(តូក្យូ, ជប៉ុន)៖ នៅរសៀលថ្ងៃចន្ទ ទី១៨ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញរូបភាពមួយសន្លឹកពេលកំពុងហូបអាហារជាមួយកូនស្រីឈ្មោះ ហ៊ុន ពេជ្រមុន្នីលីណា។
ជាមួយការបង្ហាញរូបភាពសម្តេចធិបតី បានរំលេចសារបែបនេះថា «ឆ្លៀតពេលសម្រាប់កូនស្រី ចន្លោះកិច្ចប្រជុំ»។
សូមបញ្ជាក់ថា ក្នុងដំណើរបំពេញការងារនៅប្រទេសជប៉ុនពីថ្ងៃទី១៥ ដល់១៩ ខែធ្នូ ឆ្នាំ២០២៣នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បាននាំកូនរបស់សម្តេច គឺកុមារី ហ៊ុន ពេជ្រមុន្នីលីណា ទៅជាមួយផងដែរ។ កុមារី ហ៊ុន ពេជ្រមុន្នីលីណា មានអាយុ ១៣ឆ្នាំ ជាកូនទី២ក្នុងគ្រួសារ។ ពេជ្រមុន្នីលីណា ធ្លាប់ជាសិស្សទទួលបានចំណាត់ថ្នាក់កំពូលតារាងក្នុងកម្មវិធីប្រកួតប្រជែងគណិតវិទ្យាលើបណ្តាញអនឡាញ។
ក្នុងដំណើរសម្តេចធិបតីទៅកាន់ប្រទេសជប៉ុននាពេលនេះ កុមារី ហ៊ុន ពេជ្រមុន្នីលីណា បានអមដំណើរឪពុកម្តាយទៅប្រទេសជប៉ុនផងដែរ។
គេបានសង្កេតឃើញថា ក្នុងដំណើរអមដំណើរឪពុកម្តាយទៅកាន់ប្រទេសជប៉ុននាពេលនេះ ចាប់ពីឡើងយន្តហោះ រួមការចូលរួមកម្មវិធីសំណេះសំណាលរវាងសម្តេចធិបតី ជាមួយសហគមន៍ខ្មែរនៅប្រទេសជប៉ុន ហ៊ុន ពេជ្រមុន្នីលីណា ហាក់មានឥរិយាបថមួយសមសួនគួរឱ្យកត់សម្គាល់។
ត្រឹមអាយុ ១៣ឆ្នាំ តែគេហាក់យល់ដឹងពីឥរិយាបថជាមនុស្សធំ។ អារម្មណ៍ហាក់មិនញាប់ញ័រអ្វីនោះឡើយ ទាំងពេលឡើងយន្តហោះ ក៏ដូចជាពេលចូលរួមពិធីសំណេះសំណាល ទឹកមុខរបស់កុមារីរូបនេះរំលេចស្នាមញញឹម ប្រកបដោយភាពស្វាហាប់ ខណៈដែលឥរិយាបថទាំងដើរ សំពះ និងអង្គុយពោរពេញដោយសីលធម៌។
ពិតជាកម្រណាស់ ដែលក្មេងស្រីវ័យត្រឹម ១៣ឆ្នាំ មានឥរិយាបថបែបនេះ។ តាមកាយវិហារនេះ មានការលើកជាសំណួរថា តើកុមារីរូបនេះ កំពុងទទួលបានមរតកតំណពូជ ឬគេហៅថាហ្សេនោះ ជាអ្នកនយោបាយ ហ្សេនភាពជាអ្នកដឹកនាំផ្នែកនយោបាយ បន្តពីជីតា និងឪពុកឬយ៉ាង?
សម្តេចតេជោ ហ៊ុន សែន បានដាក់ការសង្ស័យថា ចៅស្រីរបស់សម្តេចហាក់កំពុងចាប់អារម្មណ៍លើរឿងនយោបាយ ហើយបានលើកទឹកចិត្តឱ្យចៅរៀនសូត្រពីនយោបាយ ព្រមជាមួយមុខវិជ្ជាផ្សេងទៀតដែលចៅចង់រៀនផងដែរ៕
