(ភ្នំពេញ)៖ «ខ្ញុំសុខចិត្តលះបង់ការងារគ្រប់យ៉ាង មកចូលរួមក្នុងកម្មវិធីប្រគំតន្ត្រី ដើម្បីរកថវិកាជួយពេទ្យគន្ធបុប្ផា ព្រោះនេះការងារមានតម្លៃសម្រាប់សង្គម ជាពិសេសជួយដល់កុមារកម្ពុជា។ យើងដឹងហើយថា មន្ទីរពេទ្យគន្ធបុប្ផានេះ បានជួយព្យាបាលកុមារកម្ពុជា ដោយមិនយកប្រាក់ ដូច្នេះខ្ញុំចង់ចូលរួមជួយតាមលទ្ធភាព ដោយមិនយកប្រាក់ឡើយ ហើយបើលើកក្រោយមានកម្មវិធីនេះទៀត ខ្ញុំក៏រីករាយនឹងបន្តចូលរួមផងដែរ»។ នេះជាសម្ដីពិត ចេញពីក្រអៅបេះដូង របស់តារាចម្រៀងដ៏ល្បីម្នាក់ ប្រចាំក្នុងផលិតកម្ម សាន់ដេ គឺកញ្ញា សុខ ពិសី ដែលនាងបានលះបង់ ប្រយោជន៍ផ្ទាល់ខ្លួន ដើម្បីជួយដល់កុមារកម្ពុជា តាមរយៈការរួមចំណែក ជាមួយមន្ទីរពេទ្យគន្ធបុប្ផា។
ថ្លែងប្រាប់សារព័ត៌មាន Fresh News និង KhmerTalking នាពេលថ្មីៗនេះ តារាចម្រៀងសាច់សខ្ចី ដូចបណ្តូលចេក របស់ផលិតកម្មសាន់ដេរ កញ្ញា សុខ ពិសី បានឲ្យដឹងថា ការប្រគំតន្ត្រីមនុស្សធម៌ នៅម៉ោង៤រសៀល ថ្ងៃទី១៧ ខែកញ្ញានេះ គឺរៀបចំដោយសាកលវិទ្យាល័យន័រតុន សហការជាមួយ សមាគមគ្រួសារតារាកម្ពុជា។
តារាចម្រៀងស្រីដ៏ល្បាញល្បី របស់កម្ពុជា កញ្ញា សុខ ពិសី បានបញ្ជាក់ឲ្យដឹងថា នាងនឹងចូលរួមក្នុងការប្រគំ តន្រ្តីដ៏អស្ចារ្យមួយ នៅសាកលវិទ្យាល័យន័រតុន ដើម្បីប្រមូលថវិកា ជួយដល់មន្ទីរពេទ្យគន្ធបុប្ផា។ នេះមិនមែនជាលើកទី១ទេ សម្រាប់កញ្ញា សុខ ពិសី ដែលបានចូលរួម ក្នុងសកម្មភាពមនុស្សធម៌ និងជួយដល់សង្គម ពោលគឺនាងបានធ្វើការងារជាច្រើន លើកច្រើនសារមកហើយ។
កញ្ញា សុខ ពិសី បញ្ជាក់ទៀតថា «ការចូលច្រៀងក្នុងកម្មវិធីប្រគំតន្ត្រី ដើម្បីស្វែងរកថវិកាជួយមន្ទីរពេទ្យគន្ធបុប្ផានេះ ខ្ញុំចូលរួមដោយមិនទាមទារតម្លៃខ្លួន ចេញសម្តែងអ្វីឡើយ គឺខ្ញុំសុខចិត្តឲ្យអ្នករៀបចំ កម្មវិធីនេះ បង្វិលថវិកាតម្លៃខ្លួនរបស់ខ្ញុំ ដែលច្រៀងបានទាំងអស់ ជួយទៅដល់មន្ទីរពេទ្យគន្ធបុប្ផា»។
អ្វីដែលកាន់តែ មិននឹកស្មានដល់នោះ តារាចម្រៀងល្បីរូបនេះ បានបញ្ជាក់ថា នៅថ្ងៃនេះ នាងសុខចិត្តលុបចោល ការងារផ្ទាល់ខ្លួនពីរ គឺថតផ្សាយពាណិជ្ជកម្មម្សៅលាបមុខ និងថតខារ៉ាអូខេ បទថ្មីរបស់នាង ដោយបានស្នើសុំឲ្យខាងក្រុមហ៊ុនថតស្ប៉ត និងខារ៉ាអូខេ លើកទៅថ្ងៃក្រោយ ដើម្បីយកពេលវេលានេះ ចូលរួមកម្មវិធីប្រគំតន្ត្រីដ៏សំខាន់ ជួយដល់កុមារកម្ពុជា ដែលជាការងារសង្គមមួយ មិនអាចឲ្យនាង អវត្តមានបានឡើយ៕
