(ភ្នំពេញ)៖ លោក អ៉ឺមេណេហ្ស៊ីលដូ គុប៉ា ឡូប៉េស (Ermenegildo “Kupa” Lopes) ឯកអគ្គរដ្ឋទូត នៃសាធារណរដ្ឋប្រជាធិបតេយ្យទីម័រឡេស្តេ ប្រចាំកម្ពុជា បានថ្លែងការកោតសរសើរ អរគុណដល់រដ្ឋសភា និងរាជរដ្ឋាភិបាលកម្ពុជា ដែលតែងតែគាំទ្រដល់ការអភិវឌ្ឍដល់ប្រទេសខ្លួនដូចជាការគាំទ្រយ៉ាងពេញទំហឹងរបស់រាជរដ្ឋាភិបាល និងរដ្ឋសភាកម្ពុជា ចំពោះការចូលជាសមាជិកអាស៊ាន និងអន្តរសភាអាស៊ាន (AIPA) របស់ទីម័រឡេស្តេ។

ឯកអគ្គរដ្ឋទូត នៃសាធារណរដ្ឋប្រជាធិបតេយ្យទីម័រឡេស្តេ រូបនេះបានបន្តថា ជាមួយគ្នានេះ កម្ពុជាបានផ្តល់អាហារូបករណ៍ជារៀងរាល់ឆ្នាំដល់និស្សិតទីម័រឡេស្តេបានមកសិក្សានៅកម្ពុជាផងដែរ។

ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រឡេស្តេ បានលើកដូច្នេះនៅក្នុងឱកាសចូលជួបសម្តែងការគួរសម និងពិភាក្សាការងារជាមួយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា នៅវិមានរដ្ឋសភា នាព្រឹកថ្ងៃទី១៧ ខែមករា ឆ្នាំ២០២៤។

នៅក្នុងឱកាសនោះ លោក អ៉ឺមេណេហ្ស៊ីលដូ គុប៉ា ឡូប៉េស បានលើកឡើងថា ទំនាក់ទំនងដ៏ល្អរវាងប្រទេសទាំងពីរបានលើកកម្ពស់ តាមរយៈការផ្លាស់ប្តូរដំណើរទស្សនកិច្ចទៅវិញទៅមក នៃថ្នាក់ដឹកនាំប្រទេសទាំងពីរ។ សម្តេចតេជោ ហ៊ុន សែន ប្រធានឧត្តមទីប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្រ្តីកម្ពុជា បានបំពេញទស្សនកិច្ចជាផ្លូវការ និងមិត្តភាពនៅប្រទេសទីម័រឡេស្តេ កាលពីឆ្នាំ២០១៦។

ឯកអគ្គរដ្ឋទូត បានបញ្ជាក់ថា ប្រទេសកម្ពុជា និងទីម័រឡេស្តេ ជាប្រទេសបងប្អូននឹងគ្នា ដែលមានសម្តេចតេជោ ហ៊ុន សែន ជាមេដឹកនាំដ៏ល្អមួយ មានភាពអស្ចារ្យបំផុត ដែលបានស្វែងរកសុខសន្តិភាព មិនមែនសម្រាប់តែកម្ពុជាប៉ុណ្ណោះទេ ប៉ុន្តែសម្តេច ជាវីរបុរសរបស់សកលលោកផងដែរ។

លោក អ៉ឺមេណេហ្ស៊ីលដូ គុប៉ា ឡូប៉េស បានអបអរសាទរជោគជ័យនៃការបោះឆ្នោតនៅកម្ពុជា ដែលការបោះឆ្នោតដោយសេរី ត្រឹមត្រូវ និងយុត្តិធម៌នោះ ខ្លួនលោកផ្ទាល់ ជាសាក្សីម្នាក់ ដែលបានចូលរួមសង្កេតការណ៍ដោយផ្ទាល់។ ឯកអគ្គរដ្ឋទូត បានអបអរសាទរផងដែរ ជូនចំពោះសម្តេចរដ្ឋសភាធិបតី ដែលត្រូវបានរដ្ឋសភាបោះឆ្នោតជ្រើសតាំងជាប្រធានរដ្ឋសភា នីតិកាលទី៧នេះ។

សម្តេចមហារដ្ឋសភាធិការធិបតី ឃួន សុដារី បានស្វាគមន៍យ៉ាងកក់ក្តៅចំពោះវត្តមានលោក អ៉ឺមេណេហ្ស៊ីលដូ គុប៉ា ឡូប៉េស និងសហការី។ សម្តេចបានគូសបញ្ជាក់ថា វត្តមានរបស់ឯកអគ្គរដ្ឋទូតនាពេលនេះ ប្រៀបដូចជាការមកសួរសុខទុក្ខរវាងបង និងប្អូនដូច្នេះដែរ។ សម្តេចមានសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះកិច្ចខិតខំប្រឹងប្រែង និងការរួមចំណែកដ៏សំខាន់របស់លោកឯកអគ្គរដ្ឋទូតផ្ទាល់ ដែលបានរួមចំណែកក្នុងការពង្រឹង និងលើកកម្ពស់ទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា-ទីម័រឡេស្តេ បានយ៉ាងល្អប្រសើរ ចាប់តាំងពីពេលបានភ្ជាប់ទំនាក់ទំនងការទូតជាមួយគ្នានាឆ្នាំ២០០២ មក។

សម្តេចប្រធានរដ្ឋសភាកម្ពុជា បានគូសបញ្ជាក់ថា រដ្ឋសភាកម្ពុជានិងរដ្ឋសភាទីម័រឡេស្តេបានសហការ និងគាំទ្រគ្នា ក្នុងវេទិកាអន្ដរសភានានារួមមាន AIPA, IPU, APPF ជាដើម។ ប៉ុន្តែទំនាក់ទំនងជាលក្ខណៈទ្វេភាគីនៅមិនទាន់មានកិច្ចព្រមព្រៀងណាជាមួយគ្នានៅឡើយ។

នៅក្នុងគោលដៅពង្រឹង និងពង្រីកកិច្ចសហប្រតិបត្តិការរវាងរដ្ឋសភានៃប្រទេសទាំងពីរ លោក អ៉ឺមេណេហ្ស៊ីលដូ គុប៉ា ឡូប៉េស តំណាងប្រជាពលរដ្ឋទីម័រឡេស្តេ និងលោកស្រីប្រធានរដ្ឋសភា បានគោរពអញ្ជើញសម្តេចប្រធានរដ្ឋសភា ទៅបំពេញទស្សនកិច្ចនៅសាធារណរដ្ឋប្រជាធិបតេយ្យទីម័រឡេស្តេ តាមពេលសមស្របណាមួយ។

សម្តេចរដ្ឋសភាធិបតី គាំទ្រដល់ការពង្រឹងពង្រីកទំនាក់ទំនងកិច្ចសហប្រតិបត្តិការរវាងសភាប្រទេសទាំងពីរ និងបានគូសបញ្ជាក់ថា ក្នុងនាមថ្នាក់ដឹកនាំរដ្ឋសភាជាស្រ្តីដូចគ្នា សម្តេចសង្ឃឹមថា នឹងមានឱកាសជួបប្រាស្រ័យទាក់ទាក់ទងការងារដោយផ្ទាល់ជាមួយ លោកស្រីប្រធានរដ្ឋសភា សាធារណរដ្ឋប្រជាធិបតេយ្យទីម័រឡេស្តេ នៅពេលវេលាណាមួយជាមិនខានឡើយ៕