(ភ្នំពេញ)៖ នាយកសាលា លោកគ្រូ អ្នកគ្រូ នៅអនុវិទ្យាល័យបឹងកុក ខេត្តកំពង់ចាម បានសម្តែងក្តីរំភើបរីករាយយ៉ាងខ្លាំង បន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសផ្តល់អគារសិក្សា មួយខ្នងដល់ពួកគេ ដែលមានកំពស់៣ជាន់ និងបន្ទប់ចំនួន ១៨ ដើម្បីបំពេញតម្រូវការកើនឡើង របស់សិស្ស។
ការផ្តល់អគារថ្មីនេះ បានធ្វើឡើងបន្ទាប់ពីនាយកអនុវិទ្យាល័យនេះ បានស្នើសុំសម្តេចតេជោ ហ៊ុន សែន នៅលើបណ្តាញសង្គម Facebook ហើយបន្ទាប់ពី សម្តេចតេជោ ហ៊ុន សែន បានចុះពិនិត្យមើលដោយផ្ទាល់ ឃើញថា អនុវិទ្យាល័យនេះ មានអគារដែលមានលក្ខណៈទ្រុឌទ្រោម មិនអាចបំពេញតម្រូវការរបស់សិស្ស ដែលកំពុងកើនឡើងបាន។ សម្តេចបានបង្គាប់ឱ្យ វាយវិទ្យាល័យចាស់ដែលទ្រុឌទ្រោមចេញ។
លោក ឈឹម ប៊ុនធឿន នាយកអនុវិទ្យាល័យបឹងកុក បានឱ្យដឹងថា កន្លងមកលោកធ្លាប់ បានដាក់សំណើសុំអគារថ្មី ទៅក្រសួងអប់រំ យុវជន និងកីឡា ជាច្រើនលើករួចទៅហើយ ប៉ុន្តែមិនទាន់បានឆ្លើយតបនៅឡើយទេ។ លោកថាការឧបត្ថម្ភអគារថ្មី របស់សម្តេចតេជោ ហ៊ុន សែន នាពេលនេះ បានធ្វើនាយកសាលា លោកគ្រូ អ្នកគ្រូ មានទឹកចិត្តរំភើបឥតឧបមា។
លោកគ្រូ អ្នកគ្រូ និងលោកនាយកសាលា បានថ្លែងអំណរគុណដល់សម្តេចតេជោ ហ៊ុន សែន ហើយស្នើឱ្យប្រពលរដ្ឋទាំងអស់បោះឆ្នោតជូនសម្តេចតេជោ ហ៊ុន សែន ធ្វើជានាយករដ្ឋមន្រ្តី ជាបន្តបន្ទាប់ទៀត៕
