(កោះកុង)៖ លោកស្រី អ៉ី នារីនេត អភិបាលរងខេត្តកោះកុង តំណាងលោកស្រី មិថុនា ភូថង អភិបាលខេត្ត នាថ្ងៃទី១១ ខែមករា ឆ្នាំ២០២៤ បានដឹកនាំកិច្ចប្រជុំបន្ទាន់មួយដោយពិភាក្សាពីវិធានការរក្សាទឹកស្អាត សម្រាប់ទុកជូនប្រជាពលរដ្ឋប្រើប្រាស់នារដូវប្រាំងខាងមុខ។
កិច្ចប្រជុំនេះដោយមានការចូលរួមពីអាជ្ញាធរ ក្រុង ស្រុក និងស្ថាប័នពាក់ព័ន្ធមួយចំនួនផងដែរ។
លោកស្រី អ៉ី នារីនេត បានថ្លែងថា ដោយសារពេលបច្ចុប្បន្នប្រទេសកម្ពុជា កំពុងទទួលរងនូវឥទ្ធិពលបាតុភូតអែលនីណូ ដែលបានបណ្តាលឱ្យអាកាសធាតុមានភាពក្តៅខ្លាំងក៏ដូចជា បង្កឱ្យមានតំបន់មួយចំនួនប្រឈម នឹងការខ្វះទឹកស្អាតប្រើប្រាស់ ដូចនេះសូមរដ្ឋបាលក្រុងស្រុកឃុំសង្កាត់ និងមន្ទីរ អង្គភាព ធ្វើសេចក្ដីរាយការណ៍អំពីស្ថានភាពទឹកនៅតាមមូលដ្ឋានរបស់ខ្លួន ក៏ដូចជាបញ្ហាប្រឈម ឬក៏តំបន់ដែលខ្វះទឹកស្អាតប្រើប្រាស់។
លោកស្រីអភិបាលរង បានបន្ថែមថា មន្រ្តីរដ្ឋបាលក្រុង ស្រុក ឃុំ សង្កាត់ និងមន្ទីរជំនាញ ត្រូវធ្វើសេចក្តីរាយការណ៍ជូនមករដ្ឋបាលខេត្ត ហើយរដ្ឋបាលក្រុង ស្រុក ឃុំ សង្កាត់ ត្រូវចុះពិនិត្យស្ថានភាពជាក់ស្តែង នៅតាមមូលដ្ឋាន របស់ខ្លូនឱ្យបានច្បាស់លាស់ អំពីតំបន់ដែលប្រឈមនឹងការខ្វះទឹកស្អាតប្រើប្រាស់ ជាពិសេសមន្ទីរជំនាញ ត្រូវចូលរួមដោះស្រាយជូនប្រជាពលរដ្ឋឱ្យបានទាន់ពេលវេលា ពីព្រោះការកង្វះទឹកស្អាតប្រើប្រាស់របស់ប្រជាពលរដ្ឋ នៅតាមតំបន់ដាច់ស្រយាល គឺបញ្ហាប្រឈមមួយដ៏ធ្ងន់ធ្ងរមួយហើយធ្វើមានការប៉ះពាល់សុខភាពប្រជាពលរដ្ឋ។
បន្ថែមពីនេះលោកស្រី បានណែនាំដល់អាជ្ញាធរគ្រប់មូលដ្ឋានត្រូវចុះពិនិត្យឱ្យញឹកញាប់ហើយត្រៀមលក្ខណៈសម្បត្តិឱ្យបានគ្រប់គ្រាន ដើម្បីងាយស្រួលនៅពេលប្រជាពលរដ្ឋតំបន់ខ្វះទឹកស្អាតប្រើប្រាស់៕
