(ស្វាយរៀង)៖ មានឈ្មួញក្នុងស្រុកដើរប្រមូលទិញអាចម៍គោ អាចម៍ក្របីលក់ឲ្យឈ្មួញវៀតណាម ​ដឹកឆ្លងដែនទៅប្រទេសវៀតណាម តាមច្រករបៀងនានាក្នុងស្រុកចន្រ្ទាជារៀងរាល់ថ្ងៃ ដោយឈ្មួញវៀតណាមថា ទិញអាចម៍គោអាចម៍ក្របីទាំងនេះ សម្រាប់ច្នៃធ្វើជីលក់។

ប្រជាពលរដ្ឋនៅឃុំចន្ទ្រា ស្រុកចន្រ្ទា បានឲ្យដឹងថា ក្នុងរយៈពេល៣ខែ ចាប់តាំងពីខែ១១ ឆ្នាំ២០២៣ មកដល់ខែមករា២០២៤នេះ មានឈ្មួញវៀតណាមជាច្រើននាក់ បានដើរប្រមូលទិញអាចម៍គោ អាចម៍ក្របី ដឹកទៅប្រទេសវៀតណាម ដោយអាចម៍គោ អាចម៍ក្របីស្ងួតក្នុង១ការ៉ុង លក់បាន ២,៥០០រៀល (១ការ៉ុង ស្មើនឹង​ ១៧គីឡូក្រាម ) ហើយក្នុង ១គ្រួសារ ចិញ្ចឹមគោ និងក្របីយ៉ាងតិច ៣០ក្បាល ទៅ ១០០ក្បាល ដើម្បី​ប្រមូលអាចម៍គោ និង​អាចម៍ក្របី ហើយ​ហាល ក្នុង១ខែ គ្រួសារខ្លះ ប្រមូលបាន​ចាប់ពី ៥០ការ៉ុង ទៅ ១០០ការ៉ុង គិតជាប្រាក់ លក់បាន ១២០,០០០រៀល ទៅ ២៥០,០០០រៀល។ គ្រួសារខ្លះ ប្រមូលបាន១៥០ការ៉ុង លក់បាន ៣៧០,០០០រៀល។

ប្រជាកសិករអ្នកចិញ្ចឹមសត្វគោ និងក្របី បានលើកឡើងថា បើគិតជាមធ្យមក្នុងឃុំចន្ទ្រា យ៉ាងតិច៣០០គ្រួសារ ដែលចិញ្ចឹមគោក្របី ហើយប្រជាពលរដ្ឋ ដែលរស់តាមបន្ទាត់ព្រំដែន ក្នុងស្រុកចន្ទ្រា គឺមានប្រមាណ ៨០ភាគរយហើយ ដែលប្រកបមុខរបរចិញ្ចឹមសត្វគោក្របី ដើម្បីយកអាចម៍គោក្របី លក់ឲ្យឈ្មួញវៀតណាម​។ ក្នុងស្រុកចន្ទ្រា គឺមាន ៦ឃុំ មានឃុំចន្ទ្រា ឃុំច្រេស ឃុំគគីរ ឃុំមេសថ្ងក ឃុំសំរោង និងឃុំទួលស្តី ដូច្នេះបើរាប់អ្នកចិញ្ចឹមក្របី គឺមិនតិចជាង ១ពាន់គ្រួសារទេ​។

ទាក់ទិនករណីនេះ បើតាមមន្ត្រីជំនាញ នៃមន្ទីកសិកម្ម រុក្ខាប្រមាញ់ និងនេសាទខេត្តស្វាយរៀង បានឲ្យដឹងថា នៅក្នុងស្រុកចន្ទ្រា មានប្រជាពលរដ្ឋចិញ្ចឹមសត្វគោក្របី សរុប ១៩១៣៤ក្បាល។ ក្នុងនោះ សត្វក្របី មាន៨៥៣២ក្បាល និងសត្វគោចំនួន ១០​៦០២ក្បាល។ នេះបើគិតត្រឹមឆមាសទី១ ក្នុង​ឆ្នាំ២០២៣ ។

ប្រជាកសិករ អ្នកចិញ្ចឹមសត្វគោក្របី បានលើកឡើងថា អាចម៍គោក្របី ដែលឈ្មួញវៀតណាម ប្រមូលទិញ គឺឲ្យតម្លៃថោក។ ដូច្នេះ​ប្រសិនបើមន្ទីរកសិកម្មខេត្តស្វាយរៀង មានវិធានការទប់ស្កាត់ការនាំចេញអាចម៍គោក្របី ទៅប្រទេសជិតខាង ហើយរកទុន​វិនិយោគបង្កើតសហគ្រាស ខ្នាតតូច ឬខ្នាតមធ្យម ដើម្បីយកអាចម៍គោ អាចម៍ក្របីទាំងនោះកែច្នៃ ផលិតជីធម្មជាតិ នៅមូលដ្ឋាន ដោយប្រើប្រាស់វត្ថុធាតុដើមក្នុងស្រុក រួមទាំង​រុក្ខជាតិ និង​កាកសំណល់សំរាម កែឆ្នៃផលិតជាជីធម្មជាតិ សម្រាប់លក់ចែកជូន​ប្រជាកសិករ ប្រើប្រាស់លើដំណាំស្រូវ និងបន្លែបង្កា ជាពិសេសចូលរួមអនុវត្តន៍គោលនយោបាយ «ភូមិមួយផលិតផលមួយ» របស់រាជរដ្ឋាភិបាល ឲ្យមានប្រសិទ្ធិភាព ទើបល្អប្រសើរ។

ប្រភពបន្តថា អាចម៍គោក្របី លក់ចេញទៅប្រទេសវៀតណាម ក្នុង១ឆ្នាំៗ រាប់រយតោន ហើយពេលប្រជាកសិករ ធ្វើស្រែ និងដាំដំណាំ ត្រូវទៅទិញជីគីមី ពីប្រទេសវៀតណាម មកប្រើប្រាស់វិញ ក៏រាប់សិបតោន​ដែរ។

សូមបញ្ជាក់ថា ​ប្រជាកសិករ​ខ្មែរនៅតំបន់ព្រំដែន តែងតែឆ្លងដែនទៅទិញជី ថ្នាំ ប្រេង ពីប្រទេសវៀតណាម មកប្រើប្រាស់លើដំណាំ​ស្រូវ និងបន្លែ៕