(ភ្នំពេញ)៖​ រថយន្ត​ ពីរគ្រឿងរងការខូចខាតបន្ទាប់ពីម្ចាស់ស្រវឹង បានបើកបុកក្បាលស្ពានអាកាសតិចណូ​នា ម៉ោង១២៖៤០នាទីរំលងអាធ្រាត្រ​ ឈានចូលថ្ងៃទី២៥​ ខែសីហាឆ្នាំ២០១៦​ ស្ថិតក្នុងសង្កាត់បឹងកក់ទី១ ខណ្ឌទួលគោក​ តែសំណាងល្អមិនបណ្តាលឲ្យមានអ្នករងរបួសនោះទេ។

សមត្ថកិច្ចមូលដ្ឋានបានឲ្យដឹងថា នៅម៉ោងខាងលើ​ មានរថយន្តបើកបន្តកន្ទុយគ្នាពីរគ្រឿងមួយគ្រឿងម៉ាក​ Tacoma ពាក់ស្លាកលេខភ្នំពេញ2W-6956 និងមួយគ្រឿងទៀតម៉ាក​ Ford ពាក់ស្លាកលេខភ្នំពេញ2AB-7138 លុះបើកមកដល់ត្រង់ចំណុចក្បាលស្ពានអាកាសតិចណូ​ ធ្វើឲ្យម្ចាស់រថយន្ត Tacoma ដែលស្រវឹងមើលផ្លូវមិនសូវច្បាស់នោះបានជ្រុលទៅបុក ជាមួយក្បាលស្អានពេញទំហឹង​ហើយភ្លាមៗនោះ រថយន្ត Ford ដែលបើកមកពីក្រោយបានបុកបន្តទៀត​ ធ្វើឲ្យរថយន្តទាំងពីររងការខូចខាតយ៉ាងដំណំ​ តែមិនបណ្តាលឲ្យអ្នកបើកបរទាំងពីររងរបួសនោះទេ​។

ក្រោយកើតហេតុដោយសារតែរថយន្តទាំងពីរ បើកបុកបណ្តាលឲ្យខូចទ្រព្យសម្បត្តិ​ ក៏ត្រូវបានជំនាញចុះមកវាស់វែង នឹងស្ទួចយកទៅរក្សាទុក នៅការិយាល័យចរាចរណ៌ផ្លូវគោក នៃស្នងការដ្ឋាននគរបាលក្រុងភ្នំពេញ​ ដើម្បីរង់ចាំដោះស្រាយគ្នានៅពេលក្រោយ៕