(ដាវ៉ូស, ស្វីស)៖ លោកស្រី Jane Sun អគ្គនាយិកាក្រុមហ៊ុន Trip.com បានប្តេជ្ញានាំភ្ញៀវទេសចរឱ្យកាន់តែច្រើនថែមទៀត ចូលមកទស្សនាប្រទេសកម្ពុជា។

ការប្តេជ្ញានេះ បានធ្វើឡើងក្នុងពេលលោកស្រី ចូលជួបសម្តែងការគួរសម និងពិភាក្សាការងារ​ជាមួយ​សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី១៦ ខែមករា ឆ្នាំ២០២៤នេះ នាទីក្រុងដាវ៉ូស ប្រទេសស្វីស។

ក្នុងជំនួបនោះលោកស្រី Jane Sun បានថ្លែងអំណរគុណសម្តេចធិបតី ហ៊ុន ម៉ាណែត ដែលបានអនុញ្ញាតឱ្យរូប​លោក​ស្រី និងសហការី ចូលជួបសម្តែងការគួរសម។ លោកស្រី បានជម្រាបសម្តេចធិបតី អំពីដំណើរការអាជី​វ​កម្ម និងសក្តានុពលរបស់ក្រុមហ៊ុន Trip.com ដែលមានប្រតិបត្តិការអាជីវកម្មផ្តោតជាសំខាន់លើ​វិស័យ​ទេសចរណ៍។

លោកស្រី ក៏បានបញ្ជាក់ផងដែរអំពីគោលបំណងរបស់ក្រុមហ៊ុន​ក្នុងការបន្តសហការជាមួយក្រុម​ហ៊ុន​ដៃគូ​នៅកម្ពុជា ដើម្បីនាំភ្ញៀវទេសចរឱ្យបានកាន់តែច្រើនមកទស្សនាប្រទេសកម្ពុជា ដែលជាប្រទេសដ៏ស្រស់​ស្អាត និងមានគោលដៅទេសចរណ៍ ដែលមានភាពទាក់ទាញខ្លាំង។

សម្តេចធិបតីនាយករដ្ឋមន្ត្រី បានសម្តែងនូវក្តីរីករាយចំពោះជំនួបជាមួយលោកស្រីអគ្គនាយិកា និង​សហ​ការី និងបានបង្ហាញការស្វាគមន៍ចំពោះបំណងរបស់ក្រុមហ៊ុន​ក្នុងការពង្រីកសកម្មភាពវិនិយោគនៅកម្ពុជា ជាពិសេសតាមរយៈកិច្ចសហការជាមួយបណ្តាក្រុមហ៊ុនដៃគូក្នុងស្រុក ស្របពេលរាជរដ្ឋាភិបាល អាណត្តិ​ទី៧ បាននិងកំពុងដាក់ចេញនូវគោលនយោបាយ និងយន្តការចាំបាច់ សំដៅជំរុញកំណើននៃវិស័យ​ទេស​ចរណ៍នៅក្រោយវិបត្តិនៃជំងឺកូវីដ-១៩។

គួរបញ្ជាក់ថា Trip.com គឺជាវេបសាយធ្វើដំណើរមួយឈានមុខគេលើពិភពលោក ដោយរួមបញ្ចូលនូវ​កញ្ចប់ផលិតផល និងសេវាកម្មទេសចរណ៍ដ៏ទូលំទូលាយសម្រាប់ការធ្វើដំណើរជុំវិញពិភពលោក។ អ្នកទេស​ចរទូទាំងពិភពលោក ក៏អាចកក់សេវាកម្មទេសចរណ៍ ដូចជាសំបុត្រយន្តហោះ កន្លែងស្នាក់នៅ និងសំបុត្ររថយន្តជាដើមនៅកម្ពុជា តាមរយៈវេបសាយ Trip.com។ កាលពីថ្ងៃទី២៤ ខែឧសភា ឆ្នាំ​២០២៣កន្លងទៅ ក្រុមហ៊ុន Cambodia Angkor Air របស់កម្ពុជា ក៏បានចុះអនុស្សរណៈយោគយល់​គ្នាក្នុងភាពជាដៃគូជាមួយនឹង Trip.com ក្នុងការបង្កើតអាកាសយានដ្ឋានឆ្លាតវៃ (smart airport) នៅក្នុងខេត្តសៀមរាបផងដែរ៕