(ភ្នំពេញ)៖ ក្រោយសវនាការនៅរសៀលថ្ងៃទី២២ ខែមករា ឆ្នាំ២០២៤ បានបញ្ចប់ ចៅក្រមជំនុំជម្រះ លោក លឹម សុគន្ធារ៉ា និងលោក ប្លង់ សុផល ជាតំណាងអយ្យការ បានសម្រេចលើកយកករណីមេតុងទីនអនឡាញ អឿន ម៉ូលីកា ដែលរងបទចោទប្រកាន់ពីបទ រំលោភលើទំនុកចិត្ត (មិនបំពេញកាតព្វកិច្ចចំពោះឧបករណ៍អាចជួញដូរបាន) ករណីចេញមូលប្បទានប័ត្រអត់សាច់ប្រាក់ (សែកស្អុយ) ប្រមាណ ៣៦៥,០០០ដុល្លារ យកទៅប្រកាសាលក្រមនៅថ្ងៃទី០៦ ខែកុម្ភ: ឆ្នាំ២០២៤ខាងមុខ។
សូមបញ្ជាក់ថា ជនត្រូវចោទនាង អឿន ម៉ូលីកា ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ កាលពីថ្ងៃទី១៨ ខែធ្នូ ឆ្នាំ២០២២ បានសម្រេចចេញដីកាឃុំខ្លួនដាក់ពន្ធនាគារជាបណ្តោះ ក្រោមការចោទប្រកាន់ពីបទ រំលោភលើទំនុកចិត្ត (មិនបំពេញកាតព្វកិច្ចចំពោះឧបករណ៍អាចជួញដូរបាន) ករណីចេញមូលប្បទានប័ត្រអត់សាច់ប្រាក់ (សែកស្អុយ) ប្រមាណ ៣៦៥,០០០ដុល្លារ។
កាលនោះ សំណុំរឿងស្ថិតនៅក្នុងចំណាត់ការ លោក អ៊ុំ សុភក្តិ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ជាអ្នកបើកការស៊ើបសួរ។ ក្រោយពីសួរចប់តំណាងអយ្យការ បានធ្វើសម្រេចចោទប្រកាន់ ជនត្រូវចោទជាផ្លូវការ រួចបានបញ្ជូនទៅខាងចៅក្រមស៊ើបសួរតាមនីតិវិធី។ ជនត្រូវចោទឈ្មោះ អឿន ម៉ូលីកា ក៏មានជាប់ពាក់ពន្ធលើពាក្យបណ្តឹង២ ដែលជាបទល្មើសព្រហ្មទណ្ឌ រឿងចេញសែកស្អុយដែលមានទឹកប្រាក់ប្រមាណ ៣៦៥,០០០ដុល្លារ។
ពាក្យបណ្តឹង ទី១៖ អឿន ម៉ូលីកា ចេញមូលប្បទានប័ត្រអត់សាច់ប្រាក់ ចំនួន៣០ម៉ឺនដុល្លារ ឲ្យទៅឈ្មោះ សម្ផស្ស សូលីដា អ្នកលេងតុងទីនជាមួយគ្នា និងពាក្យបណ្តឹងទី២៖ អឿន ម៉ូលីកា បានចេញមូលប្បទានប័ត្រ អត់សាច់ប្រាក់ឲ្យទៅឈ្មោះ ទី ចាន់នូ ចំនួន ៦៥,០០០ដុល្លារ ក៏ជាអ្នកលេងតុងទីនដែរ ដើម្បីយកទៅទិញរថយន្ត ដោយជនត្រូវចោទបានអះអាងថា ខ្ចីមិនដល់មួយខែទេ និងប្រគល់ប្រាក់សងវិញគ្រប់ចំនួន ប៉ុន្តែទីបំផុតចេញសែកស្អុយមួយសន្លឹក។
ក្រោយមក នាង អឿន ម៉ូលីកា ត្រូវបានបញ្ជូនទៅឃុំខ្លួននៅពន្ធនាគារព្រៃស ជាបណ្តោះអាសន្ន ដើម្បីរង់ចាំពេលវេលាជំនុំជម្រះទោសទណ្ឌតាមនីតិវិធី៕
