(ភ្នំពេញ)៖ លោកស្រី ឆន សុគន្ធា ប្រធានផ្នែកស្ត្រីនៃសមាគមអាដហុក ពុំចូលបំភ្លឺតាមការកំណត់របស់តុលាការ នៅថ្ងៃទី២៤ ខែសីហានេះទៀតឡើយ ដោយសារតែអ្នកស្រីបានចូលបំភ្លឺម្តងរួចទៅហើយកាលពីពេលថ្មីៗនេះ ពាក់ព័ន្ធនឹងសំណុំរឿងសូកប៉ាន់សាក្សី។ នេះបើតាមការឱ្យដឹងពី លោក សឺន សែនករុណា មន្ត្រីជាន់ខ្ពស់ផ្នែកស៊ើបអង្កេតសមាគមអាដហុក។

លោកស្រី ឆន សុគន្ធា ត្រូវបាន លោក ធាម ច័ន្ទពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ ចេញដីកាកោះហៅឱ្យចូលបំភ្លឺក្នុងនាមសាក្សី នៅម៉ោង៩ព្រឹក ថ្ងៃទី២៤ ខែសីហា ឆ្នាំ២០១៦នេះ ជុំវិញសំណុំរឿងករណីសូកប៉ាន់សាក្សី ពាក់ព័ន្ធនឹងរឿង ខុម ចាន់តារាទី ហៅ ស្រីមុំ និងលោក កឹម សុខា ។

ទោះជាយ៉ាងណា លោក សឺន សែនករុណា ពុំបានបញ្ជាក់ឱ្យច្បាស់ថា លោកស្រី ឆន សុគន្ធា បានចូលបំភ្លៃនៅថ្ងៃណានោះទេ គ្រាន់តែថា ការចូលបំភ្លឺរបស់លោកស្រី ក្នុងនាមជាសាក្សី បានធ្វើឡើងដោយមិនមានមេធាវី។

Fresh News មិនអាចទំនាក់ទំនង លោក ធាម ច័ន្ទពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ និង លោកស្រី ឆន សុគន្ធា ដើម្បីបញ្ជាក់បន្ថែមរឿងនេះ បាននៅឡើយទេ នៅព្រឹកថ្ងៃទី២៤ ខែសីហា ឆ្នាំ២០១៦នេះ។

សំណុំរឿងសូកប៉ាន់សាក្សី ខុម ចាន់តារាទី ហៅស្រីមុំនោះ បានធ្វើឱ្យមន្រ្តីអាដហុក៤រូប មន្រ្តីគ.ជ.ប និងមេឃុំម្នាក់ រងនូវការចោទប្រកាន់រហូតដល់ជាប់ពន្ធនាគារ បន្ទាប់ពីមានការបកស្រាយពីកញ្ញា ខុម ចាន់តារាទី ថាមានមន្រ្តីអាដហុក និងអ្នកពាក់ព័ន្ធមួយចំនួនទៀត បានបង្គាប់ឱ្យរូបនាង និយាយកុហក់ប្រាប់សមត្ថកិច្ច។

អ្នកដែលជាប់ឃុំក្នុងរឿងនេះនោះមាន លោក នី សុខា ប្រធានផ្នែកស៊ើបអង្កេត សមាគមអាដហុក, លោក យី សុខសាន្ត អនុប្រធាន ផ្នែកស៊ើបអង្កេត សមាគម អាដហុក, លោក ណៃ វ៉ងដា អនុប្រធានផ្នែកស៊ើបអង្កេតសមាគមអាដហុក, លោកស្រី លឹម មុនី មន្រ្តីអង្កេតជាន់ខ្ពស់អាដហុក លោក នី ចរិយា អគ្គលេខាធិការរង គ.ជ.ប និង លោកមេឃុំ ស៊ាង ចែត ដែលត្រូវបានឃាត់ខ្លួនដោយ អង្គភាពប្រឆាំងអំពើពុករលួយ៕