(កំពង់ធំ)៖ ក្មេងប្រុសម្នាក់អាយុ៤ឆ្នាំ ជាប់ក្នុងឡានសាលារៀនរយៈពេលជាង៤ម៉ោង រហូតថប់ដង្ហើមស្លាប់។ ហេតុការណ៍បានបង្កឲ្យមានការភ្ញាក់ផ្អើល នៅល្ងាចថ្ងៃទី០៥ ខែកុម្ភៈ ឆ្នាំ២០២៤ នៅសាលាអន្ដរជាតិយីហោ កុលបុត្របញ្ញា ដែលមានទីតាំងស្ថិតនៅភូមិព្រៃព្រាល (ក) ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។
សេចក្ដីរាយការណ៍បានឲ្យដឹងថា ក្មេងប្រុសរងគ្រោះឈ្មោះ យ៉ុម រៃយ៉ា រស់នៅភូមិត្រាច ឃុំត្បែង ស្រុកកំពង់ស្វាយ។ ខណៈអ្នកបើករថយន្ដដឹកសិស្សឈ្មោះ ឡុង ស៉ីណែត ភេទស្រី អាយុ៤២ឆ្នាំ (រត់គេចខ្លួនបាត់ក្រោយកើតហេតុ)។
តាមការរៀបរាប់ពីកន្លែងកើតហេតុ បានបញ្ជាក់ថា ឈ្មោះ ឈិត សោភ័ណ្ឌ និងប្រពន្ធឈ្មោះ ឡុង ស៉ីណែត បានបើកសាលារៀនឯកជនឈ្មោះ អន្ដរជាតិ កុលបុត្របញ្ញា ហើយតែងតែបើករថយន្ដទៅដឹកសិស្សតាមផ្ទះរៀងរាល់ថ្ងៃ ដោយពេលខ្លះប្ដីអ្នកបើក និងពេលខ្លះប្រពន្ធបើក។
នៅថ្ងៃកើតហេតុ ប្រហែលម៉ោង០១ថ្ងៃត្រង់ ឈ្មោះ ឡុង ស៉ីណែត ពេលត្រឡប់មកពីដឹកសិស្សដូចធម្មតា ក៏បើកទ្វារឡានឲ្យសិស្សចុះ ហើយប្រគល់ឲ្យគ្រូបង្រៀន និងបានបញ្ជាក់ថា ថ្ងៃនេះសិស្សខ្លះមិនមករៀននោះទេ ហើយគ្រូក៏ចាប់ផ្ដើមបង្រៀនធម្មតា។
រហូតដល់ម៉ោង៤៖៣០នាទីល្ងាច ក៏ត្រូវដឹកសិស្សត្រឡប់ទៅវិញ ស្រាប់តែប្រទះឃើញក្មេងប្រុសម្នាក់ជាប់នៅក្នុងរថយន្ដសន្លប់បាត់បង់ស្មារតី។ ពេលនោះឈ្មោះ ឡុង ស៉ីណេត បានដឹកជនរងគ្រោះទៅកាន់មន្ទីរពេទ្យ តែពេលទៅដល់គ្រូពេទ្យបានប្រាប់ថា ជនរងគ្រោះស្លាប់បាត់ទៅហើយ។ ក្រោយមកបានទូរស័ព្ទទៅប្ដី ដើម្បីឲ្យមកបើកបន្ដរួចគេចខ្លួនបាត់ ខណៈប្ដីបានទូរស័ព្ទទៅប្ដឹងសមត្ថកិច្ច និងបានប្រគល់សព្វជូនក្រុមគ្រួសារ។
ករណីនេះ បានបន្សល់នូវភាពសោកសៅ និងក្ដីអាណិតអាសូរជាខ្លាំងទៅកាន់ក្មេងរងគ្រោះ ដែលទើបមានអាយុត្រឹម៤ឆ្នាំ ហើយជាវ័យដែលកំពុងចេញស្រលាញ់ពីសំណាក់ឪពុកម្ដាយ និងក្រុមគ្រួសារ។ ហើយនេះក៏ជាបទសោធន៍មួយបន្ថែមទៀតផងដែរ ដល់អ្នកបើកបររថយន្ដសាលាទាំងអស់ មុនបិទទ្វាររថយន្ដ ត្រូវពិនិត្យឲ្យបានគ្រប់ជ្រុងជ្រោយ ដើម្បីបញ្ជាក់ថា សិស្សចុះអស់ពីឡានហើយឬនៅ៕
