(ភ្នំពេញ)៖ សមាគមមិត្តសិល្ប:ស្មគ្រ័ចិត្តជួយសង្គម បានចុះសួរសុខទុក្ខជាលើកទីពីរ ដល់លោកតា ផ្លុង មឿក ជាសិល្បករជើងចាស់កំពុងមានជំងឺរាំរ៉ៃ បាត់បង់សមត្ថភាពការងារជាយូរមកហើយ។ បច្ចុប្បន្នលោកតា ផ្លុងមឿក មានសភាពទ្រុតទ្រោម បាត់បង់ការចងចាំច្រើន និងស្ថិតក្នុងការព្យាបាលជាប្រចាំ។
តាមការរៀបរាប់ពីកូនស្រី របស់គាត់បានប្រាប់សមាគមឲ្យបានដឹងពីម្សិលមិញថា បន្ទាប់ពីទទួលបានព័ត៌មានអំពីជំងឺរបស់លោកតា ផ្លុង មឿក ក៍មានអ្នករាប់អាន អាណិតស្រឡាញ់ និងអ្នករួមអាជីពមួយចំនួនបានមកសួរសុខទុក្ខលោកតា ហើយក៍លេចលឺថា លោកតា ផ្លុង មឿក ឃ្លានគុយទាវ តែមិនមានលទ្ធភាពទិញ ពិសារបាន។
កូនស្រីរបស់គាត់ក៍បានបញ្ជាក់ទៀតថា តាមការពិតគ្រាន់តែបានដំណឹងថា លោកតា ផ្លុង មឿក ធ្លាក់ខ្លួនឈឺ មិនអាចចេញសំដែងរកកំរៃចិញ្ចឹមខ្លួនបាន សម្តេច តេជោ និងសម្តេចកិត្តិព្រឹទ្ធិបណ្ឌឹត បានចាត់តំណាងអោយមកសួរសុខទុក្ខ និង ពិនិត្យស្ថានភាពជំងឺជាក់ស្តែង តាំងពីលោកតាទើបតែឈឺភ្លាមៗមកម្ល៉េះ ហើយ សម្តេចតេជោ និង សម្តេចកិត្តិព្រឹទ្ធបណ្ឌិត ក៏បានជួយឧបត្ថម្ភជាទឹកប្រាក់ចំនួន មួយម៉ឺនដុល្លារ ដែលបានផ្តល់ជូនកាលពីខែមេសា ឆ្នាំ២០១៣ រួមនិងប្រាក់ ឧបត្ថម្ភជាប្រចាំខែចំនួន៥០ម៉ឹនរៀលក្នុងមួយខែ ដែលចាប់បើកតាំងពីខែឧសភា ឆ្នាំ២០១៣មក ហើយប្រាក់ឧបត្ថម្ភនេះ កូនរបស់គាត់ក៍បានទៅបើកជាប្រចាំនៅ ខុទ្ទកាល័យសម្តេចតេជោ រហូតមកមិនដែលខាន ដែលសរុបមកដល់ពេលនេះ គឺមានចំនួន៥២ខែរួចមកហើយ។
លោកតា ផ្លុង មឿក ក៏នៅទទួលបានប្រាក់ចូលនិវត្តន៍ចំនួន៣០ម៉ឺនរៀល ពីក្រសួងវប្បធម៏ និងវិចិត្រសិល្ប:ផងដែរ ហើយថ្មីៗនេះទៀត ប្រាក់ចូលនិវត្តន៍ របស់លោកតាក៍បានឡើងដល់ សាមសិបប្រាំមួយម៉ឺនរៀល។ កូនស្រីរបស់លោកតា ផ្លុងមឿក ក៍បានបញ្ជាក់ថា ប្រាក់ឧបត្ថម្ភសរុបទាំងអស់គឺទទួលបានចំនួន ប៉ែតសិបប្រាំមួយម៉ឺនរៀលដែរក្នុងមួយខែៗ ហើយត្បិតមែនតែប្រាក់ឧបត្ថម្ភទាំងអស់មិនអាចរ៉ាប់រងបន្ទុក ចំណាយលើកការព្យាបាលជំងឺបានទាំងស្រុងមែន ក៍ប៉ុន្តែក៏បានសំរាលនូវបន្ទុកចំណាយមួយចំនួនធំផងដែរ។
ក្នុងនាមសមាគម សូមថ្លែងអំណរគុណ និង កោតសរសើរយ៉ាងក្រៃលែង ដល់សម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងយកចិត្តទុកដាក់ សុខទុក្ខដល់ប្រជាពលរដ្ឋគ្រប់រូប ដែលជួបការលំបាក ដូចជាសិល្បករ សិល្បការិនី ជនចាស់ជរា អ្នកមានជំងឺ ឈឺថ្កាត់ ឬ អ្នកក្រអត់ក្សត់ទាំងឡាយដែលលោកបានដឹង និងទាំងអស់នេះហើយគឺពិតជាបន្ទុកមួយដ៏ធំធេង ចំពោះសម្តេចទាំងពីរ ក៏សូមជូនពរសម្តេចទាំងពីរ សុខភាពល្អ និង ជោគជ័យក្នុងការដឹកនាំប្រទេសឲ្យបានរីកចំរើនរុងរឿង និងជាភាពកក់ក្តៅដល់ប្រជាជនគ្រប់ៗគ្នា៕
