(ប៉ារីស, ស្វីស)៖ ក្រុមហ៊ុន CMA CGM GROUP ដែលជាក្រុមហ៊ុនដឹកជញ្ជូនលំដាប់ពិភពលោកមួយ គ្រោងពង្រីកការវិនិយោគបន្ថែមនៅកម្ពុជា។

បំណងនេះត្រូវបានលើកបង្ហាញដោយលោក Rodolphe SaaDé ប្រធាន និងជានាយកប្រតិបត្តិក្រុមហ៊ុន CMA CGM GROUP ក្នុងពេលជួបពិភាក្សាការងារជាមួយលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា នៅព្រឹកថ្ងៃព្រហស្បតិ៍ ទី១៨ ខែមករា ឆ្នាំ២០២៤នេះ នៅទីក្រុងប៉ារីស ប្រទេសបារាំង។

ក្នុងជំនួបនេះ លោក Rodolphe SaaDé បានជម្រាបលោកឧបនាយករដ្ឋមន្ត្រី អំពីសកម្មភាពអាជីវកម្ម​របស់ក្រុមហ៊ុន CMA CGM GROUP ជាក្រុមហ៊ុនដឹកជញ្ជូនដែលមានការិយាល័យច្រើនជាង៤០០ និង​កំពុងធ្វើប្រតិបត្តិការក្នុងប្រទេសជាង ១៦០នៅទូទាំងពិភពលោក។ ក្រុមហ៊ុន ក៏មាននាវា សម្រាប់​ដឹក​ជញ្ជូន​ប្រមាណ៦២៣ និងយន្តហោះដឹកទំនិញចំនួន៦ផងដែរ។ សេវាកម្មសំខាន់ៗរបស់ក្រុមហ៊ុន រួមមាន៖ សេវាដឹកជញ្ជូនទំនិញទូទាំងពិភពលោក, សេវាឡូជីស្ទីក (end-to-end logistics), សេវាតាមដាន​អំពី​ដំណើរការដឹកជញ្ជូន និងការរៀបចំទុកដាក់ទំនិញ, និងជំនាញពាក់ព័ន្ធនឹងកុងតឺន័រសម្រាប់​ដឹកទំនិញ​គ្រប់​ប្រភេទ។ ជាមួយគ្នានេះ លោកប្រធាន និងជានាយកប្រតិបត្តិក្រុមហ៊ុន ក៏បានជម្រាបជូនអំពីគម្រោង​នៃការ​ពង្រីកការវិនិយោគរបស់ខ្លួនបន្ថែមទៀតនៅកម្ពុជាផងដែរ។

លោកឧបនាយករដ្ឋមន្ត្រី ស៊ុន ចាន់ថុល បានបង្ហាញក្តីរីករាយ និងស្វាគមន៍ចំពោះបំណង​របស់​ក្រុម​ហ៊ុន​ក្នុង​ការពង្រីកការវិនិយោគបន្ថែមនៅកម្ពុជា។ លោកឧបនាយករដ្ឋមន្ត្រី ក៏បានលើកទឹកចិត្តឱ្យ​ក្រុមហ៊ុនសហ​ការជាមួយគ្រប់ភាគីពាក់ព័ន្ធ ដោយបានគូសបញ្ជាក់អំពីការប្តេជ្ញាចិត្ត​របស់រាជរដ្ឋាភិបាលក្នុងការ​ធានា​បរិយាកាសវិនិយោគអំណោយផល និងការជួយសម្របសម្រួលដល់វិនិយោគិនទាំងអស់​ឱ្យទទួលបានភាព​កក់ក្តៅ និងទំនុកចិត្តខ្ពស់៕