(ភ្នំពេញ)៖ ផលិតកម្មមហាហង្ស បានរៀបចំក្រុងពាលីចេញថត ភាពយន្តខ្នាតធំថ្មី​មួយទៀតហើយ មានចំណងជើងថា «ស៊ុបពើម៉ាំ» (Super Mum) ដែលគ្រោងចាយទុន​ ប្រមាណ៧ម៉ឺនដុល្លារ ដើម្បីផលិតឡើង​ឲ្យមានគុណភាព អាចប្រកួតប្រជែង​នៅលើទីផ្សារភាពយន្ត​ក្នុងស្រុក និងក្រៅស្រុក។ ពិធីក្រុងពាលីនេះ បានធ្វើឡើង​នាព្រឹកថ្ងៃទី២៨ ខែសីហា ឆ្នាំ២០១៦នេះ ក្បែររង្វង់មូលទួលគោក ដោយមានការចូលរួម ពីណាក់តារាល្បីៗ សម្ដែង​ក្នុងរឿងនេះ ជាច្រើននាក់។

អ្នកនាង ភិន សុដាលីស តំណាងឲ្យផលិតកម្ម មហាហង្ស បានថ្លែងប្រាប់អ្នកសារព័ត៌មានឲ្យដឹងថា ភាពយន្តខ្នាតធំរឿង​«ស៊ុបពើម៉ាំ» ជាប្រភេទរឿង បែបកំប្លែង ឌឺដង កាច់កុងគ្នា ដោយក្នុងសាច់រឿងនេះ ​អ្នកនាង ខ្ញុង និងអ្នកនាង កាតុ គឺជាតួអង្គកាច់កុងគ្នា​តាំងពីដើមរហូតដល់ចប់។ ភាពយន្តនេះ មានការចូលរួមសម្ដែង​ដោយតារាល្បីៗ ជាពិសេស​គឺក្រុមកំប្លែង នាយ ពែកមី នាយ គ្រឿន នាយក្រូច ដែលជាតារាមានបទពិសោធន៍ច្រើនឆ្នាំ​ក្នុងកាសម្ដែង ដើម្បីឲ្យផ្ទៃរឿងទាំងមូលកាន់តែប្លែក ជាងរឿងមុនៗ។

តារាសម្ដែងវ័យក្មេង អ្នកនាង ភិន សុដាលីស បានបន្តទៀតថា ភាពយន្តរឿង «ស៊ុបពើម៉ាំ» ត្រូវបានផលិតកម្ម គ្រោងចំណាយទុនផលិត​ អស់ប្រមាណ​៧ម៉ឺនដុល្លារ ព្រោះជាភាពយន្តខ្នាតធំ និងតួសម្ដែងសុទ្ធសឹងតែល្បីៗ កំពុងមានការគាំទ្រខ្លាំង លើទីផ្សារភាពយន្ត នាពេលបច្ចុប្បន្ននេះ។ ផលិតកម្ម មហាហង្ស តែងតែផលិតរឿងប្រកប​ដោយគុណភាព តម្រូវទៅតាមទីផ្សារ និងទទួលបានការគាំទ្រខ្លាំង ពេលចាក់បញ្ចាំងរឿងរបស់ខ្លួន នាពេលកន្លងមក​។

កូនស្រីរបស់ចាងហ្វាង​ផលិតកម្មរូបនេះ បានឲ្យដឹងទៀតថា ភាពយន្តខ្នាតធំរឿង «ស៊ុបពើម៉ាំ» នឹងសង្ឃឹមយ៉ាងមុតមាំថា ទទួលបានជោគជ័យ និងការគាំទ្រខ្លាំង ព្រោះតាមរយៈបទពិសោធន៍ ​របស់តារាសម្ដែងក្នុងរឿង និងរឿងរបស់ផលិតកម្មជាច្រើន ដែលបានដាក់បញ្ចាំង​លើទីផ្សារ នាពេលកន្លងមក គឺតែងតែបានការគាំទ្រច្រើន ពីសំណាក់ទស្សនិកជន មិនថារឿងនោះ ជាប្រភេទរឿងកំប្លែង ខ្មោចព្រាយ មនោសញ្ចេតនា ស្នេហា ឬកំសត់ធ្វើឡើយ គឺផលិតកម្ម មហាហង្ស ទទួលបានជោគជ័យជានិច្ច។ ដូច្នេះទើបផលិតកម្ម បានថតរឿងដាក់​បញ្ចាំងជាបន្តបន្ទាប់ លើទីផ្សារភាពយន្ត ទាំងរឿងភាគ និងរឿងដុំ ដើម្បីចូលរួមលើកស្ទួយវិស័យភាពយន្ត របស់ខ្មែរយើងផងដែរ។

សូមបញ្ជាក់ថា ភាពយន្តខ្នាតធំរឿង «ស៊ុបពើម៉ាំ» មានការចូលរួមសម្ដែង​ ដោយតារាល្បីៗជាច្រើនដួង រួមមាន អ្នកនាង សុខ សោម៉ាវត្តី, នាយ ពែកមី, អ្នកនាង ខ្ញុង , នាយគ្រឿន, អ្នកនាង កាតុ, នាយក្រូច, លោក លឹម រដ្ឋា, លោក ឯល ចាន់តារា ព្រមទាំងតារាកិត្តិយសល្បីៗ ជាច្រើនដួងទៀត៕