(ភ្នំពេញ)៖ ក្នុងនាមជាអ្នកស្រាវជ្រាវ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមើលឃើញអំពីសារសំខាន់៧ចំណុច នៃគម្រោងព្រែកជីកហ្វូណនតេជោ ដែលរាជរដ្ឋាភិបាលកម្ពុជា កំពុងសិក្សានាពេលនេះ។ លោកថា ប្រសិនបើគម្រោងនេះ លេចចេញជារូបរាង នោះប្រទេសកម្ពុជា នឹងទទួលបានអត្ថប្រយោជន៍យ៉ាងច្រើន មិនត្រឹមតែវិស័យដឹកជញ្ជូននោះឡើយ។

លោកបណ្ឌិតសភាចារ្យ បានបញ្ជាក់បែបនេះ នៅក្នុងកម្មវិធីពិភាក្សា Fresh Talk នាចុងសប្តាហ៍កន្លងទៅនេះ លើប្រធានបទ «តើកម្ពុជាទទួលបានអត្ថប្រយោជន៍អ្វីខ្លះ សម្រាប់សេដ្ឋកិច្ច និងនយោបាយ ជាមួយគម្រោងព្រែកជីកហ្វូណនតេជោ?»។

អត្ថប្រយោជន៍សំខាន់៧ចំណុច ដែលលើកឡើងដោយ លោកបណ្ឌិត សុខ ទូច រួមមានដូចជា៖ ១៖ ការដឹកជញ្ជូនផលិតផល ដែលចំណេញជាការដឹកជញ្ជូនតាមរថភ្លើង និងរថយន្តកុងតឺន័រ, ទី២៖ ការមិនពឹងច្រមុះអ្នកដទៃដើម្បីដក, ទី៣៖ បង្ហាញតម្លៃជាប្រវត្តិសាស្ត្រនៅក្នុងសម័យដឹកនាំដោយ សម្តេចធិបតី ហ៊ុន ម៉ាណែត, ទី៤៖ ការអំណោយផលដល់វិស័យកសិកម្ម សម្រាប់ប្រជាជន, ទី៥៖ អំណោយផលសម្រាប់ជីវៈចម្រុះ និងសត្វ, ទី៦៖ ងាយស្រួលក្នុងការចាប់អ្នកវិនិយោគិន ដោយសារតែការចំណាយក្នុងការដឹកជញ្ជូនទាប និងទី៧៖ ការបង្កើតផ្លូវទឹកកាន់ច្រើនកាន់តែល្អ ដោយសារទឹកប្រៀបដូចជាសរសៃឈាមរបស់កម្ពុជាជាដើម។

គម្រោងព្រែកជីកហ្វូណនតេជោ ប្រវែង ១៨០គីឡូម៉ែត្រ ជា​គម្រោងតភ្ជាប់ផ្លូវទឹករវាងទន្លេ ទៅកាន់សមុទ្ររបស់កម្ពុជា។ ព្រែកជីកនេះ ចាបផ្តើមពីព្រែកតាកែវនៃ​ទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៉ីង នៃទន្លេ​បាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់​ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ ១.៦លាននាក់ រស់នៅអមសងខាងផ្លូវទឹក។ ការសាងសង់គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹងចំណាយ​ទុន​វិនិ​យោគ ១,៧០០លានដុល្លារអាម៉េរិក និងរយៈពេលសាងសង់ប្រមាណ ៤ឆ្នាំ។

រាជរដ្ឋាភិបាលកម្ពុជា កាលពីខែតុលា ឆ្នាំ២០២៣ កន្លងទៅនេះ បានចុះកិច្ច​ព្រម​ព្រៀង​អនុញ្ញាតឱ្យ ក្រុមហ៊ុន​សា​ជីវកម្មស្ពាន និង​ថ្នល់ចិន (CRBC) សិក្សាលំអិតបន្ថែមលើគម្រោងមួយនេះ មុនឈានដល់ការចរចា​ឈានទៅចុះកិច្ច​ព្រម​ព្រៀងសាងសង់ ដែលជាដំណាក់កាលចុងក្រោយ។ ការសិក្សាលំអិតលើគម្រោងនេះក្នុងរយៈពេល៨ខែ ហើយបន្ទាប់ពីសិក្សាចប់រយៈពេល៨ខែនេះ គឺអាចឈានដល់ការចរចា ដើម្បីចុះកិច្ចព្រមព្រៀងសាងសង់តែម្តង៕