(ភ្នំពេញ)៖ ផលិតកម្ម Red Picture បានដាក់បញ្ចាំងជាផ្លូវការហើយ នូវស្នាដៃទី៣ របស់ខ្លួន មានចំណងជើងថា «សង្សារខ្ញុំក្រមុំកូន១» នៅគ្រប់បណ្ដារោងភាពយន្ត ទំនើបនានាក្នុងក្រុងភ្នំពេញ ជាប់ពីថ្ងៃនេះតទៅ បន្ទាប់ពីរឿង «ភូមិអត់មនុស្ស» និងរឿង «ទង់ព្រលឹង» ទទួលបានជោគជ័យយ៉ាងខ្លាំងក្លា ពេលដាក់បញ្ចាំងក្នុងរោងភាពយន្ត នាពេលកន្លងមក។ យ៉ាងណាមិញ រឿង «សង្សារខ្ញុំក្រមុំកូន១» គ្រាន់តែចេញជាវីដេអូ Trailer បានរយៈពេលតែ៣ថ្ងៃប៉ុណ្ណោះ គឺមានអ្នកចូលទស្សនា ជាង១លានដងទៅហើយ ធ្វើឲ្យផលិតករក្នុងរឿងនេះ បង្ហាញពីភាពជោគជ័យខ្លាំង ពេលចាក់បញ្ចាំងជាផ្លូវការ។
ពិធីសម្ពោធបញ្ចាំងជាផ្លូវការនេះ ត្រូវបានធ្វើឡើងនៅរោងភាពយន្ត Legend ផ្សារទំនើបស្ទឹងមានជ័យ នាល្ងាចថ្ងៃទី២៣ ខែសីហា ឆ្នាំ២០១៦នេះ ដោយមានការផ្តល់កិត្តិយសចូលរួម ពីលោក ស៊ិន ច័ន្ទសាយ៉ា ប្រធាននាយកដ្ឋានភាពយន្ត និងទស្សនីយភាព នៃក្រសួងវប្បធម៌ និងវិចិត្រសិល្បៈ ព្រមទាំងសិល្បករ-សិល្បការិនី ដែលជាតួសម្ដែងក្នុងរឿង ជាច្រើននាក់។
លោក ឌៀប សុវណ្ណាដារ៉ា ចាងហ្វាងផលិតកម្ម និងជាផលិតករ បានអះអាងប្រាប់ឲ្យដឹងថា រឿង «សង្សារខ្ញុំក្រមុំកូន១» ជាវណ្ណកម្មថ្មីប្លែកមួយទៀត សម្រាប់ជាចំណីចក្ខុរបស់ទស្សនិកជន ព្រោះរឿងនេះ ជាប្រភេទរឿងបែបកំប្លុកកំប្លែង ស្នេហា បាញ់ប្រហារ ស៊ើបអង្កេត និងមនោសញ្ចេតនា។ មូលហេតុដែលលោកសម្រេចចិត្តដាក់ចំណងជើងថា «សង្សារខ្ញុំក្រមុំកូន១» ព្រោះជាធម្មតា បើកាលណាមនុស្សស្រីម្នាក់នៅក្រមុំ ឬនៅលីវ គឺមិនអាចមានកូននោះទេ ហើយតួអង្គស្រីប្រុសទាំងពីរ បានលាក់ប្រវត្តិគ្នារៀងៗខ្លួន រហូតមានការតាមដានគ្នា ទៅវិញទៅមក។ ម្យ៉ាងទៀតរឿងនេះ គឺលោកចង់ឲ្យអ្នកទស្សនាមានចម្ងល់ នឹងមកតាមដានទស្សនាទាំងអស់គ្នា។
លោកបន្តថា តាមការស្ទាបស្ទង់ គ្រាន់តែលោកបង្ហោះជាវីដេអូ Trailer រយៈពេលតែ៣ថ្ងៃប៉ុណ្ណោះ គឺមានអ្នកចូលទស្សនាជាង ១លានដងទៅហើយ ពិតជាមានសន្ទុះខ្លាំងជាងរឿងមុនៗ ស្ទើរតែនឹកស្មានមិនដល់។ អ្វីដែលជាលក្ខណៈពិសេស ក្នុងសាចច់រឿងនេះ គឺការសម្ដែងរបស់កូនក្មេងម្នាក់ (កូនរបស់នាយពែកមី) ដែលសម្ដែងបានល្អមែនទែន ធ្វើឲ្យលោកស្ទើរតែ មិនគួរឲ្យជឿ និងអាចធ្វើឲ្យអ្នកទស្សនាចាប់អារម្មណ៍ខ្លាំង។ ជាមួយគ្នានេះ ការសម្ដែងរបស់តួអង្គនីមួយៗ មានភាពស៊ីសង្វាក់គ្នាល្អណាស់ ធ្វើឲ្យសាច់រឿងទាំងមូលកាន់តែល្អ ថែមទៀត។
វណ្ណកម្មថ្មីទី៣ខាងលើនេះ ត្រូវបានលោក ឌៀប សុវណ្ណាដារ៉ា អះអាងថា ចំណាយទុនអស់ប្រមាញ៥ម៉ឺនដុល្លារ ដើម្បីផលិតឡើងឲ្យមានគុណភាពល្អ ។ ក្នុងនោះ មានការចូលរួមសម្ដែងពីតារាល្បីៗដូចជា អ្នកនាង សារាយ សក្ខណា, លោក ជា វណ្ណារិទ្ធ នាយ ពែកមី, នាយគ្រឿន,នាយក្រូច, នាយចឺម, កូនពែកមី, ស្រីអ៉ីត ព្រមទាំងតារាសម្ដែងល្បីៗជាច្រើនដួងទៀត៕
