(ភ្នំពេញ)៖ រយៈពេលជាង៥ម៉ោងហើយ គិតចាប់តាំងពីម៉ោង៨៖៣០នាទីព្រឹក រហូតមកដល់ម៉ោង ១៖៤០នាទីរសៀលនេះ កិច្ចប្រជុំគណៈកម្មការព្រំដែន មិនទាន់បញ្ចប់នៅឡើយទេ នេះបើតាមការ​រាយការណ៍ពីភ្នាក់ងារ Fresh News ​នៅទីស្ដីការគណៈរដ្ឋមន្ដ្រី។

ទោះជាកិច្ចប្រជុំនេះ មានការបិទទ្វារមិនឲ្យមានក្រុមអ្នកសារព័ត៌មានចូលក៏ដោយ ប៉ុន្ដែក្រុមអ្នកសារព័ត៌មានជាច្រើនអ្នកបានឭសំលេង នៃការជជែកគ្នាខ្លាំងៗ ចេញពីបន្ទប់ប្រជុំ ដែលគេអាចសន្និដ្ឋានបានថា កិច្ចប្រជុំនេះហាក់បីដូចមានភាពតានតឹងខ្លាំង​ រវាងភាគីកម្ពុជា-វៀតណាម។

សូមបញ្ជាក់ថា ​នៅព្រឹកថ្ងៃទី២៩ ខែសីហា ឆ្នាំ២០១៦នេះ គណៈកម្មការព្រំដែន កម្ពុជា-វៀតណាម បានបើកកិច្ចប្រជុំ​នៅទីស្តីការ គណៈរដ្ឋមន្រ្តី ដោយពិភាក្សាទៅលើរបៀបវារៈមួយចំនួន ក្នុងនោះភាគីកម្ពុជា​​ក៏នឹង​សួរដេញដោល អំពីកំណត់ទូតពាក់ព័ន្ធនឹងការ រំលោភបំពាន របស់ភាគីវៀតណាម នៅតាមតំបន់ព្រំដែនមួយចំនួន របស់កម្ពុជាផងដែរ។

កិច្ចប្រជុំគណៈកម្មការព្រំដែន កម្ពុជា-វៀតណាម​៖ ភាគីក​ម្ពុជាដឹកនាំ ដោយលោកទេសរដ្ឋមន្ដ្រី វ៉ា គឹមហុង ប្រធានគណៈកម្មការព្រំដែនកម្ពុជា  និងចូលរួមដោយ លោក ឡុង វិសាលោ រដ្ឋលេខាអធិការក្រសួងការបរទេស និងភាគីវៀតណាមដឹកនាំដោយលោក Le Hoai trung អនុរដ្ឋមន្រ្តីក្រសួងការបរទេសវៀតណាម។

កិច្ចប្រជុំនេះមានររបៀបវារមួយចំនួន៖ ពិនិត្យមើលសេចក្តីព្រាងរបស់នាយករដ្ឋមន្រ្តី នៃប្រទសទាំងពីរ ស្នើក្រុមបច្ចេកទេសបារាំងជួយលើកិច្ចការព្រំដែន និងបញ្ហាជីកស្រះទឹក និងសង់ប៉ុស្តិ៍​នៅតាមព្រំដែន។

លោកទេសរដ្ឋមន្រ្តី វ៉ា គឹមហុង ប្រធានគណៈកម្មាធិការកិច្ចការចម្រុះព្រំដែនកម្ពុជា ធ្លាប់បានប្រាប់ Fresh News នៅចុងសប្តាហ៍មុនថា បញ្ហាសំខាន់ក្នុងការជជែកគ្នា រវាងកម្ពុជា-វៀតណាម នាពេលនេះ រួមមានដូចជាការឯកភាពគ្នារវាងប្រទេសទាំងពីរ ក្នុងការស្នើឱ្យ បារាំងជួយបច្ចេកទេស អំពីការគូសផែនទី និងរឿងដែលសម្តេចតេជោ ហ៊ុន សែន ស្នើទៅកាន់វៀតណាម ដែលមិនទាន់ដោះស្រាយ កន្លងមក៕