(ភ្នំពេញ)៖ និស្សិតខ្មែរ៤រូប ត្រូវបានជ្រើសរើសចូលរួមកម្មវិធី «Young ASEAN Leaders Policy Initiative 2024» ដែលនឹងប្រព្រឹត្តទៅចាប់ពីថ្ងៃទី៥ ខែកុម្ភៈ ដល់ថ្ងៃទី១០ ខែកុម្ភៈ ឆ្នាំ២០២៤ នៅ​សា​កល​វិទ្យាល័យជូឡាឡុងកន នៅទីក្រុងបាំងកក ប្រទេសងថៃ។ និស្សិតខ្មែរទាំង៤រូបនេះ បានចាកចេញ​ពី​កម្ពុជាទៅកាន់ប្រទេសថៃនៅថ្ងៃទី៥ ខែកុម្ភៈ ឆ្នាំ២០២៤នេះហើយ។

សិស្សានុសិស្សដែលចូលរួមក្នុងកម្មវិធីនេះរួមមាន៖ លោក សូរ្យ គួច សុផាណារ័ត្ន, លោក លឹម តាយ ស៊ាង, លោក ឈូ កាយីអ៊ែនឌី និងកញ្ញា សោភ័ណ្ឌ រក្សា។

ក្នុងចំណោមនិស្សិតមកពីប្រទេសក្នុង និងក្រៅ ASEAN ចំនួន ៤៨រូប ដែលចូលរួមក្នុង​កម្មវិធី «Young ASEAN Leader Policy Initiative (YALPI)» ត្រូវបានជ្រើសរើសជានិស្សិតពូកែៗ​នៅតាម​ប្រទេស មកធ្វើការបង្ហាញ និងចែករំលែកពីវឌ្ឍនភាព នៃការអភិវឌ្ឍន៍ទីក្រុងក្នុងតំបន់​ឱ្យក្លាយទៅ​ជា​ទីក្រុងបៃតង។

លោក សូរ្យ គួច សុផាណារ័ត្ន និសិ្សតឆ្នាំទី២ តំណាងឱ្យក្រុម បានបង្ហាញការតាំងចិត្តខ្ពស់ ក្នុងការបង្ហាញ​ឱ្យ​​ពិភព​លោក និងនិសិ្សតមកពីបណ្តារប្រទេសផ្សេងទៀត ស្គាល់ពីប្រទេសកម្ពុជា ជាពិសេសរាជធានី​ភ្នំ​ពេញ​ដ៏ស្រស់ស្អាត ស៊ីវិល័យ ជាមួយហេដ្ឋារចនាសម្ពន្ធ័ខ្វាត់ខ្វែង ក្រោមការអភិវឌ្ឍន៍របស់រាជរដ្ឋាភិបាល​កម្ពុជាបច្ចុប្បន្ន។

និស្សិតមានដើមកំណើតពីខេត្តបាត់ដំបងរូបនេះ បានបញ្ជាក់ថា ខ្លួន និងមិត្តរួមក្រុមនឹងយកមកវិញនូវ​បទ​ពិសោធន៍ល្អៗពីវេទិកានេះ ក៏ដូជាពីបណ្តារប្រទេស ASEAN មកចែករំលែកជូននិស្សិតកម្ពុជា ដើម្បីរួមគ្នា ជាធាតុផ្សំចូលរួមអភិវឌ្ឍន៍ប្រទេសឱ្យកាន់តែរីកចម្រើនថែមទៀត។

សូមបញ្ជាក់ថា កម្មវិធី «Young ASEAN Leaders Policy Initiative» ជាវេទិកាអន្តរជាតិ​មួយ​ដែល​ប្រមូលផ្តុំ និងផ្តល់សិទ្ធិអំណាចដល់យុវជនក្នុងការផ្តួចផ្តើមដំណោះស្រាយ​សម្រាប់ការដោះស្រាយ​បញ្ហា​សង្គម​បច្ចុប្បន្ន។ គោលដៅនៃកម្មវិធី គឺផ្តល់អនុសាសន៍គោលនយោបាយ ដែលមានឥទ្ធិពលដល់ការ​បង្កើត​គោលនយោបាយសង្គមសម្រាប់ដោះស្រាយបញ្ហាសង្គម ដែលកំពុងកើតមាននៅក្នុងតំបន់​អាស៊ាន៕