(ភ្នំពេញ)៖ ម៉ៅ ភារា និង ម៉ៅ ភារិទ្ធ ជាយុវជនរស់នៅក្នុងឃុំបឹងចារ ស្រុកសំបូរ ដែលជាតំបន់​ដាច់​ស្រ​យាលមួយក្នុងខេត្តក្រចេះ។ ដោយសារតែការខ្វះខាតក្នុងជីវភាព និងមិនមានរបររកកម្រៃទ្រទ្រង់ជីវភាព​នោះ យុវជនពីរនាក់បងប្អូន ជាមួយឪពុក បានសម្រេចចិត្តចូលកាប់ឈើក្នុងព្រៃឡង់ ដែលជាប់នឹងឃុំ​របស់​ពួកគេ។

ភារា បានប្រាប់ Fresh News ថា ការសម្រេចចិត្តចូលកាប់ឈើ ដោយសារតែមិនមានរបរ ដែលអាចរក​ចំណូលមកទ្រទ្រង់ជីវភាព។ «អត់មានរបររកលុយកាលពីដំបូង បានចូលកាប់ឈើក្នុងព្រៃឡង់»។

យុវជន ភារា បានឱ្យដឹងថា រូបគេ ប្អូនប្រុស និងឪពុក បានចាប់ផ្តើមចូលកាប់ឈើនៅព្រៃឡង់កាលពី​ឆ្នាំ​២០១៣ ហើយបានធ្វើសកម្មភាពនោះរយៈពេលប្រមាណជា៤ឆ្នាំ។

បើតាម ភារា ការចូលទៅកាប់ឈើក្នុងព្រៃឡង់ក្នុងមួយដងមានរយៈពេលប្រមាណជាកន្លះខែ ហើយ​រំលំ​ឈើ​រង្វង់ប្រមាណជា១០ដើម ដែលក្នុងនោះមានឈើខ្លះទំហំដល់ទៅពីរឱបក៏មាន។ ឈើដែលកាប់នោះ មានដូចជាឈើទាល ត្រាច និងតម្រែជាដើម។

ភារា បានឱ្យដឹងថា បន្ទាប់ពីកាប់ហើយ គេត្រូវអាច្រៀកឈើនោះ ហើយដឹកចេញមកក្រៅ ហើយមាន​ឈ្មួញ​ចាំទទួលទិញ និងដឹកតាមកាណូត។

ការចូលទៅកាប់ឈើមិនងាយស្រួលនោះឡើយ លំបាកក្នុងការកាប់ឈើជារឿងមួយទៅ លំបាកមួយទៀត គឺប្រឈមនឹងច្បាប់ ពេលខ្លះជួបមន្ត្រីបរិស្ថាន ជួបអ្នកការពារព្រៃឈើក៏រត់ចោលគោយន្ត និងម៉ាស៉ីនកាត់​ឈើ​ក៏មាន។ នេះបើតាមការរៀបរាប់របស់យុវជន ម៉ៅ ភារា និង ម៉ៅ ភារិទ្ធ។

បច្ចុប្បន្នយុវជនទាំងពីររូប រួមទាំងឪពុករបស់គេបានលាឈប់ពីរបរកាប់ឈើនេះហើយ។ បើតាម ភារា ការ​លាឈប់នេះ ដោយសារតែរូបធ្លាប់ត្រូវបានមន្ត្រីបរិស្ថានចាប់ខ្លួន និងមួយវិញទៀតដោយសារ​ពេលនេះ​រូប​គេមានការងារធ្វើនៅក្នុងចម្ការឈើដាំរបស់ក្រុមហ៊ុនស៊ីងបាយអូថេក។

ក្រុមហ៊ុនស៊ីងបាយអូថេក ជាក្រុមហ៊ុនមួយទទួលបានសិទ្ធិពីរាជរដ្ឋាភិបាល និងសហការជាមួយក្រសួង​កសិកម្ម រុក្ខាប្រមាញ់ និងនេសាទ ដាំឈើធ្វើឧស្សាហកម្មដូចជាដើមប្រេងខ្យល់ និងម៉ៃសាក់ជាដើម លើ​ផ្ទៃដីស្ថានីយផ្សព្វផ្សាយ និងស្តារព្រៃឈើបឹងចារ ស្ថិតនៅក្នុងខេត្តក្រចេះ និងខេត្តស្ទឹងត្រែង។

បច្ចុប្បន្នមានផ្ទៃដីប្រមាណជា ១ម៉ឺនហិកតា ត្រូវបានដាំដុះ ហើយឈើខ្លះក៏អាចកាត់ ដើម្បីយកទៅធ្វើជា​ក្តា​បន្ទះ​ផងដែរ។ តាមរយៈការវិនិយោគរបស់ក្រុមហ៊ុននេះ បានផ្តល់ការងារជាច្រើនកន្លែង ដល់ប្រជាពល​រដ្ឋរស់នៅក្នុងភូមិសាស្ត្រខាងលើ។

ក្រៅពីយុវជនបងប្អូនបង្កើត ម៉ៅ ភារា និង ម៉ៅ ភារិទ្ធ ក៏មានប្រជាពលរដ្ឋជាច្រើនទៀត ដែលធ្លាប់ចូលកាប់​ឈើនៅព្រៃឡង់ បានចូលមកធ្វើការនៅក្នុងក្រុមហ៊ុនស៊ីងបាយអូថេក ហើយឈប់ចូលទៅកាប់ឈើនៅក្នុង​ព្រៃឡើង។

យុវជន ម៉ៅ ភារា បានឱ្យដឹងថា រូបគេ ទទួលបានប្រាក់ឈ្នួលប្រមាណ ៩០ម៉ឺនរៀនក្នុងមួយខែ។ ដូច្នេះ​ពីរ​នាក់បងប្អូន គឺទទួលបានប្រាក់ឈ្នួល ១លាន ៨០ម៉ឺនរៀល។ តាមរយៈប្រាក់ឈ្នួលនេះ ធ្វើឱ្យជីវភាព​គ្រួ​សារប្រសើរជាងមុន។ ឪពុករបស់គេលែងលំបាកចូលព្រៃកាប់ឈើ ហើយសន្សំលុយបានទិញម៉ូតូ និង​ទិញគោមកចិញ្ចឹមផងដែរ។

យុវជន ម៉ៅ ភារា និង ម៉ៅ ភារិទ្ធ បានមើលឃើញថា ការវិនិយោគដាំឈើរបស់ក្រុមហ៊ុនស៊ីងបាយអូថេក បានរួមចំណែកផ្តល់ការងារ ផ្តល់ចំណូលជួយទ្រទ្រង់ជីវភាពគ្រួសាររបស់គេ និងប្រជាពលរដ្ឋដទៃទៀត​ឱ្យបានរស់នៅសមរម្យ។ បន្ថែមពីលើនោះ ការវិនិយោគដាំដើមឈើនេះ បានរួមចំណែកឱ្យប្រជាពលរដ្ឋ​បោះបង់សកម្មភាពចូលទៅកាប់ឈើនៅក្នុងព្រៃឡង់។

យុវជនទាំងពីររូបនេះ បានអំពាវនាវដល់ប្រជាពលរដ្ឋដែលបន្តចូលព្រៃឡង់កាប់ឈើឱ្យបញ្ឈប់សកម្មភាប ហើយងាកមកធ្វើការងារនៅក្រុមហ៊ុនស៊ីងបាយអូថេក៕