវ​ ឃុំត្រប់​ ស្រុកបាធាយ​ ខេត្តកំពង់ចាម​។

ក្នុងដំណេីរចុះត្រួតពិនិត្យ និងវាយតម្លៃបញ្ចប់សុពលភាព​លេីការងារស្ថាបនាផ្លូវ​ក្រាលកៅស៊ូ​ DBST មួយខ្សែនេះ​ លោក ផូ ផារិទ្ធ រដ្ឋលេខាធិការ ក្រសួងអភិវឌ្ឍន៍ជនបទ​ បញ្ជាក់ថា​ផ្លូវក្រាលកៅស៊ូ​នេះ គឺអនុវត្តន៍គម្រោងដោយ​នាយកដ្ឋានវិស្វកម្ម​របស់ក្រសួងការពារជាតិ​ដោយប្រេីប្រាស់ថវិការបស់រាជរដ្ឋាភិបាលកម្ពុជា។

ទន្ទឹមនឹងនេះដែរ​ លោក ផូ ផផារិទ្ធបានអំពាវនាវដល់អាជ្ញាធរមូលដ្ឋាន និងប្រជាពលរដ្ឋឱ្យចូលរួមថែរក្សាផ្លូវឱ្យបានល្អ ព្រមទាំងហាមដឹកជញ្ជូនទំនិញធន់ធ្ងន់លើសចំនួនកំណត់ដែលធ្វើឱ្យផ្លូវងាយរងគ្រោះផងដែរ។

លោកបានបញ្ជាក់ថា រាជរដ្ឋាភិបាល តាមរយៈមន្ទីរអភិវឌ្ឍន៍ជនបទនឹងបន្ដសាងសង់ផ្លូវជាច្រើនខ្សែទៀត នៅឆ្នាំ២០២៤ និងឆ្នាំបន្ដបន្ទាប់ទៀត សម្រាប់អាណត្ដិទី៧ ដែលដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ដ្រី។

បើតាមការលើកឡើងរបស់ប្រជាពលរដ្ឋនៅតាមភូមិ ពួកគាត់បានសម្ដែងការសាទរ និងសប្បាយរីករាយ ក្រោយពេលដែលផ្លូវក្រាលកៅស៊ូ​នេះ​ ដែលជួយសម្រួលជីវភាពគ្រួសារបានកាន់តែល្អប្រសេីរ​ និងវាសរសៃឈាមសម្រាប់ប្រជាពលរដ្ឋធ្វើដំណើរប្រចាំថ្ងៃ។​

ពួកគាត់សូមថ្លែងអំណរគុណយ៉ាងខ្លាំង ដល់រាជរដ្ឋាភិបាល ជាពិសេសក្រសួងអភិវឌ្ឍន៍ជនបទ ដែលបានកសាងអភិវឌ្ឍន៍​ និងថែទាំផ្លូវម្រាប់ឱ្យប្រជាពលរដ្ឋងាយស្រួលធ្វើដំណើរ ដែលជាសមិទ្ធផលបានបង្ហាញថារាជរដ្ឋាភិបាលមានការយកចិត្ដទុកដាក់ដល់ប្រជាពលរដ្ឋគ្រប់ទីកន្លែង៕