(កណ្ដាល)៖ លោក ចាប វន្នី ប្រធានមន្ទីរព័ត៌មានខេត្តកណ្ដាល ជំរុញឱ្យការិយាល័យចំណុះទាំងអស់របស់មន្ទីរ ត្រូវខិតខំយកចិត្តទុកដាក់ក្នុងការពង្រឹងប្រព័ន្ធផ្សព្វផ្សាយព័ត៌មាន ប្រកបដោយគុណភាព ប្រសិទ្ធភាព ជូនដល់ប្រជាពលរដ្ឋឱ្យបានទូលំទូលាយ។
លោក ចាប វន្នី ប្រធានមន្ទីរព័ត៌មានខេត្តកណ្ដាល ជំរុញបែបនេះ ក្នុងកិច្ចប្រជុំប្រចាំសប្តាហ៍របស់មន្ទីរព័ត៌មានខេត្តកណ្ដាល នាព្រឹកថ្ងៃទី០៥ ខែកុម្ភៈ ឆ្នាំ២០២៤ នៅមន្ទីរព័ត៌មានខេត្តកណ្ដាល។
លោកប្រធានមន្ទីរ បន្តថា ការិយាល័យទាំងអស់ត្រូវយកចិត្តទុកដាក់ពង្រឹងលើកិច្ចការងារស្នូលរបស់ខ្លួន ចំពោះការិយាល័យវិទ្យុ ការិយាល័យទូរទស្សន៍ និងការិយាល័យទីភ្នាក់ងារសារព័ត៌មាន ត្រូវពង្រឹងប្រព័ន្ធផ្សព្វផ្សាយរបស់ខ្លួន ដោយបង្កើននូវសមត្ថភាពផ្សាយ ពិសេសការអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា សកម្មភាពរបស់រដ្ឋបាលខេត្តកណ្ដាល និងសមិទ្ធផលនានាដែលខេត្តកណ្ដាល សម្រេចបាន ដើម្បីផ្សព្វផ្សាយឱ្យបានទូលំទូលាយជូនដល់ប្រជាពលរដ្ឋគ្រប់មជ្ឈដ្ឋាន។
ក្នុងកិច្ចប្រជុំនេះដែរ លោកប្រធានមន្ទីរព័ត៌មានខេត្តកណ្ដាល បានណែនាំដល់ការិយាល័យព័ត៌មាន និងសោតទស្សន៍ ត្រូវធ្វើការកំណត់ទីតាំងផ្សព្វផ្សាយគ្រឿងស្រវឹងតាមរយៈ អាហ្វីស ប៉ាណូ ឱ្យបានច្បាស់លាស់ និងត្រូវធ្វើការណែនាំដល់ម្ចាស់អាជីវកម្ម ក្រុមហ៊ុន ត្រូវដាក់សារអប់រំឱ្យបានត្រឹមត្រូវនៅលើផ្ទាំងពាណិជ្ជកម្មរបស់ខ្លួន៕
