(ភ្នំពេញ)៖ ជ្រូកខ្វៃ គឺជាសំណែនក៏សំខាន់ ដែលកូនខ្មែរកាត់សែស្រឡាយចិន តែងតែនិយមយកមកសែន ​នៅតាមគេហដ្ឋាន ស្ថាប័ន និងក្រុមហ៊ុនផ្សេងៗ​ ដោយពួកគេមានជំនឿថា ការសែនជ្រូកខ្វៃនៅថ្ងៃសែនចូលឆ្នាំចិន ​នឹងអាចនាំមកសំណាង លាភជ័យ និងសម្រេចជោគជ័យរាល់កិច្ចការ និងការរកស៊ីមានបាន ដល់គ្រួសារនីមួយៗ។ ​

នៅតាមដងផ្លូវខ្លះ និងនៅតាមផ្សារមួយចំនួន ជាពិសេសនៅផ្សារអូឫស្សី គេឃើញមាន​ជ្រូកខ្វៃជាច្រើនត្រូវបានព្យួរ នៅតាមតូបនីមួយៗ សម្រាប់លក់បំពេញតម្រូវការសែនរបស់បងប្អូនប្រជាពលរដ្ឋខ្មែរកាត់សែស្រឡាយចិន ។​

នៅថ្ងៃទី៩ ខែកុម្ភៈ ឆ្នាំ២០២៤​ គឺជាថ្ងៃដែលបងប្អូនប្រជាពលរដ្ឋខ្មែរ កាត់សែស្រឡាយចិន​ រៀបចំសែនទៅតាមទម្លាប់របស់ខ្លួន។ បើទោះបីជាកៀកដល់ថ្ងៃសែនហើយក្តី ប៉ុន្តែអ្នកលក់ជ្រូកខ្វៃមួយចំនួន បានលើកឡើងថា នៅឆ្នាំនេះ ការកក់ ឬការមកទិញដោយផ្ទាល់មានចំនួនតិចនៅឡើយ ខុសប្លែកពីរាល់ឆ្នាំ បើទោះបីជាតម្លៃជ្រូកខ្វៃឆ្នាំនេះនៅថេរ ហើយកន្លែងខ្លះចុះថោកជាងឆ្នាំមុនក៏ដោយ។

អ្នកលក់ជ្រូកខ្វៃមួយចំនួន នៅផ្សារអូឫស្សីបានប្រាប់បណ្តាញព័ត៌មាន Fresh News ថា តម្រូវការជ្រូកខ្វៃយកទៅសែន​ចិន​ឆ្នាំនេះ ហាក់មិនសូវ​មានសន្ទុះដូចឆ្នាំមុនកូវីដ​១៩ និងឆ្នាំមុននោះដែលប្រហែល ជាអាចមកពីកត្តាជីវភាពប្រជាពលរដ្ឋ ​ដែលពួកគេជួបបញ្ហាសេដ្ឋកិច្ច។

កំពុង​រៀបរាប់ពីតម្លៃជ្រូកនីមួយៗដល់ភ្ញៀវលោក នូ សំអាត ដែលបានដាក់ព្យួរលក់ជ្រូកខ្វៃនៅកាច់ជ្រុងផ្សារឫស្ស៊ី បានប្រាប់ថា បើទោះបីជាកៀកចូលឆ្នាំចិនក្តី ប៉ុន្តែភ្ញៀវតិចណាស់ ដែលបានមកទិញ​ជ្រូកខ្វៃសម្រាប់យកទៅសែន។ ធ្លាប់តែទទួលបានការកុម៉្មង់ប្រមាណជាង ៣០០ក្បាល ប៉ុន្តែឆ្នាំនេះ រហូតមកដល់ថ្ងៃទី៨ ខែកុម្ភៈ ដែលមុនមួយថ្ងៃនៃការសែនចិន លោកទទួលបានការកុម្ម៉ង់ត្រឹមតែ ១០០ក្បាលប៉ុណ្ណោះ។

លោក ភុំ រី ដែលកំពុងអង្គុយហៅភ្ញៀវចូលទិញជ្រូកខ្វៃរបស់ខ្លួន បានឱ្យដឹងដែរ ការលក់ជ្រូកខ្វៃឆ្នាំហាក់ស្ងាត់ ខុសពីឆ្នាំមុនដែលការលក់ គឺដាច់គ្រាន់បើ។ តែយ៉ាងណាលោករង់ចាំមើលថ្ងៃសែន ក្រែងមានអ្នកមកសម្រុកទិញ៕