(កំពត)៖ អាជ្ញាធរខេត្ត សហការជាមួយក្រុមហ៊ុន សុខា ហូតែល-បូកគោ នៅព្រឹកថ្ងៃទី២៦ ខែសីហា ឆ្នាំ២០១៦ បានបើកកិច្ចប្រជុំបន្ទាន់មួយ ជាមួយប្រជាពលរដ្ឋ ដែលមានការពាក់ព័ន្ធដីធ្លី លើទីតាំងថ្មី នៃគំរោងទីលានវាយកូនហ្គោល ដែលបានប្រព្រឹត្ត ទៅនៅសាលប្រជុំសាលាខេត្តកំពត។

ក្នុងពិធីនេះដែរ ក៏មានការចូលរួមពី​លោក សូត យា អភិបាល​រងខេត្តកំពត លោក ស្វាយ វុទ្ធី តំណាងក្រុមហ៊ុន សុខា ហូតែល បូកគោ ប្រធានមន្ទីរ និងមន្ត្រីជំនាញ ព្រមទាំងប្រជាពលរដ្ឋ ដែលពាក់ព័ន្ធដីធ្លីដោះដូរ។

​ជាលទ្ធផល នៃកិច្ចប្រជុំ ក៏បានឯកភាពគ្នារវាងក្រុមហ៊ុន និងប្រជាពលរដ្ឋ លើគោលការដោះដូរដី នៃគំរោងទីលានវាយកូនហ្គោល របស់ក្រុមហ៊ុន សុខា ហូតែល បូកគោ ដែលមានទីតាំង ចំណុចជើងភ្នំបូកគោ ស្ថិតក្នុងភូមិគីឡូ១២ ឃុំកោះតូច ស្រុកទឹកឈូ ខេត្តកំពត ដែលមាន​២៦គ្រួសារ សរុបដីប្រមាណ៦០ហិកតា​។

សូមបញ្ជាក់ថា ដី​៦០ហិកតា របស់ប្រជាពលរដ្ឋ២៦គ្រួសារនេះ ជាដីប្រភេទព្រៃបូស ហើយ១កន្លែងបានវាស់វែងរួចហើយ ប៉ុន្តែទីតាំងថ្មីវាយកូនហ្គោល របស់ក្រុមហ៊ុន សុខា ហូតែល គំរោងជាន់នៅលើដីនោះ។ ដូច្នេះរាល់ទំនាស់កន្លងមក ក៏បានដោះស្រាយសំរួលគ្នារួចរាល់ហើយដែរក្នុងថ្ងៃនេះ លើកលែងតែ អ្នកអវត្តមាន​៧នាក់ ក្នុង២៦នាក់ ឬ២៦គ្រួសារ ប៉ុណ្ណោះ ដោយមិនបានទទួលដំណឹង ពីអាជ្ញាធរមូលដ្ឋាន៕