(ព្រះវិហារ)៖ អំណោយរបស់លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក) តាមរយៈលោក គីម រិទ្ធី អភិបាលខេត្តព្រះវិហារ និងជាអនុប្រធានសហភាពសហព័ន្ធយុវជនកម្ពុជា ថ្នាក់កណ្តាល ត្រូវនាំយកទៅចែកជូនដល់ប្រជាពលរដ្ឋជាជនពិការជើងទាំង២ និងប្រជាពលរដ្ឋដែលមានជីវភាពខ្វះខាតចំនួន២គ្រួសារ ដែលរស់នៅសង្កាត់កំពង់ប្រណាក ក្រុងព្រះវិហារ។
លោក ឃិត សុធារ៉ា អភិបាលរងក្រុងព្រះវិហារ និងជាប្រធានសហភាពសហព័ន្ធយុវជនកម្ពុជា ស.ស.យ.ក ក្រុង បានថ្លែងថា ព្រឹកថ្ងៃទី២៥ ខែធ្នូ ឆ្នាំ២០២៣នេះ លោកបានដឹកនាំក្រុមការងារ ស.ស.យ.ក ក្រុង ស.ស.យ.ក សង្កាត់កំពង់ប្រណាក រួមជាមួយ លោកស្រីមេភូមិគោកបេង និងភូមិថ្មី និងសប្បុរសជន បាននាំយកអំណោយសប្បុរសធម៌ របស់លោក ហ៊ុន ម៉ានី តាមរយៈលោក គីម រិទ្ធី អភិបាលខេត្តព្រះវិហារ ផ្តល់ជូនគ្រួសារដែលមានជីវភាពខ្វះខាតទីទ័លក្រ និងពិការចំនួន៣គ្រួសារ។
នៅក្នុងឱកាសនោះលោក ឃិត សុធារ៉ា បានថ្លែងនូវការកោតសរសើរដល់បុរសពិការជើងទាំង២ តាំងពីកំណើតម្នាក់ ដែលតស៊ូចិញ្ចឹមគ្រួសារដោយប្រកបមុខរបរដើរទិញអេតចាយ ដោយមិនលើកដៃដើរសុំទានគេ។ លោកថែមទាំងផ្តល់កម្លាំងចិត្តដល់បុរសពិការជើងទាំង២ សូមកុំអស់សង្ឃឹមក្នុងជីវិត ផ្ទុយទៅវិញត្រូវខិតខំប្រកបរបរចិញ្ចឹមគ្រួសារបន្តទៀត ដោយលោកសន្យានឹងជួយឧបត្ថម្ភនៅឱកាសក្រោយៗទៀត
អំណោយដែលផ្តល់ជូនរួមមាន៖ លោក សុខ ផាន់ណា អាយុ២៨ឆ្នាំ ពិការជេីងទាំង២ តាំងពីកំណេីត រស់នៅភូមិគោកបេង សង្កាត់កំពង់ប្រណាក ទទួលបានអង្ករ ២៥គីឡូ និងថវិកា ២០០,០០០រៀល។ លោក ឃុន ហ៊ន អាយុ៦៩ឆ្នាំ និងប្រពន្ធអាយុ៦៥ឆ្នាំ មានកូនប្រុសម្នាក់ដែលមានសតិមិនគ្រប់ រស់នៅភូមិថ្មី សង្កាត់កំពង់ប្រណាក ទទួលបាន អង្ករ ២៥គីឡូ និងថវិកា ៥០,០០០រៀល និងលោក ក្រូច អៀង អាយុ៥៧ឆ្នាំ ពិការមួយចំហៀងខ្លួន រស់នៅជាមួយម្តាយចាស់ អាយុ៧៨ឆ្នាំ រស់នៅភូមិថ្មី សង្កាត់កំពង់ប្រណាក ទទួលបាន អង្ករ២៥គីឡូក្រាម និងថវិកា ៥០,០០០រៀលផងដែរ៕
