(សៀមរាប)៖ ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី សហការជាមួយមូលនិធិផ្កាសន្តិភាព និងមន្ទីរពេទ្យសាកលវិទ្យាល័យវេជ្ជសាស្ត្រទីក្រុងហូជីមិញ បានចុះពិនិត្យ និងព្យាបាលដោយឥតគិតថ្លៃពលរដ្ឋរស់នៅ វិទ្យាល័យភ្នំក្រោមស៊ូវ៉ុន ភូមិភ្នំក្រោម សង្កាត់សៀមរាប ក្រុងសៀមរាប ខេត្តសៀមរាប ដោយមានការចង្អុលបង្ហាញដ៏ខ្ពង់ខ្ពស់ពី លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី។

ឱកាសនោះ លោក លេង ផាលី រដ្ឋលេខាធិការក្រសួងផែនការ និងជាសមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី បានដឹកនាំសម្របសម្រួល ក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី ចំនួន ២០៧ នាក់ ស្រី ចំនួន ១១៥នាក់និងបានចុះអប់រំសុខភាព បណ្តុះបណ្តាលវគ្គសង្រ្គោះបឋម សង្រ្គោះបឋម ព្រមទាំងពិនិត្យព្យាបាលជំងឺ និងចែកឱសថ ជូនបងប្អូនប្រជាពលរដ្ឋដោយឥតគិតថ្លៃ ចំនួន ២៦៩៦នាក់ ស្រ្តីមានចំនួន ១៨៦១នាក់ លើសផែនការ និងព្រមទាំងនាំពាក្យផ្តាំផ្ញើសួរសុខទុក្ខ និងបាននាំយកអំណោយថ្នាំពេទ្យដ៏ថ្លៃថ្លារបស់លោក ហ៊ុន ម៉ានី ចែកជូនដល់ប្រជាពលរដ្ឋក្រីក្រ ចំនួន ៧០០នាក់ ក្នុងម្នាក់ៗទទួលបាន អង្ករ ៥គីឡូក្រាម ទឹកត្រី ១ដប ទឹកដោះគោខាប់ ១កំប៉ុង ស្ករស ១គីឡូក្រាម ប្រេងឆា ១ដប ថវិកា ២ម៉ឺនរៀល។

ពិធីចុះពិនិត្យ និងព្យាបាលជូនប្រជាពលរដ្ឋដោយឥតគិតថ្លៃ របស់ក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី បានសហការជាមួយ ប្រតិភូមកពីប្រទេសវៀតណាមមាន ឯកឧត្តម Nguyen Thanh Van អគ្គកុងស៊ុលនៃប្រទេសវៀតណាម លោកស្រី ត្រូង ង៉ុក ទុយ ប្រធានអង្គការមូលនិធិផ្កាសន្តិភាព និង មន្ទីពេទ្យសាកលវិទ្យាល័យ វេជ្ជសាស្ត្រ ឱសថសាស្ត្រទីក្រុងហូជីមិញ សរុបចំនួន ៤០នាក់ និងសហការជាមួយលោក ប្រាក់ សោភ័ណ អភិបាលខេត្តសៀមរាប តំណាងដោយ លោកវេជ្ជបណ្ឌិត ក្រុស សារ៉ាត់ អនុប្រធានប្រតិបត្តិ ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ខេត្តសៀមរាប និងជាប្រធានមន្ទីរសុខាភិបាលខេត្តសៀមរាប មន្ទីរសុខាភិបាលខេត្ត លោក ហួត សូនី តំណាងសហភាពសហព័ន្ធយុវជនកម្ពុជា ខេត្តសៀមរាប ដឹកនាំសហភាពសហព័ន្ធយុវជនកម្ពុជាខេត្តសៀមរាបចំនួន ៣០នាក់ សកម្មជនក្រុមការងារយុវជនគណបក្សរាជធានីភ្នំពេញ មន្ទីរជុំវិញខេត្ត និងអាជ្ញាធរសង្កាត់-ក្រុង ដែលពាក់ព័ន្ធ អមដំណើរដោយ លោកវេជ្ជបណ្ឌិត ឌឿន វុទ្ធា លោកវេជ្ជបណ្ឌិត អ៊ុង រតនា លោក ភឿន កុសល លោកបណ្ឌិត អ៊ី លីម៉ា លោកវេជ្ចបណ្ឌិត សាយ ឫទ្ធី លោកស្រីវេជ្ជបណ្ឌិត មួង សុជាតិ លោកស្រី អួន ចន្ថា ជាអនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី និងក្រុមការងារ។

ប្រធានប្រត្តិបត្តិក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី លោក លេង ផាលី បានឲ្យដឹងថា «ក្នុងរយៈពេល ១១ឆ្នាំ ឈានចូល ១២ឆ្នាំ (០២ ធ្នូ ឆ្នាំ២០១២ ដល់ ១៣ មករា ឆ្នាំ២០២៤) ក្រោមការដឹកនាំដ៏ខ្ពង់ខ្ពស់ដោយផ្ទាល់ ការចង្អុលបង្ហាញជាប្រចាំ ប្រកបដោយទស្សនវិស័យវែងឆ្ងាយ និងប្រាកដប្រជាគួរឱ្យគោរពកោតសរសើរ របស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន ១២,០៦៩នាក់ (មួយម៉ឺន ពីរពាន់ ហុកសិប ប្រាំបួននាក់) ក្នុងនោះស្ត្រីមានចំនួន ៦,៤៩៥នាក់ (ប្រាំមួយពាន់បួនរយកៅសិបប្រាំនាក់)»

លោកបន្ថែមថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបំពេញបេសកកម្មដ៏ថ្លៃថ្លាដោយទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្កាកូវីដ-១៩ ក្នុងក្របខណ្ឌទូទាំងប្រទេស សង្គ្រោះបឋម យកសំណាករកវីរុសកូវីដ-១៩ និងពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃក្នុង ២៥រាជធានី- ខេត្ត នៃព្រះរាជាណាចក្រកម្ពុជា បានចំនួន ១៨១៧លើក, ព្យាបាលជំងឺជូនប្រជាពលរដ្ឋបានចំនួន ១៣,១៥០,៨៦៤នាក់ (ដប់បីលាន ដប់ប្រាំម៉ឺន ប្រាំបីរយ ហុកសិបបួន នាក់) ក្នុងនោះស្ត្រីមានចំនួន ៦,៧២៧,០១២នាក់ (ប្រាំមួយលាន ចិតសិបពីរម៉ឺន ប្រាំពីរពាន់ ដប់ពីរ នាក់) គិតត្រឹម ថ្ងៃទី១៣ ខែមករា ឆ្នាំ ២០២៤ ច្រើនជាងចំនួន ៣ ភាគ ៤ នៃប្រជាជនសរុបទូទាំងប្រទេសដែលមានចំនួន ១៧,៣៣៦,៣០៧ នាក់ (ដប់ប្រាំពីរលាន សាមសិបបីម៉ឺន ប្រាំមួយពាន់ បីរយ ប្រាំពីរ នាក់) ធៀបនឹងឆ្នាំ២០២៤ ទទួលបានការពិនិត្យ ព្យាបាល និងចែកថ្នាំជូនដោយឥតគិតថ្លៃពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ។

លោក លេង ផាលី បានឲ្យដឹងទៀតថា «ក្រុមការងារគ្រូពេទ្យស្មគ្រ័ចិត្តឯកឧត្តម ហ៊ុន ម៉ានី ចំនួន ៤,៦០១នាក់ បាននិងកំពុងចុះយុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេសដោយឥតគិតថ្លៃ និងឥតគិតថវិកាបេសកកម្ម ដោយចាក់ជូនប្រជាពលរដ្ឋបានប្រមាណ ១១,៨៨៩,៧៦៧ដូស (ដប់មួយលានប៉ែតសិបប្រាំបីម៉ឺនប្រាំបួនពាន់ប្រាំពីររយហុកសិបប្រាំពីរដូស) ក្នុង ២៥ រាជធានី-ខេត្ត ដោយមានកិច្ចសហការជាមួយ សាខាសកម្មជនក្រុមការងាយុវជនរាជធានីភ្នំពេញ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា យុវជនកាយរិទ្ធិកម្ពុជា ក្រុមការងាររាជរដ្ឋាភិបាលចុះជួយរាជធានី ខេត្ត មន្ទីរសុខាភិបាលខេត្ត និងអាជ្ញាធរគ្រប់ជាន់ថ្នាក់។ បើគិតសេវាជាមធ្យម ប្រជាពលរដ្ឋក្នុងម្នាក់ ចំណាយអស់ ៥០ដុល្លារ សរុបត្រូវចំណាយទាំងអស់ប្រហែល ៦៥៧,៥៤៣,២០០ដុល្លារ (ប្រាំមួយរយហាសិបប្រាំពីរលាន ហាសិបបួនម៉ឺន ពីររយ ដុល្លារសហរដ្ឋអាមេរិក)»។

លោក៏បានបន្ថែមទៀតថា «តាមរយៈនៃកិច្ចខិតខំប្រឹងប្រែងដ៏ឧត្តុងឧត្តម និងដ៏ថ្លៃថ្លា របស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី រយៈពេល ១១ ឆ្នាំ កន្លងមក បានទទួលលទ្ធផលជាផ្លែផ្កា ដែលនាំឱ្យប្រជាពលរដ្ឋទាំងអស់ គោរពថ្លែងអំណរគុណយ៉ាងខ្លាំងជូនចំពោះ សម្តេចតេជោ ហ៊ុន សែន ឯកឧត្តម ហ៊ុន ម៉ានី ថ្នាក់ដឹកនាំខេត្តគ្រប់ជាន់ថ្នាក់ និងថ្នាក់ដឹកនាំ សមាជិក សមាជិកានៃក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ព្រមទាំងក្រុមការងារ »៕