(បន្ទាយមានជ័យ)៖ កម្លាំងកងរាជអាវុធហត្ថក្រុងប៉ោយប៉ែត ដឹកនាំដោយ លោក ជា ដា មេបញ្ជាការអាវុធហត្ថ ចេញប្រតិបត្តិការបង្រ្កាប ជនសង្ស័យជួញដូរគ្រឿងញៀន ២នាក់ និងដកហូតបានថ្នាំ១៩កញ្ចប់ នៅចំណុចខាងលិចស្តង់តាងួន ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត។
លោកមេបញ្ជាការអាវុធហត្ថក្រុង បានឲ្យដឹងនៅយប់ថ្ងៃទី២៦ ខែសីហា ឆ្នាំ២០១៦នេះថា ប្រតិបត្តិការនេះ ធ្វើឡើងដោយមានការសម្របសម្រួលពីលោកមាស ច័ន្ទពិសិដ្ធ ព្រះរាជអាជ្ញាអមសាលាដំបូងខេត្ត ទើបកម្លាំងជំនាញបានឃាត់ខ្លួនជនសង្ស័យ២នាក់ ទី១-ឈ្មោះ ទូច រដ្ឋា អាយុ២៦ឆ្នាំ ទី២-ឈ្មោះ ផន សុជាតិ អាយុ៣២ឆ្នាំ។
លោកបន្ដថា «បន្ទាប់ពីខ្លួនកម្លាំងរបស់យើង ដកហូតបានថ្នាំញៀនប្រភេទមេតំហ្វេតាមីន១៩កញ្ចប់ ទូរស័ព្ទដៃ៣គ្រឿង លុយ៥ម៉ឺនរៀល និងសម្ភារៈប្រើប្រាស់មួយចំនួនទៀតផងដែរ»។
ក្រោយពីបានចម្លើយសារភាព ជនសង្ស័យទាំង២នាក់ កសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់៕
