(ភ្នំពេញ)៖ កំណាត់ផ្លូវ២៧១ ត្រូវបានបិទទាំងស្រុងមួយចំហៀង រយៈពេល៦ថ្ងៃ ដោយចាប់ផ្តើមពីព្រឹកថ្ងៃទី២៤នេះ រហូតដល់ថ្ងៃទី៣០ ខែសីហា ឆ្នាំ២០១៦ ដើម្បីរៀបចំបំពង់បូមទឹក នៅការដ្ឋានសាងសង់ស្ថានីយ៍បូមទឹកបឹងត្របែក។ នេះបើតាមការផ្សព្វផ្សាយសាលារាជធានីភ្នំពេញ។
រដ្ឋបាលរាជធានីភ្នំពេញ បានបញ្ជាក់ថា ការបិទផ្លូវនេះគឺធ្វើឡើងទាំងយប់ ទាំងថ្ងៃ ព្រោះថា ក្នុងរយៈពេលនេះ លើទីតាំងការដ្ឋាន នឹងបង្រួមខ្សែគន្លងចរាចរផ្លូវ ចំណុចឆ្លងកាត់ ដោយអនុញាតឲ្យយានយន្ត ធ្វើចរាចរ១ខ្សែប៉ុណ្ណោះ ហើយកំណាត់ផ្លូវនេះនឹងមានការស្ទះចរាចរជាមិនខាន។ ក្នុងនោះដែរសាលារាជធានីភ្នំពេញ ក៏បានសុំការយោគយល់អធ្យាស្រ័យ និងស្នើឱ្យប្រជាពលរដ្ឋ ពង្វាងចរាចរចេញពីទីតាំងនេះ ដោយអនុគ្រោះ ហើយផុតរយៈពេលកំណត់ ផ្លូវនេះនឹងដាក់ឲ្យធ្វើចរាចរជាធម្មតាវិញ។
បន្ថែមពីនេះ រដ្ឋបាលរាជធានីភ្នំពេញ សង្ឃឹមថា ស្ថានីយ៍បឹងត្របែកថ្មី នឹងអាចដាក់ឲ្យដំណើរការសាកល្បង នៅថ្ងៃទី៧ ខែកញា ឆ្នាំ២០១៦ខាងមុខ ជាមួយសមត្ថភាពបូមទឹក ១៨ម៉ែត្រគូបក្នុង១វិនាទី ដែលនឹងកាត់បន្ថយការលិចលង់ ដោយទឹកភ្លៀងនៅខណ្ឌចំការមន ខណ្ឌ៧មករា និងខណ្ឌដូនពេញ បានមួយកម្រិតបន្ថែមទៀត៕
