(បន្ទាយមានជ័យ)៖ កម្លាំងការិយាល័យគ្រឿងញៀនខេត្ត សហការជាមួយកម្លាំងមូលដ្ឋានកងរាជអាវុធហត្ថ ស្រុកស្វាយចេក ដឹកនាំដោយលោក ស ប៊ុនសឿង មេបញ្ជាការរងកងរាជអាវុធហត្ថខេត្ត បើកប្រតិបត្តិការបង្ក្រាបករណីជួញដូរគ្រឿងញៀន និងឃាត់ខ្លួនជនសង្ស័យ២នាក់ជាបន្ដបន្ទាប់ ព្រមទាំងវត្ថុតាងផ្សេងទៀត នៅចំណុចភូមិអូរបីជាន់ ឃុំអូរបីជាន់ ស្រុកអូរជ្រៅ។
លោកឧត្តមសេនីយ៍ត្រី ឱ បូរិន្ទ មេបញ្ជាការអាវុធហត្ថខេត្ត បានប្រាប់ភ្នាក់ងារ Fresh News នាព្រឹកថ្ងៃទី២៩ ខែសីហានេះថា ក្រោយពីឃាត់ខ្លួនបានហើយអាវុធហត្ថធ្វើការសាកសួរភ្លាមៗ ពេលនោះជនសង្ស័យបានឆ្លើយសារភាពថា ថ្នាំញៀននេះទិញពីជនសង្ស័យម្នាក់ទៀត នៅក្រុងប៉ោយប៉ែត ភ្លាមនោះកម្លាំងអាវុធហត្ថក្រុងប៉ោយប៉ែត សហការជាមួយកម្លាំងអាវុធ ហត្ថស្នាក់ការសន្តិសុខ៥៦៨ ស្រាវជ្រាវ និងឃាត់ខ្លួនជនសង្ស័យបានម្នាក់ទៀត នៅចំណុចស្តង់តាងួន សង្កាត់ប៉ោយប៉ែត ក្រុងប៉ោយប៉ែត។ លោកមេបញ្ជាការ បានបញ្ជាក់ថា វត្ថុតាងដែលដកហូតបានរួមមាន គ្រឿងញៀនប្រភេទម៉ាទឹកកក១ថង់ធំ ស្មើនឹង៥.៤ក្រាម ម៉ូតូម៉ាក Honda Dream C125 ស៊េរីឆ្នាំ២០១៦មួយគ្រឿង ទូរស័ព្ទដៃ២គ្រឿង រថយន្តមួយគ្រឿងម៉ាកកាមេរីឆ្លាម ពណ៌ប្រផេះ និងប័ណ្ណសម្គាល់យានយន្ត១សន្លឹក ។
លោក បន្ថែមថា ជនសង្ស័យដែលឃាត់បាន ទី១-ឈ្មោះ ឈិត ចាន់ថន អាយុ២៧ឆ្នាំ រស់នៅក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក និងទី២-ឈ្មោះ ញិប ឈឿប អាយុ៣១ឆ្នាំ រស់នៅបណ្តោះអាសន្នផ្ទះសំណាក់រ៉ូហ្សា ភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត។ បច្ចុប្បន្នជនសង្ស័យទាំង២ ត្រូវបានកម្លាំងជំនាញ កសាងសំណុំរឿង បញ្ជូនទៅតុលាការដើម្បីដាក់ទោសទៅតាមផ្លូវច្បាប់៕
